《台語荒漠甘泉（全羅版）》

“Ti-tsiok siông-lo̍k, Tsīn pún-hūn”

作者 陳清俊 翻譯

listen








It ge̍h tshit ji̍t

“In-ūi gúa í-king ha̍k-si̍p, put-lūn sím-mi̍h kíng-gū, bô m̄ ti-tsiok.” (Hui-li̍p-pí 4:11)

Tse sī Pó-lô tī ga̍k-tiong sóo siá ê ūe, sè-kan ê hok-lo̍k, i lóng bô hióng-siū tio̍h, tsóng-sī i tsin ti-tsiok. Siōng-tè ê un-tián ū kàu-gia̍h lah!

Ū tsi̍t ê kòo-sū án-ni kóng: Ū tsi̍t-ê ông, ū tsi̍t-ji̍t kiânn kàu ông-kiong ê āu-hue-hn̂g, khùann-kìnn sóo-ū ê tshiū-ba̍k, hue-tsháu lóng beh-sí beh-sí, tsin kî-kùai, tsiū khì mn̄g hn̂g-ting sím-mi̍h gûan-in. Tsiah tsai gûan-lâi sī tshiū-ba̍k hue-tsháu lóng teh ùan-thàn ka-kī ê put-hīng. Tsiáu-tsîng tshiū hiâm i bô tshîng (siông) tshiū ê ti̍t koh kûan; tshîng tshiū hiâm i bô tshiūnn ing-tshiū khui tsin-súi tsin-tsūe ê ing-hue; ing-tshiū bô sîng phû-thô kiat tsin-tsūe ké-tsí; phû-thô kóng i būe-tàng ka-kī khiā lâi hûan-ló, tsiū lóng ùan-thàn, m̄ ài u̍ah loh.

Tng ông kiânn kàu tsi̍t ê kak-lo̍h, khùann-tio̍h tsi̍t-tiâu han-tsî-tîn sinn tio̍h tsin bōo-sīng, tsiū kî-kùai mn̄g han-tsî-tîn kóng, lí ná-ūe sinn-tio̍h tsiah hó-sè, lí bô tshin-tshiūnn tshiū ūe khiā-tsāi-tsāi, iā bô khui tsin-súi ê hue, lí thài-ūe u̍ah kah tsiah khùai-lo̍k. Han-tsînn-tîn kóng, “Bô m̄-tio̍h, gúa tsin khùai-lo̍k ti-tsiok, bô hûan bô ló. Lí ài ū han-tsî sinn tī tsia, gúa tsiū tsīn gúa ê pún-hūn lâi tsùe, lâi sinn han-tsî, tsùe tsi̍t-tsâng ū u̍ah-khì, bōo-sīng ê han-tsî-tîn.”

Lâng tsùe tūa su-gia̍p tsin sūn,
Tsóng-sī lí tsīn lí ê hūn,
Tī Siōng-tè tūa ka-tîng nih,
Bô lâng ūe tsùe hiah hó tshin-tshiūnn lí.

Tsiong pún-sin ûan-tsûan bô pó-liû lâi tè Tsú ê lâng, nā tshin-tshiūnn Pó-lô bô-lūn tī tó tsi̍t-tsióng ê khûan-kíng, lóng tsin ti-tsiok, huat-tshut Ki-tok-tôo ê phang-bī. Siōng-tè ê ì-sù tsùe lí ka-kī ê ì-sù. I ài lí án-tsúann tsùe, tsiū tsiàu án-ni tsùe, sui-jiân lí pún-sin bô tsi̍t-tiám-á sóo-ū, Siōng-tè khiok beh sù múi hāng mi̍h hōo lí.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw