《台語荒漠甘泉(全羅版)》

| | | 轉寄

"Tsa-ji̍t ê iu-siong"

listen


Tsa̍p-it ge̍h tshue-káu (Tsa̍p-it ge̍h káu ji̍t)

"Tiàm-tī i ê ìm-ńg ê beh tò-tńg-lâi; in beh tshin-tshiūⁿ gō͘-kak koh huan-tshiⁿ, khui-hue tshin-tshiūⁿ phû-tô-tshiū." (Hô-se-a 14:7)

Àm-thâu-á tsi̍t tsūn ê tuā-hō͘, tsiong guá hue-hn̂g ê hue lóng phah pháiⁿ-khì lah. Guá khuàⁿ-tio̍h tsi̍t tsâng só͘ sim-ài ê hue, siū tio̍h bû-tsîng ê hong-hō͘ sàu kah hue-thâu tìm-tìm suê-suê, hue-phìⁿ ha̍p khí-lâi, khuàⁿ khí-lâi i ê îng-huâ bí-lē lóng siau-sit khì lah. Guá siūⁿ guá ài tán kàu muâ-nî tsiah uē koh khuàⁿ tio̍h tsit ê hue.

Bô phah-sǹg, àm-mî kè liáu, ji̍t-thâu tshut-lâi, tsá-khí-sî kā guá só͘ sim-ài ê hue tuà-lâi ua̍h-la̍t. Kng tsiò tī hue, hue-luí iā ǹg kng, in tiong-kan ū tsiap-tshiok, ū khè-ha̍p kau-thong, ji̍t ê lîng-li̍k thuân-ji̍p tī hue-luí tíng-bīn. Hue khai-sí giâ thâu, hue-phìⁿ tián-khui, sit-khì ê bí-lē koh tò-tńg-lâi, koh-khah tshàn-lē. Guá gông-ngia̍h tio̍h-tsi̍t-kiaⁿ, tsit ê sū kìng-jiân uē huat-sing. Nńg-nńg iù-iù ê hue tsiap-tshiok tio̍h khah kiông ê sū-bu̍t (kng) uē tuì in tit-tio̍h li̍k-liōng koh khí-sik!

Guá buē hiáu kái-sik lán án-tsuáⁿ thong-kè kap Siōng-tè ê kau-óng lâi tit-tio̍h sū-hōng kap jím-nāi ê li̍k-liōng. Put-kò guá tsai tse sī tsi̍t ê sū-si̍t. Hiān-tsāi lí sī-m̄-sī hō͘ tāng-tàⁿ kap khùn-khó͘ tshì-liān teh kah buē tshuán-khuì ah? Tshē-kiû kap Tsú Ki-tok ê kau-thong, án-ni lí beh tit-tio̍h sìng-lī ê li̍k-liōng kap lîng-li̍k, in-uī Siōng-tè ìng-ún kóng, "Guá tik-khak kian-kò͘ lí." (Í-sài-a 41:10)

Tsa-ji̍t ê iu-siong

Tsang ê hō͘, sī muî-kuì ê pó-tsio̍h sim,
Sī iûⁿ-tshiū ê gûn, liú-tshiū ê kim;
Tsang ê iu-siong sī tshim-tshim
Ū-kò Siōng-tè tuā un-huī ê lâi-lîm.

Tsang ê hō͘, hō͘ suaⁿ-phiâⁿ tshiⁿ-tshiⁿ phik-phik,
Sī jio̍k-kuì ê to-sik sian-ô͘, sī tshiⁿ-tsháu ê phik-gi̍k;
Tsang ê iu-siong kà-sī lîng-hûn lâi thiaⁿ
Tshing-hong só͘ tshe lâi íng-uán-ua̍h suè-suè ê siaⁿ.

Ah, hong-hō͘ ē, tshuì-jio̍k ê sim-lîng, hō͘ āu uē kng-bîng,
Sī gō͘-phìⁿ-hue ê iàn, tshì-phè ê tsu,bô-iáⁿ-ba̍k tsháu ê thian-tîng,
Sui-jiân iáu-teh iu-siong ê lîng,
Tī bîng-ji̍t beh tsiâⁿ bí-lē hong-sīng. --- Katherine Lee Bates


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com