《台語荒漠甘泉(全羅版)》

| | | 轉寄

"Siōng-tè ê suaⁿ"

listen


Pueh ge̍h tshue-jī (Pueh ge̍h jī ji̍t)

"Guá beh hō͘ guá ê tsìng suaⁿ tsiâⁿ-tsuè lō͘." (Í-sài-a 49:11)

Siōng-tè īng lán ê tsó͘-gāi sîng-tsiū I ê tsí-ì. Lán sing-ua̍h-siōng ū tsi̍t-tsō tsi̍t-tsō ê suaⁿ, tsó͘-gāi lán lîng-sìng ê tsìn-tsîng. Tsiah ê tsó͘-gāi khó-lîng sī lán ê îng-á-uē, lán khùn-lân ê kang-tsok, á-sī "jio̍k-thé tsi̍t ki tshì" (Ṳ Ko-lîm-to 12:7), á-sī lán muí-ji̍t ê si̍p-jī-kè. Lán siông-siông ài kiû Tsú tsiong tse tû-khì, siūⁿ kóng it-tān tû-khì, sing-ua̍h tsiū uē kè liáu khah un-jiû, sûn-kiat kap sìng-kiat.

"Bû-ti ê lâng ah, ... lín ê sim tsáiⁿ-iūⁿ hiah oh sìn ah!" (Lō͘-ka 24:25) Tsiah ê tsó͘-gāi kî-si̍t sī tsō-tsiū lán ê tiâu-kiāⁿ. In khǹg tī lán ê sing-ua̍h tiong, sī sán-sing lán só͘ ji̍t-ji̍t kî-tó tui-kiû ê un-sù kap phín-tsit. Tsuē-tsuē nî lán kî-tó ài jím-nāi, tng lán it-tān tú-tio̍h tshiau-kè lán lîng-li̍k ê khó-giām, lán suah tsáu-khui khì. Tsiong tse tòng-tsuè buē thang khik-ho̍k ê tsó͘-gāi, tsó͘-gāi lán ta̍t kàu bo̍k-piau. Lán siong-sìn tsiong tse tû-khì, beh má-siōng tit-tio̍h kiù kap sìng-lī.

M̄-tio̍h! Lán án-ni tsuè, só͘ tû-khì ê, sī hit-ê hùn-liān lán kiâⁿ ǹg jím-nāi ê li̍k-liōng, tse m̄-sī jím-nāi. Tsí-ū jím-siū kim-ji̍t khuàⁿ sī buē-thang khik-ho̍k ê buâ-liān, tsiah uē tit tio̍h tsin-tsiàⁿ ê jím-nāi.

Ua̍t-tò-tńg, bô koh siám-pī, sūn-ho̍k tī Tsú ê tsí-ì, pîng sìn-sim kiû ū-hūn tī Iâ-so͘ ê jím-nāi, khò I ê li̍k-liōng ìng-hù lí só͘ siū ê khó-giām. Sing-ua̍h ê khùn-khó͘, tsióng-tsióng huân-ló ê sū-bū, bô tsi̍t-hāng m̄-sī īng lâi ta̍t-sîng tsuè-ko ê bo̍k-tik. Ài kì-tit, in sī Siōng-tè ê suaⁿ, sī I uī-tio̍h bó͘ tsi̍t ê guân-in tsiah tsiong suaⁿ khǹg tī hia. Koh lán tsai I tsiông-lâi m̄-bat bô si̍t-hîng I ê ìng-ún.

"Siōng-tè bîng-pi̍k tì-huī ê lō͘, iā tsai i ê só͘-tsāi. In-uī I kàm-tshat kàu tuē ê ki̍k-thâu, piàn-khuàⁿ phó͘-thiⁿ-ē." (Iok-pik-kì 28:23-24) Só͘-í lán lâi kàu suaⁿ-kha, uē tshē tio̍h lán ê lō͘. --- tuì F.B. Meyer só͘ tù ê "Í-sài-a su ê Ki-tok"

Tshì-giām ê bo̍k-tik m̄-nā sī niû lán ê kè-ta̍t, koh sī tsing-ka lán ê kè-ta̍t; tshin-tshiūⁿ po̍k-hong-ú m̄-nā khó-giām siōng-tshiū ê kiông-tō͘, koh sī tsing-ka i ê kiat-si̍t.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com