《台語荒漠甘泉(全羅版)》

| | | 轉寄

"Tan-to̍k"

listen


Tsa̍p-jī ge̍h jī-tsa̍p (Tsa̍p-jī ge̍h jī-tsa̍p ji̍t)

"tsóng-sī guá m̄ sī ka-kī tī-teh, in-uī Pē kap guá tī-teh." (Iok-hān 16:32)

Bô pit-iàu kóng, uī-tio̍h sìn-gióng ê si̍t-hiān tio̍h tsuè tsin tuā ê hi-sing. Put-kò tio̍h tuì bó͘ tsióng lâng kap sū keh-lī, ná tshin-tshiūⁿ ū kám-kak kî-kuài ê sit-lo̍h kap ko͘-tuaⁿ. Tsi̍t ê lâng uē tshin-tshiūⁿ ing pe kuâiⁿ-kuâiⁿ, tuà tī Siōng-tè ê îng-kng ē, ing-kai uē muá-ì tī tsi̍t tsióng khak ko͘-to̍k ê sing-ua̍h.

Tsiáu-luī tiong, tuā ing sī siōng ko͘-to̍k ê tsiáu, lán m̄-bat khuàⁿ tio̍h ing kui-kûn teh pe, iā tsin lân-tit khuàⁿ tio̍h nn̄g-tsiah ing-tsiáu tsuè-hé tī khong-tiong. Tsi̍t ê hōng-hiàn sìⁿ-miā hō͘ Siōng-tè ê lâng, lia̍h jīn-bat Siōng-tè, hióng-siū kap Siōng-tè kau-óng tsuè khuài-lo̍k, sī bô kuán iân-lō͘ uē sit-khì juā-tsuē sè-kan ê iú-gî.

Siōng-tè tshē-kiû tshin-tshiūⁿ ing ê hit tsióng lâng. Lâng nā buē-hiáu tan-to̍k kap Siōng-tè tâng-kiâⁿ, tsiū tī i lîng-sìng sing-ua̍h buē-thang tshiong-hun jīn-bat Siōng-tè siōng-hó siōng-suí ê mi̍h. Lán khuàⁿ A-pik-la̍h-hán tan-to̍k tuà "Ka-lâm tuē, Lô-tik khiā-khí Pîⁿ-iûⁿ tsiah ê siâⁿ, suá i ê pò͘-pîⁿ kàu Só͘-to-má." (Tshòng-sè-kì 13:12) Mô͘-se sui-jiân ū Ai-ki̍p só͘ ū ê tì-sik, iáu tio̍h tan-to̍k tī sua-bô͘ kap Tsú tông-tsāi sì-tsa̍p nî. Pó-lô sui-jiân ū tsuē-tsuē Hi-lia̍p ê tì-sik, koh tsuè "Ka-má-lia̍t ê ha̍k-sing," (Sù-tô͘ hîng-tuān 22:3) tng tú tio̍h Iâ-so͘ liáu-āu, tsiū "to̍k-to̍k khì A-lat-pik" (Ka-lia̍p-thài 1:17) sing-ua̍h tī sua-bô͘-tē tan-to̍k ǹg Siōng-tè ha̍k-si̍p.

Guān lán hō͘ Siōng-tè ko͘-li̍p lán, m̄-sī tshin-tshiūⁿ siu-tō-īⁿ hit-tsióng ê keh-lī, sī tī keh-lī king-giām tiong Tsú tī lán lāi-bīn sán-sing tsi̍t tsióng sing-ua̍h kap sìn-sim ê to̍k-li̍p, sim-lāi bô koh uá-khò pa̍t-lâng ê pang-tsān, kî-tó sìn-sim ê kó͘-lē kap tsiàu-kò͘. Pa̍t-lâng ê pang-tsān kap kó͘-lē sī pit-iàu, tī ki-tok-tô͘ ê sîng-tióng sī tsin tiōng-iàu, put-kò tī bó͘ tsi̍t ê sî-tsūn iā uē hóng-gāi tio̍h sìn-sim ê sîng-tióng.

Siōng-tè tsai tsáiⁿ-iūⁿ kái-piàn lán ê khuân-kíng hō͘ lán ko͘-to̍k tsi̍t lâng lâi puê-ióng lán. Lán it-tān sūn-ho̍k Siōng-tè, tit-tio̍h tsit tsióng ko͘-to̍k ê king-li̍k, lán tsiū bô koh uá-khò lán tsiu-uî ê lâng, sui-jiân lán iáu-kú tshin-tshiūⁿ kè-khì hiah nih thiàⁿ in. Jiân-āu lán tsiū jīn-bat tio̍h, Siōng-tè tī lán lāi-bīn tsuè liáu tsi̍t kiāⁿ sin ê sū, lán sim-lîng ê si̍t-kó͘ í-king o̍h uē-hiáu pe ǹg khong-tiong lah.

Lán pit-su ū ióng-khì káⁿ tan-to̍k sing-ua̍h. Tshin-tshiūⁿ Ngá-kok pit-su tī tan-to̍k tsi̍t lâng, hō͘ Siōng-tè ê sù-tsiá thang tī i ê hīⁿ-khang piⁿ suè siaⁿ kóng, "Lí ê miâ bô beh koh kiò Ngá-kok, beh kiò-tsuè Í-sik-lia̍t." (Tshòng-sè-kì 32:28) Tshin-tshiūⁿ Tān-í-lí tan-to̍k tsi̍t lâng, tsiah khuàⁿ-kìⁿ thiⁿ-tíng lâi ê īⁿ-siōng; Iok-hān siū hòng-tio̍k kàu Pua̍t-mô͘ hái-tó, tsiah uē tit-tio̍h hâm kì-lio̍k "Iâ-so͘ Ki-tok ê khé-sī, tsiū-sī Siōng-tè só͘ hō͘ i." (Khé-sī-lio̍k 1:1)

I uī tio̍h lán "ka-kī tsi̍t-ê ta̍h tsiú-khut." (Í-sài-a 63:3) Só͘-í lán ū tsún-pī tsi̍t ê sî-kan sī "îng-iāu Siōng-tè tan-to̍k tsi̍t lâng" (tsham-khó Iok-hān 17:1) á-sī uē hō͘ I sit-bāng?

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com