《台語荒漠甘泉(全羅版)》

| | | 轉寄

"Koh-ua̍h"

listen

Sì ge̍h jī-gō͘ (Sì ge̍h jī-tsa̍p-gō͘ ji̍t)

"Ū Bua̍t-tāi-lia̍p ê Má-lī-a, kap pa̍t ê Má-lī-a tī hia, tsē tī bōng ê tuì-bīn." (Má-thài 27:61)

Ah, lâng tī pi-ai ê sî, tsin oh khì khuàⁿ tshing-tshó, oh bîng-pi̍k, oh khì liáu-kái! Pi-siong hō͘ lâng thâu-khak khang-khang, bô guān-ì khì o̍h, khì bîng-pi̍k tāi-tsì. Pi-ai ê hū-lú "tsē tī bōng ê tuì-bīn," in kiám uē khuàⁿ-tio̍h nn̄g tshing nî āu ê sìng-lī sîng-kó mah? Tû liáu tshē bô Ki-tok, in kiám ū khuàⁿ-tio̍h sím-mi̍h mah?

Lí guá só͘ tsai ê Ki-tok tsiū-sī tuì in só͘ sit-khì ê. Tuì in ê pi-siong, ū tsin-tsuē ai-thòng siong-sim ê lâng khuàⁿ-tio̍h koh-ua̍h ê ǹg-bāng. Bua̍t-tāi-lia̍p ê Má-lī-a siong-sim kàu bô khuàⁿ-tio̍h koh-ua̍h ê khai-sí. In siūⁿ sī sìⁿ-miā ê kiat-sok, khiok sī Ki-tok tsuè ông siū ka-bián ê tsún-pī. Ki-tok tiām-tiām siū tìng, tán-thāi I koh-ua̍h ê tuā lîng-li̍k.

Hū-lú bô khuàⁿ-tio̍h tsit tiám, in ai-thòng, thî-khàu, tsáu-khì, koh siong-sim huê kàu hûn-bōng hia. Tsóng-sī só͘ khuàⁿ ê, iáu tsí-sī tsi̍t ê bōng nā-tiāⁿ, bô siaⁿ-im, bô tiāu-thâu.

Lán iā sī siâng-khuán. Muí tsi̍t lâng tī ka-kī ê hue-hn̂g ni̍h, tsē tī hûn-bōng tuì-bīn, kóng, "Tsit ê tshám-ki̍k sī bô i ê, bô pān-huat thang pó͘-kiù ê, guá khuàⁿ buē tio̍h ū sím-mi̍h lī-ik, iā buē thang tuì i lâi tit-tio̍h an-uì." Tsóng-sī tī lán siōng tîm-tāng, siōng pi-siong ê gi̍k-kíng tiong, lán ê Ki-tok tī hia, tán-thāi koh-ua̍h.

Tī lán tsha-put-to beh sí-khì ê sî-tsūn, Lán ê Kiù-tsú tī hia. Lán hi-bōng ê tsīn-bé, beh khuàⁿ tio̍h siōng kng-bîng ê kong-hui khai-sí tshut-hiān. Tī siōng o͘-àm tiong, sī tsún-pī siōng tshàn-lān ê kng tshut-hiān. It-tàn lán tit-tio̍h thé-giām, tsiū uē huat-hiān lán ê hue-hn̂g ê kíng-sik bô hō͘ hûn-bōng phò-huāi.

Tuà-ū pi-siong ê hí-lo̍k, tsit ê hí-lo̍k koh-khah ū ì-gī. Tng Siōng-tè ê hí-lo̍k tsìng tī lán ê tsiu-uî, lán ê pi-siong beh koh-khah tshàn-lān kng-bîng. Khí-thâu hue-hn̂g ê hue khó-lîng m̄-sī lán só͘ sim-ài ê, lán beh ha̍k-si̍p tio̍h hiah ê siⁿ tī sim tiong ê hue. Tī hûn-bōng piⁿ ki-tok-tô͘ sim tiong só͘ tsai-tsìng ê hue, ū thiàⁿ, ǹg-bāng, sìn-sim, hí-lo̍k kap pîng-an.

Tsit tiâu iu-siong ê lō͘-kiô,
Ki-tok tsìn-ji̍p an-hioh,

Tī tsia, sī teh tshē muî-kuì hue,
Á-sī siū tsiok-hok ê tē?
Thian-tông siōng pe̍h ê pik-ha̍p-hue,
Khui tiàm jîn-kan huān-lān tshì-phuè.
Tī tsia, I khiam-pi pē si̍p-jī-kè,
Tī hia, ū ông ê tsí-phàu tshīng-teh.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.com