《台語荒漠甘泉(全羅版)》

| | | 轉寄

"Bô khò ba̍k-tsiu khuàⁿ ê sìn-sim"

listen


Pueh ge̍h jī-saⁿ (Pueh ge̍h jī-tsa̍p-saⁿ ji̍t)

"Tuì sìn, A-pik-la̍h-hán siū-tiàu ê sî, tsiū sūn bīng-līng tshut-khì, … I tshut-khì, m̄ tsai beh khì tá-lo̍h." (Hi-pik-lâi 11:8)

Tse sī bô īng ba̍k-tsiu khuàⁿ ê sìn-sim. Ba̍k-tsiu só͘ khuàⁿ ê m̄-sī sìn-sim sī thui-lí. Guá ū tsi̍t-pái tsē-tsûn huâiⁿ-kè Tuā-se-iûⁿ, kuan-tshat tio̍h sìn-sim ê guân-tsik. Guá bô khuàⁿ-tio̍h hái-bīn ū uē tshut sím-mi̍h lō͘-kìng, iā bô khuàⁿ-tio̍h huāⁿ á-sī lio̍k-tē, tsóng-sī muí-ji̍t tī hái-tô͘-sik piau-tshut tsûn ê tsìn-hîng só͘-tsāi, ná tshin-tshiūⁿ hái-bīn uē tsi̍t tiâu pe̍h-suàⁿ, tsûn tsiàu án-ni sái. Kàu Tuā-se-iûⁿ ê hit-pîng huāⁿ, guán iā tsai hit ê sī sím-mi̍h só͘-tsāi. Tsi̍t tiám-á tsing-tsha mā bô, ná tshin-tshiūⁿ tī saⁿ-tshing lí guā ê só͘-tsāi tsiū khuàⁿ-tio̍h tuì-pîng huāⁿ tsi̍t-iūⁿ.

Kiâⁿ-tsûn tsáiⁿ-iūⁿ uē tsiah-nih tsìng-khak kè-uē tshut-lâi neh? In-uī tsûn-tiúⁿ muí-ji̍t theh gî-khì kuan-tshat thian-siōng, tuì ji̍t-thâu ê uī-tì lâi kuat-tīng kiâⁿ ê lō͘-suàⁿ, i kiâⁿ-tsûn sī īng thiⁿ-tíng ê kng, m̄-sī īng tē-bīn ê kng lâi tshuā lō͘.

Tsin-tsiàⁿ ê sìn-sim iā hiòng tíng-bīn kuan-khuàⁿ lâi kiâⁿ-tsuè, sī īng Siōng-tè ê tuā thài-iông kng, i bô khuàⁿ hái-huāⁿ-suàⁿ, bô khuàⁿ tē-bīn ê ting-thah, á-sī iân-lō͘ ê sió-lō͘, sió-tó. Sìn-sim ê kha-pō͘ óng-óng tshuā ǹg tsuân-jiân bô pá-ak sīm-tsì o͘-àm kap tsai-lān tiong. Tsóng-sī Siōng-tè uē khui-lō͘, siông-siông hō͘ puàⁿ-mî siōng o͘-àm ê sî-tsūn piàn-tsuè lê-bîng hiah-nih kng-liōng.

Hō͘ lán kim-ji̍t tsiū khí-phâng, sái-tsûn, sui-jiân m̄-tsai, iā khuàⁿ-bô tsiân-tô͘, tān-sī thang uân-tsuân lâi sìn-khò. --- tuì “Tī tē ná tī thiⁿ”

Tsin-tsuē lâng tī khai-sí í-tsîng, tsiū beh ài khuàⁿ tio̍h i huat-tián ê tsuân-pō͘. Siūⁿ khuàⁿ māi, lán nā uē khuàⁿ tio̍h tuì thâu kàu bé ê tsuân-pō͘ lō͘-thîng, lán án-tsuáⁿ uē huat-hui ki-tok-tô͘ ê un-sù neh? Sìn-sim, hi-bōng, thiàⁿ-thàng buē tshin-tshiūⁿ phông-kó kàu si̍k tsū-jiân tuì tshiū-tíng la̍k lo̍h-lâi tsi̍t-iūⁿ. Ài-kì-tit, sìng-king ê thâu tsi̍t-tsat, “Guân-khí-thâu” só͘ tsiap lo̍h-khì ê jī sī “Siōng-tè”. Tse sī lán īng sìn-sim lâi tsūn só-sî khai-tōng Tsú ê huat-tiān-tshiúⁿ ê mn̂g ê thâu tsi̍t pō͘. Bô m̄-tio̍h, Siōng-tè pang-tsān tsū-kí ló-li̍k, tsū-kí pang-tsān ê lâng, tsóng-sī Siōng-tè iā pang-tsān hiah ê bû-tsō͘ nńg-tsiáⁿ ê lâng. Só͘-í bô-lūn khuân-kíng jû-hô, muí-pái lóng thang uá-khò I.

Tán-thāi Siōng-tè tshuā lán kiâⁿ kàu lú-tô͘ ê tsiong-tiám pí lán īng kha ka-kī kiâⁿ ke kín tsin-tsuē.

I í-king tshut-līng ài lán hîng-tōng, lán iáu teh tiû-tû sím-mi̍h? M̄-thang hō͘ ki-huē tsi̍t-pái koh tsi̍t-pái sit-khì ah.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com