《台語荒漠甘泉（全羅版）》

"Tsóo-gāi"

作者 陳清俊 翻譯

listen












Jī ge̍h sì ji̍t

"Iâ-hô-hua beh hōo lí tsiūnn kàu tūe-tsiūnn kûainn ê sóo-tsāi;" (Í-sài-a 58:14)

Khì-thé tōng-li̍k-ha̍k, ū tsi̍t ê ki-pún tīng-lu̍t, bu̍t-thé nā-sī tsìnn hong pe, ūe kín-kín hiòng siōng pe kûan. Hui-ki nn̄g ê si̍t nā tsìnn hong, tsiū tsing-ka hui-hîng ê kûan-tōo. Tùi tó-ūi tit tsit ê pó-kùi ê king-giām ah? Khùann tsiáu-á teh pe lâi o̍h. Tsiáu nā tsū-iû tsū-tsāi teh pe, sī sūn-tio̍h hong-sè, nā tú-tio̍h gûi-hiám ê sî, tsiū tńg-se̍h tsìnn-hong pe, tsiū pe kûan khí-khì.

Jîn-sing ê gi̍k-kíng sī Thinn-pē sóo tsún-pī ê hong. Ū sî tùi bīn tshe lâi, kiông kah tòng bûe tiâu. Tsit ê hong-thai sī I sóo tsún-pī, ài lán thê-sing lán ê tsân-tshù, ǹg I ê thian-kok hia tsìn.

Lí ūe kì-tit ju̍ah-thinn koh ju̍ah, koh hip, hip kah khùi lóng tshúan būe hó-sè. Nā ū tsi̍t phìnn oo-hûn lâi, khí tūa hong, lo̍h tsi̍t tsūn tūa hōo, lûi-kong tân bô thîng, sih-ná sih-sih-kiò. Hong-hōo āu khong-khì piàn tshing-sóng, ū sin ê u̍ah-khì, tsit ê sè-kài thu̍t-jiân kái-piàn tsùe sin ê iūnn.

Jîn-sing ê tso-gū piàn-hùa iā sī án-ni. Sìnn-miā tiong tshut-hiān po̍k-hong-ú, khûan-kíng sán-sing kái-piàn, tit-tio̍h kiat-tsīng, tshiong-múa tsúan-ki, ná tshin-tshiūnn thian-tông kàng-lîm tī tē-tsiūnn.

Tú-tio̍h tsóo-gāi, hōo lán ūe tshiùnn-kua huann-hí. Hong tshe kè khòng-khuah ê hái tíng, pīng būe huat-tshut siann-im; nā tshe kè tshiū-ki, tshe kè khîm ê si-hiân ê sî, tsiū huat-tshut siann, sī bí-lē ū la̍t ê siann. Tng lí tsū-iû ê lîng-hûn sàu-kè jîn-sing ê tsóo-gāi, tsîng-bīn ū tshiū-nâ hiah tsūe ê khóo-thàng, á-sī sùe-sùe ê iu-lū kap hûan-ló, tùi-hia kè lóng beh ū siann lâi o-ló, lâi gîm-si.

Tshin-tshiūnn tsiáu-á teh pe teh kiò,
Tī sùe-sùe ê tshiū-ki hio̍h,
I iáu teh tshiùnn, sui-bóng tshiū-ki tūa iô
In-ūi i khò nn̄g-ki si̍t pó-sioh.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw