《台語荒漠甘泉(全羅版)》

| | | 轉寄

"Put-pîng"

listen
Jī ge̍h tsa̍p-gō͘ (Jī ge̍h tsa̍p-gō͘ ji̍t)

"M̄-thang in-uī tsuè pháiⁿ ê lâng, sim-lāi put-pîng; ia̍h m̄-thang uàn-tò͘ kiâⁿ put-gī ê lâng." (Si-phian 37:1)

M̄ thang kè-thâu put-pîng só͘ tú-tio̍h ê khuân-kíng. Nā-sī huân-ló, tsit tiâu lō͘ kiâⁿ uē thong, siá tse si ê si-jîn só͘ tú-tio̍h ê khuân-kíng, beh hō͘ lí tuā-tuā ê tam-sim. "Pháiⁿ-lâng" tsok-ok ê lâng "tshīng tsí-sik kap iù-tuē pò͘ ê i-tsiûⁿ, ta̍k-ji̍t tshia-hua iàn-lo̍k;" (Lō͘-ka 16:19) Tsuè pháiⁿ ê lâng tsē kuân-uī, līng-jio̍k hiah ê put-hīng ê hiaⁿ-tī. Ū tsuē ê lâm-lú tī kok-lāi iông-iông tik-ì kiâⁿ-lâi kiâⁿ-khì, tsia̍h tsin khui, hióng-siū îng-huâ hù-kuì ê sing-ua̍h, khiok hó-lâng gī-lâng kui ji̍t kiaⁿ-hiâⁿ huân-ló.

"M̄ thang kiaⁿ-hiâⁿ", bô pit-iàu siū-khì! Pó-tshî líng-tsīng! Sui-jiân lí ū tsin hó ê lí-iû, huân-ló iā buē pang-tsān lí. Tsí ū sī hō͘ "bê-a-lìn-gú" (bearings) huat sio, buē sán-sing tsing-khì, li̍k-liōng. Tshia-lián-sim huat jia̍t tuì hé-tshia tsi̍t-tiám-á lī-ik mā bô. Jia̍t tsí-ū sī huán-tsok-iōng. In-uī bô pit-iàu ê mô͘-tshat, tshia-lián-sim tsiah uē sio khí-lâi; Ta-ta ê piáu-bīn hō͘-siong buâ, bô͘-tshat, uē sán-sing jia̍t, su-iàu tsi̍t-tih iû tī tiong-kan lâi lūn-ku̍t, tsiū-sī hô-hâi ha̍p-tsok lâi kang-tsok.

"Put-pîng" kap "mô͘-tshat" sī juā tsiâⁿ siāng-luī? In-uī put-pîng huat-sing mô͘-tshat sī khiàm Siōng-tè ê un-tián iû-ko. Lán nā huân-ló, tsiū tshin-tshiūⁿ tsi̍t-lia̍p suè-suè ê sua tiâu tī tshia-sim. Khó-lîng sī sió-sió ê sit-bōng, sió-khuá khuàⁿ bô khí lí, tsi̍t-tiám-á bô tsun-tiōng lí, suah hō͘ lán ê "khi-mó͘-tsí" bô hó. Tsi̍t lia̍p sua, tsi̍t sut-sut-á ê mô͘-tshat uē huat jia̍t, tsit ê jia̍t beh tì-kàu guî-hián ê tē-pō͘.

Tshian-bān m̄-thang hō͘ lí ê "bê-a-lìn-gú" huat-jia̍t. Īng Tsú ê iû lâi hō͘ lí líng lo̍h lâi, iā m̄-thang in-uī hit ê jia̍t hō͘ lí siū kui ji̍p "tsuè-pháiⁿ" ê luī. --- tuì "Gûn-pe̍h ê tshn̂g-kun"

Bô thîng ê sim ah, tsīng lo̍h-lâi; m̄-thang put-pîng koh huân-ló,
Siōng-tè ū tshing-tsióng hong-huat, piáu-sī I ê thiàⁿ kap pang-tsō͘,
Sìn-khò, Sìn-khò, koh sìn-khò, ti̍t kàu lí tsai I ê tō.

Bô thîng ê sim ah, tsīng lo̍h-lâi; Siōng-tè ê tshiò sī pîng-hô,
I ê thiàⁿ tsiong iu-siong kap sit-tshò lâi tiâu-hô,
Thiàⁿ-thàng, thiàⁿ-thàng, koh thiàⁿ-thàng,
an-tsīng tán tsiū hó.

Bô thîng ê sim ah, ióng-kám khí-lâi; bô koh haiⁿ-haiⁿ-tshan koh iu-siong,
Khí liâng-hong iā sī I ê hó-ì, tsin tsìng-siông,
Ǹg-bāng, ǹg-bāng, koh ǹg-bāng, hō͘ lí ê ióng-khì tuā tsing-tióng.

Bô thîng ê sim ah, tó tī I ê sim-huâi tiong,
I ê thiàⁿ ná hue teh khui, I ê un-tián sī lí sìⁿ-miā ê kng-liōng,
An-hioh, an-hioh, koh an-hioh, tī I un-jiû tuā li̍k-liōng.

Bô thîng ê sim ah, tsīng lo̍h-lâi; m̄-thang kiông-kiông beh tsing-thuat,
Siōng-tè ê ua̍h-miā kap lí liâm tsuè-hé, lí beh án-tsuáⁿ tuān-tsua̍t,
Kî-tó, kî-tó, koh kî-tó, ti̍t-kàu lí ê sìn-sim tsài tshut-huat. --- Edith Willis Liⁿ


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com