《台語荒漠甘泉（全羅版）》

"Hiòng tsîng kiânn, koh kiânn, koh kiânn"

作者 陳清俊 翻譯

listen










Jī ge̍h tsa̍p-it ji̍t

"Kàu kng phóo-thinn-ē ê Tsú Iâ-hô-hua ê iok-kūi ê tsè-si, in ê kha khiā tī Iok-tàn hô ê tsúi, Iok-tàn hô ê tsúi ... beh tsia̍t-tn̄g," (Iok-su-a 3:13)

Í-sik-lia̍t lâng bô thîng tī iânn-pâng, tán kàu Iok-tàn hô ê tsúi tn̄g, tsiah tshut-huat. In pîng sìn-sim hiòng tsîng kiânn. (I Ko-lîm-to 5:7) In thiah tiùnn-pâng, khúan pau-ho̍k-á, pâi tūi-ngóo, bô tán tsúi ta, tsiū kiânn ji̍p hô ni̍h.

Ká-sú in kiânn kàu hô pinn, thîng lo̍h-lâi, tán hô-tsúi tn̄g tsiah beh ji̍p hô, tsiū tán mā bô tshái-kang. Tāi-tsì būe sîng. In-ūi Thinn-pē sóo kóng ê sī "tsiong kha ta̍h ji̍p tsúi, tsúi tsiah beh tūan-tsu̍at."

Lán ha̍k-si̍p I ê ūe, tsiàu I ê ūe hiòng-tsîng ti̍t-ti̍t kiânn, sīm-tsì tsîng-bīn khùann bô lōo lah. Ūi-hô lán tú-tio̍h khùn-lân ê sî, ūe thîng lo̍h-lâi, tsiū-sī ài tán lâng tsiong khùn-lân, tsóo-gāi tû-khì. Lán liân tshì beh kiânn-kè tsóo-gāi, kái-kuat khùn-lân, iā lóng bô.

Kî-si̍t, pîng sìn-sim hiòng-tsîng kiânn, lōo tsū-jiân ūe ūi lán lâi khui. Tān-sī lán tú-tio̍h tsóo-gāi, thîng lo̍h-lâi, teh thìng-hāu lâng súa khui tsóo-gāi. Si̍t-tsāi, lán ing-kai hiòng tsîng kiânn, ū tsóo-gāi ná tshin-tshiūnn bô tú-tio̍h tsóo-gāi tsi̍t-iūnn. --- tùi "Àm-su" (Evinging Thooghts)

Ko-lûn-pòo (Tsristopher Columbus) tī bīn-tùi ki̍k khùn-lân ê sî, ūe kian-tīng put-gî, ta̍t-tio̍h lán ê ha̍k-si̍p:

Sái kè A-jó-lí
Bô koh ū Bú-sian tshinn,
Tē, hūann bô khùann-kìnn,
Tsí ū hái liân thinn.
Hù-siú kóng, sī kî-tó ê sî,
Khùann, liân tshinn iā lóng bô khì
Ióng-kám ê tsûn-tiúnn, gúa beh kóng sím-mi̍h?
Á-tio̍h mn̄g, kóng, “Hiòng tsîng sái khì, sái-khì, koh sái-khì”.

Ē-kha-tshiú tsi̍t-ji̍t tsi̍t-ji̍t ná húan-khòng,
In ê bīn-sik piàn pháinn, thé-la̍t bô koh ióng-tsòng,
Ióng ê Hù-siú siūnn tshù ni̍h ê tāi-tsiòng,
Pha̍k kah oo-oo jiâu-jiâu ê bīn-iông,
Ióng-kám ê tsûn-tiúnn, gúa beh án-tsúann kóng,
Kàu thinn kng, iáu sī tsi̍t-phìnn hái-iông,
M̄-bián mn̄g, kàu-sî tshut thài-iông,
Hiòng-tsîng sái-khì, sái-khì, sái-khì, siāng hong-hiòng.

Sái koh sái, Hù-siú mn̄g,
Huat-kông ê hái, kin-mî beh pìnn-sńg,
Huan tshùi-tûn, àm-tiong teh phah-sǹg,
Khui tūa tshùi, tsi̍t tshùi thun ji̍p tōo-tn̂g.
Ióng-kám ê tsûn-tiúnn, kóng tsi̍t-kù hó ūe khǹg,
Ǹg-bāng bô khì, lán beh án-tsúann tńg?
I ê ūe ná kiàm lāi-sih-sih,
Hiòng tsîng sái khì, sái khì, koh sái-khì.

Bīn-sik pe̍h koh ià-siān, i khiā tī kah-pán tíng,
Ǹg oo-àm khùann-khì, Ah! oo-àm-mî ê hân-líng,
Siōng oo-àm ê mî, khùann-tio̍h sùe-sùe kng-ting,
Ū kng, ū kng, ū kng, ū kng-ting.
Ná lâi ná kng, ū tsi̍t tui kng,
Tùa lâi sin sî-tāi ê sū-kng,
I tshē tio̍h sin sè-kài, khai-sí sin sè-kí,
Hōo sè-kài tsi̍t-ê kà-sī: "Hiòng-tsîng sái-khì, koh sái-khì."
--- Juaquin Miller

Hiòng tsîng kiânn ê sìn-sim tit sìng-lī.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw