《台語荒漠甘泉（全羅版）》

 | | | 轉寄

"Àm tiong ê sìn-sit tī kng-bîng tiong suan-iông"

作者 陳清俊 翻譯 2010.04.11

listen


Sì ge̍h tsa̍p-it (Sì ge̍h tsa̍p-it ji̍t)

"Guá tī àm-tiong kā lín kóng ê, lín tio̍h tī kng-bîng ê só͘-tsāi kóng-tshut; àⁿ tī hī-khang kā lín kóng ê, tio̍h tī tshù-tíng thuân i." (Má-thài 10:27)

Lán ê Tsú siông-siông tī àm-tiong kā lán kóng-uē. Khó-lîng sī tng sit-khì tshin-lâng tan-to̍k tī àm-àm ê tshù-lāi, iā khó-lîng sī tī ko͘-to̍k, tshiⁿ-tshám ê sî, iā ū-sî tī phuà-pīⁿ buē thang khí-lâi, bô kap lâng tsiap-tshiok ê sî, iā ū-sî sī tī pi-siong sit-bāng ê o͘-àm-mî.

Tī hia, I tsiong I ê uí-tāi, kî-biāu, íng-ua̍h ê ò-pì kā lán kóng. Lán hō͘ sè-kan ê sū-bū bê kah bū-bū ê ba̍k-tsiu, I hō͘ lán khuàⁿ ǹg thiⁿ ê tshàn-lān. Lán ê hīⁿ-khang iā beh thiaⁿ tio̍h, siông-siông hō͘ sè-kan tsháu-nāu só͘ khàm I ê siaⁿ-im, khó-lîng sī tī hī-khang piⁿ suè-suè ê uē.

Put-kò, tsiah ê khé-sī iā tuà lâi tsik-jīm: "Guá tī àm-tiong kā lín kóng ê, lín tio̍h tī kng-bîng ê só͘-tsāi kóng-tshut; ... , tio̍h tī tshù-tíng thuân i." Lán m̄-sī íng-uán thîng tī àm-sik, lâu tī àm-tiong, bô-kú, lán beh siū ho͘-tiàu kàu jîn-sing ê suan-huâ kap po̍k-hong-hō͘ tiong ê só͘-tsāi. Hit-sî lán tio̍h tsiong lán só͘ o̍h tio̍h ê kóng tshut-lâi, suan-iông tshut-lâi.

Án-ni siū-khó͘ ū sin ê ì-gī. Siū-khó͘ siōng pi-ai ê pō͘-hūn tiāⁿ-tiāⁿ sī ín-khí bô lō͘-īng ê kám-kak. Lán buē-bián uē siūⁿ-tio̍h "Guá tsiah-nih bô lō͘-īng, guá só͘ tsuè ê ū sím-mi̍h lō͘-īng? Guá lîng-hûn ê kuì-tiōng ê hiuⁿ-iû (Tsham-khó Iok-hān 12:3) uī-sím-mih lōng-huì tiāu?" Tsiah ê lóng sī siū-khó͘-tsiá ê ho͘-kiò, tān-sī Pē Siōng-tè tī tse it-tshè lóng ū I ê tsí-ì. I beh tsiong i ê tsú-bîn tuà-kàu kap I khah kuâiⁿ kau-óng ê tsân-tshù, hō͘ in uē thiaⁿ-tio̍h I ê kóng-uē, "bīn tuì bīn kóng-uē, tshin-tshiūⁿ lâng kap pîng-iú kóng-uē tsi̍t-puaⁿ-iūⁿ." (Tshut-ai-ki̍p-kì 33:11) Jiân-āu lo̍h-suaⁿ tuì lâng suan-iông I ê sìn-sit. Mô͘-se tī suaⁿ-tíng sì-tsa̍p ji̍t kiám sī lōng-huì tiāu mah? Í-lī-a tī Hô-lia̍t suaⁿ só͘ kè ê ji̍t-tsí á-sī Pó-lô tī A-la̍h-pik sua-bô͘ só͘ kè ê nî-ji̍t iā kiám sī lōng-huì ê mah?

Kè sìn-sim ê sing-ua̍h sī bô khah té ê lō͘ thang kiâⁿ, sìn-sim ê sing-ua̍h sī sìng-kiat, sìng-lī ê it-sing só͘ tsua̍t-tuì su-iàu ê. Lán pit-su ū tsi̍t-tuāⁿ tan-to̍k kap Siōng-tè tī-teh ê tshim-su sî-kan. Lán ê lîng-hûn su-iàu kap I tsuè-hé tī suaⁿ-tíng á-sī tuā tsio̍h-thâu ê im-iáⁿ tiong kám-siū tio̍h an-lîng ê sî-tsūn. Lán su-iàu tī o͘-àm jia-khàm tuā tē it-tshè, bān-mi̍h lóng tsīng-tsīng, tshiⁿ kng teh tsiò kè mî. Tse hō͘ lán ê gán-kong khuàⁿ khah khuah, hián-tshut bû-hān kap íng-uán. Tsiah ê tsióng-tsióng sū lóng sī tshin-tshiūⁿ tsia̍h-mi̍h tuì lán ê sin-thé só͘ buē thang khiàm-kheh.

Lán nā ū tsit khuán kap Siōng-tè tông-tsāi ê kám-siū, lán ê lîng-hûn tsiū íng-uán buē tōng-iâu, lán beh tshin-tshiūⁿ si-phian só͘ kóng ê "Iâ-hô-hua ah! Lí sī kūn-kūn." (Si-phian 119:151) --- F.B. Meyer

Ū ê lâng ê sim tshin-tshiūⁿ iā-lâi-hiong, tī jîn-sing im-àm, àm-mî ê sî khui kah ti̍k-pia̍t ê suí.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com