《台語荒漠甘泉（全羅版）》

"Sìn tsiū tit-tio̍h"

作者 陳清俊 翻譯

listen







Jī ge̍h tsa̍p-pueh ji̍t

"Kìnn-nā lín sóo kî-tó lâi kiû ê, tio̍h sìn sī í-king tit-tio̍h, tsiū beh kā lín tsiânn." (Má-khó 11:24)

Tng gúa ê sùe-hàn kiánn beh tsa̍p-hè ê sî, i ê a-má tap-ìng i tī Sìng-tàn-tsiat ê sî, beh sàng i tsi̍t pún tsi̍p-iû-phōo tsùe lé-mi̍h. Tsóng-sī sìng-tàn-tsiat kè-liáu, tsi̍p-iû-phōo iáu būe kàu, iā bô tùi a-má hia lâi ê siau-sit. Liáu-āu iā bô lâng thê-khí tsit ê sū. Ū tsi̍t ji̍t, i ê sió-pîng-iú lâi tshù-lāi beh khùann i tī SSing3-tàn-tsiat ū tit-tio̍h sím-mi̍h lé-mi̍h ê sî, i tsi̍t-kiānn tsi̍t-kiānn lia̍t tshut-lâi, siōng-bé koh ka tsi̍t kù ūe, "iáu ū a-má sàng gúa ê tsi̍p-iû-phōo". Gúa thiann-liáu tio̍h tsi̍t kiann.

Í-āu, tsit ê gín-ná iā án-ni kóng kúi-nā pái. Gúa jím-būe-tiâu tsiū kiò i lâi mn̄g, "Jio-jí (George), lí bô siu-tio̍h a-má ê tsi̍p-iû-phōo, ūi-hô lí kóng ū tsi̍p-iû-phōo ah?"

I khùann gúa ê bīn tsi̍t-ē, kám-kak gúa sóo mn̄g ê sī ke-ê, tsiū hûe-tap kóng, "Lí ài-tsai ūi-sím-mih? A-má sóo kóng ê ūe lóng sī sǹg-siàu." I ê sìn-sim bô in-ūi gúa mn̄g lâi iô-tōng.

Koh kè tsi̍t kò gu̍eh, bô koh thê-khí tsi̍p-iû-phōo ê sū. Ū tsi̍t-kang, tsi̍t-bīn sī beh tsai i ê sìn-sim jūa-tūa, tsi̍t-bīn sī beh tsai tsi̍p-iû-phōo sī-m̄-sī í-king siu-tio̍h, gúa kóng, "Jio-jí, a-má bô-tiānn-tio̍h būe-kì-tit i tap-ìng lí ê sū."

I tsin kian-tīng hûe-tap kóng, "Oh, būe lah, ma-ma, a-má it-tīng bô būe-kì-tit."

Gúa khùann i khó-ài ê bīn, tsi̍t-tiám-á to bô giâu-gî, tsin jīn-tsin ê piáu-tsîng. I iā siūnn gúa sóo kóng ê ūe iā sī ū tsi̍t-tiám-á tō-lí. Bô-kú, i tsin huann-hí lâi tùi gúa kóng, "Lí khùann, gúa siá phue hōo a-má, hó-m̄-hó, to-siā i ê tsi̍p-iû-phōo?"

Gúa kóng, "Lí thang tshì khùann-māi." Tsit-sî, gúa khai-sí o̍h tio̍h ki̍k hong-hù lîng-sìng ê kong-khò.

Bô kúi hun-tsing, phue siá hó, Jio-jí tsi̍t-bīn khoo su̍h-á, tùi a-má tsiok ū sìn-sim ê khúan, tsi̍t-bīn kiânn khì iû-kio̍k kià phue. Bô-kú, a-má ê hûe-phue lâi lah. Lāi-bīn kóng:

Tshin-ài ê sun-á:
Gúa bô būe-kì-tit tap-ìng lí ê tsi̍p-iû-phōo. Tī gúan tsit sóo-tsāi, gúa tshē bô lí sóo ài ê hit-khúan, sóo-í khì Niú-iok (New York) tīng. Bô phah-sǹg Sìng-tàn-tsiat kè-liáu tsiah kià kàu. Phah-khui tsi̍t ē khùann, pīng bô lí-sióng. Gúa tsiū koh khì tīng līng-gūa tsi̍t pún. Kàu tann iáu būe siu tio̍h. Gúa kuat-tīng kià sann-tsa̍p khoo hōo lí, lí thang tī lín hia búe sóo kah-ì ê tsi̍t-pún.
Thiànn lí ê a-má.

Jio-jí tha̍k tio̍h tsit tiunn phue, hit-ê huann-hí, ná tshin-tshiūnn sio-tsiàn phah-iânn ê khúan-sit. Tùi bô tsi̍t-tiám-á giâu-gî ê sim-lîng sóo kóng-tshut ê ūe, "Ma-ma, Gúa m̄-sī kā lí kóng, a-má kóng ê ūe lóng sǹg-siàu." Jio-jí "tī bô thang ǹg-bāng ê tiong-kan, tùi ǹg-bāng lâi sìn," (Lô-má 4:18). I tshim-sìn tsi̍p-iû-phōo it-tīng ūe lâi, tsāi i put-tūan siong-sìn ê sî, a-má iā teh tsùe, sî tsi̍t ē kàu, sìn-sim tsiū piàn tsiânn sī ba̍k-tsiu tsîng sóo khùann tio̍h ê sū-si̍t, tsin-si̍t.

Lâng ê jio̍k-tiám sī m̄-kánn koh m̄ sìn-khò Siōng-tè ê ìng-ún lâi ta̍h tshut thâu tsi̍t pōo. Tsú Iâ-soo tùi To-má kap i í-āu tsūe-tsūe ê hûai-gî-tsiá kóng, "hiah ê bô khùann-kìnn lâi sìn ê lâng, ū hok-khì." (Iok-hān hok-im 20:29) --- Lông-tsū (Roonds) hu-jîn

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw