《台語荒漠甘泉（全羅版）》

 | | | 轉寄

"Sìn-sim ê kiâⁿ-tsuè"

作者 陳清俊 翻譯 2010.03.28

listen

Saⁿ ge̍h jī-pueh (Saⁿ ge̍h jī-tsa̍p-pueh ji̍t)

"Kàu kng phó͘-thiⁿ-ē ê Tsú Iâ-hô-hua ê iok-kuī ê tsè-si, in ê kha khiā tī Iok-tàn hô ê tsuí, Iok-tàn hô ê tsuí, tsiū-sī tuì tíng-bīn lâu lo̍h-lâi ê tsuí, beh tsia̍t-tn̄g, khiā khí-lâi kui-tui." (Iok-su-a 3:13)

Ta̍k ê lâng lóng khim-phuè hiah ê ióng-kám ê Lī-bī lâng! In kng iok-kuī kàu tsuí-ni̍h, hô tsuí sī ài kàu "kha ta̍h ji̍p tsuí" (Iok-su-a 3:15) tsiah pun-khui. Siōng-tè ê ìng-ún tsí-sī án-ni. Siōng-tè só͘ khuàⁿ-tiōng ê sìn-sim, tsiū-sī kian-tīng ê sìn-sim, tsí khuàⁿ I ê ìng-ún, kap gióng-bōng I ê sìn-sim. Lán thang sióng-siōng, kim-ji̍t ê pông-kuan-tsiá (khiā tī piⁿ-á khuàⁿ ê lâng) beh tuì tng-sî Siōng-tè ê sìng-tô͘, jû-hô kng iok-kuī hiòng tsîng kiâⁿ ê sî, kóng, "Guán íng bô ài bō͘ hit ê guî-hiám. Iok-kuī uē hō͘ tsuí tshiong-khì oh." Tsóng-sī hiah ê tsè-si tī ta-tē tiām-tiām khiā teh. (Iok-su-a 3:17) Lán bô tit hut-lio̍k tsit kiāⁿ sū, tsiū-sī lán ê sìn uē pang-tsān Pē Siōng-tè tsip-hîng I ê kè-uē. Lán ài guān-ì pang-tsān Tsú.

Iok-kuī nn̄g pîng ū kǹg, tsè-si tsiong in kng tī king-kah tíng. Siōng-tè ê iok-kuī pīng buē ka-kī tín-tāng, sī ài lâng lâi kng ê. Siōng-tè sī kiàn-tio̍k-su, lâng sī thia̍p tsng ê lâng, sī kang-lâng. Lâng ê sìn-sim thang pang-tsān Siōng-tè, hō͘ sai-tshuì ha̍p-ha̍p, uē siau-bia̍t ū tuā phò-huāi ê hé. Sìn-sim kìng-tiōng Siōng-tè, Siōng-tè iā tsun-tiōng sìn-sim.

Ah, lán su-iàu tsit tsióng ê ióng-kám hiòng tsîng ê sìn-sim, hō͘ Siōng-tè tī I só͘ tiāⁿ-tio̍h ê sî si̍t-hiān I ê ìng-ún. Lán tâng-tsuê tsuè Lī-bī lâng ê, hō͘ lán kng khí lán ê tāng-tàⁿ, tāng-kuī, m̄-thang tshin-tshiūⁿ kng kuaⁿ-tshâ hit khuán ê pi-siong; ài-tsai, lán só͘ kng ê sī íng-ua̍h tsin Sîn ê iok-kuī, thang tuā siaⁿ tshiùⁿ kua, hiòng tuā tsuí tsìn-tsîng kiâⁿ! --- Thomas Tsampness

Tī sin-iok kàu-huē sî-tāi ê tsi̍t ê ti̍k-pia̍t ê piau-kì tsiū sī "Tuā-táⁿ" thè Siōng-tè tsuè tuā-sū. Ǹg-bāng Siōng-tè beh sîng-tsiū tuā-sū ê sìn-sim, ū tsi̍t ê tuā koh tiōng-iàu ê in-sò͘, tsiū-sī sîn-sìng ê tuā-táⁿ kap bô kiaⁿ-hiâⁿ. Thang ǹg Siōng-tè thó khah tsuē. Si̍t-tsāi kóng, "thó khah tsuē" pí "thó khah tsió" sī khah iông-ī. Pîng sìn-sim tuā-táⁿ khiā tsāi, pí sió-sim khiā-tī huāⁿ-piⁿ khah iông-ī.

Tshong-bîng ê tsuí-siú pîng sìn-sim, tsiong tsûn khui kàu tsuí tshim ê só͘-tsāi. Beh huat-kiàn, tsāi Siōng-tè bô ū oh-tsuè ê sū. (Lō͘-ka 18:27). "Ū sìn ê lâng, ta̍k hāng lóng uē" (Má-khó 9:23)

Kin-á-ji̍t, hō͘ lán lâi thè Siōng-tè tsuè uí-tāi ê sū, tsiap-siū I só͘ sù ê sìn-sim, siong-sìn uē tsuè uí-tāi ê sū, khò I ê li̍k-liōng lâi uân-sîng. – tuì “Tī tē ná tī thiⁿ”

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com