《台語荒漠甘泉（全羅版）》

"Hô-hâi siann-im"

作者 陳清俊 翻譯

listen











It ge̍h jī-tsa̍p-pueh ji̍t

"In-ūi gúa tsiong Siōng-tè ê jia̍t-sim, ūi-tio̍h lín lâi jia̍t-sim;" (II Ko-lîm-to 11:2)

Ū king-giām ê khîm-tshiú, tùi i ê khîm sī jūa-tsiânn jia̍t-sim ài-hōo, phō i, sioh i, ná tshīn-tshiūnn i ka-kī ê kiánn tsi̍t-iūnn. Tsiong i ê it-sing siau-môo tī khîm ê tíng-bīn. Khùann i án-tsúann teh tiâu khîm. Tsiong khîm lia̍h-tiâu, kín-kín tûann kî-tiong ê tsi̍t tiâu hiân, ànn hīnn jīn-tsin thiann, nā-sī sóo tshut ê siann tsin thòng-khóo, tsin tsha̍k hīnn, sī tsáu-im lah, i tsiū tsiong hit tiâu hiân ê lôo-si ká khah ân, ân kah kah-ná beh tn̄g ê khúan, koh tûann khùann-māi, nā-sī sóo huat ê siann hó thiann, ū tsún, i ê bīn tsiū tshut-hiān tshiò-iông.

Siōng-tè iā sī án-ni teh tiâu-tsìng lí. I thiànn lí, pí khîm-tshiú ài khîm koh-khah tshim. Tī lí sin-tsiūnn sóo thiann-tio̍h ê lóng sī tsha̍k-hīnn ê, I beh īng lí sóo kám-kak thòng-khóo lâi tiâu-tsìng lí ê sim-hiân. Jiân-āu I un-jiû uan-io ànn-hīnn, tûann tsi̍t ē, siông-sè koh thiann, nā-sī thiann-tio̍h lóng sī ùan-giân, tsiū koh tiâu, koh tûann, tio̍h-kip lâi thiann lí ê hûe-ìng, I ê sim ki̍k-kî ǹg-bāng thiann tio̍h lí ê sim kóng, "to̍k-to̍k m̄ sī gúa ê ì-sù, sī lí ê ì-sù tio̍h tsiânn." (Lōo-ka 22:42) Tse sī I sóo ài thiann-tio̍h ê im-ga̍k, tshin-tshiūnn thinn-sài ê kua-siann tsi̍t-iūnn. I ūe bô-thîng teh tiâu lí ê sim-hiân, ti̍t-kàu lí ê lîng khíng khiam-pi, sūn-ho̍k lo̍h-lâi, tshin-tshiūnn Thinn-pē hit tsióng ê sûn-kiat, íng-úan hô-hâi tsi̍t-iūnn.

To-hiân ê khîm ê siann hiah nih khì-phài,
Múi tsi̍t tiâu hiân huat-tshut thiànn koh hô-hâi.
Nā ū tsi̍t-tiâu tn̄g-khì, līng-khì, sún-hāi,
Tsiū piàn tshì-tsha̍k, tiâu khùann-māi.

Kông jia̍t thiànn-thàng kap thòng-khóo, kiann sit-lo̍h sann liân,
The̍h tio̍h ông-bō ê tshiú, sī thong-kè si̍p-jī-kè ê khóo-liān.
Nā bô tsing-tsiàn, pí-sài, tsiū bô sìng-lī hián-hiān.
King-kè lô-khóo, tsiah tsai an-hioh, pîng-tsīng hô-siān.

Peh kûan-suann, kè po̍k-hong, tsiah ūe him-sióng,
Thinn tshing-khì, tshàn-lān, tē tshinn-tshùi, bí-siōng.
Bô hûn, kong-hui tshut ji̍t thinn,
Tîn-ai, ù-jiám piàn àm-khì.

Sáng ài súan-ti̍k, nn̄g-hāng lóng beh, á lóng búai,
Tsai-lān ê thòng-khóo, kap siōng un-jiû ê khin-khùai,
Bô hui-siông ê thòng-khóo, thài ūe ū hui-siông ê hok-hūn,
Tūn ê sim-hiân būe huat-tshut hô ê siann-ūn.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw