《台語荒漠甘泉（全羅版）》

 | | | 轉寄

"Lâi tè Guá"

作者 陳清俊 翻譯 2009.03.15

listen

Saⁿ ge̍h tsa̍p-gō͘ (Saⁿ ge̍h tsa̍p-gō͘ ji̍t)

"Tshin-tshiūⁿ tō͘-ún ê Ngá-kok, … Guá beh hō͘ lí tsuè phah gō͘-kak sin ê khì-kū." (Í-sài-a 41:14-15)

Sī-m̄-sī tsit nn̄g hāng ū siong-tong ê tsing-tsha, tō͘-ún kap sin koh ū khí ê khì-kū? Thâng, tō͘-ún sī tshuì-jio̍k ê, hō͘ tsio̍h-thâu kòng, tshia-lián gíng tsiū sí-bô; ū khí, lāi-lāi ê phah niû ê khì-kū, ū-sî uē phah tshuì tsio̍h-thâu, á-sī tsiong tsio̍h kā siah tsi̍t khih. Tsuân-lîng ê Siōng-tè beh tsiong tsi̍t hāng piàn tsiâⁿ tsuè līng-guā tsi̍t hāng. I ê lîng tsù-ji̍p khì, tshin-tshiūⁿ nńg-nńg ê tō͘-ún ū it-tshè ê jio̍k-tiám ê lâng, á-sī bîn-tso̍k ê sin-tsiūⁿ, hō͘ hit lâng, á-sī bîn-tso̍k huat-hui tshiong-hun ê li̍k-liōng, tī in ê li̍k-sú sî-tāi tsuè-tshut tshim-uán ê íng-hióng.

Sui-jiân sī tsi̍t-tsiah sió-sió ê tō͘-ún, iā thang ióng-kám khí-lâi, Tsuân-lîng ê Siōng-tè uē hō͘ lán ū lîng-li̍k khik-ho̍k khuân-kíng, hō͘ tsîng-sè tuì lán piàn tsuè iú-lī. Khò Siōng-tè ê tuā-lîng, lán ê lîng beh iâⁿ-kè it-tshè. Sīm-tsì lán beh tuì-hù siōng o͘-àm ê sit-bāng, kā I li̍h--khui, phuà--khui, beh huat-hiān pó-tsio̍h tī lāi-bīn. Thiⁿ-pē sù lán ū kǹg-thih-pan ê ì-tsì, phuà khui khùn-lân, ná thih-pê pê tshuì siōng tīng ê thô͘. I tī tíng-bīn ê king-bûn án-ni kóng “Guá beh hō͘ lí…” I kiám buē án-ni tsuè mah? – John Henry Jowett

Ki-tok īng tē-tsiūⁿ phuà-tshuì ê mi̍h lâi kiàn-li̍p I ê kok-tō͘. Lâng lóng sī beh īng kong-kiông, sîng-kong, sìng-lī kap siōng ióng ê mi̍h lâi kiàn-li̍p ông-kok. Tsóng-sī Tsin-sîn sī hiah ê bô sîng-kong, sit-pāi ê lâng ê Siōng-tè. Thiân-tông tú-tú hō͘ tsiah ê jîn-kan phuà-tshuì ê sìⁿ-miā lâi pó͘-muá. “Siū-siong ê lô͘-uí” (Í-sài-a 42:3) bô tsi̍t ki bô hō͘ Tsú Ki-tok the̍h lâi, hue-ho̍k tī siū tsiok-hok koh bí-hó ê îng-iāu tē-uī ni̍h. I tsiong tsi̍t ê siū thòng-khó͘ pi-siong teh-tshuì ê sìⁿ-miā piàn-tsuè tsi̍t ê uē huat-tshut o-ló siaⁿ-im ê khîm. I tsiong tē-tsiūⁿ sit-pāi, siong-sim ê, thê-sing tsuè thiⁿ-tíng ê îng-kng, sìng-lī.

“Lâi tè Guá, Guá beh hō͘ lí…”
Kóng-tshut Guá ū-la̍t ê uē khí-tāng,
Tsuè lîn-bín ê kang,
Suî-sî pang-tsān ê lâng.

“Lâi tè Guá, Guá beh hō͘ lí…”
Tsuè lí só͘ buē tsuè ê tuā,
Ū sìn, jîn-ài, koh in-tshuā,
Tshin-tshiūⁿ Guá.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com