《台語荒漠甘泉（全羅版）》

Siōng-tè beh sîng-tsûan

作者 陳清俊 翻譯

listen


Káu ge̍h tsa̍p ji̍t

"Kuan-hē gúa ê sū, Iâ-hô-hua beh tsiânn i." (Si-phian 138:8)

Khóo-lān, siū-khóo tiong ún-tsông ū sìng ê ò-pì, ū tsi̍t tsióng kî-biāu tshiau-tsū-jiân ê li̍k-liōng, sī īng lí-sìng sóo būe thang ûan-tsûan liáu-kái. Bô lâng bô siū tio̍h khóo-lān khiok ūe tit-tio̍h sio̍k-lîng, á-sī sìng-kiat siōng ta̍t-kàu ki̍k tshim ê tsân-tshù. Tng tsi̍t ê lâng siū-khóo koh ūe sim-pîng khì-hô, bô-iu bô-lū ê kíng-kài, koh ūe tshiò-tshiò bīn-tùi pún-sin ê khóo-lān, bô koh kiû Siōng-tè hōo i ūe thuat-lī tsit ê khùn-kíng, án-ni siū-khóo í-king ûan-sîng i sîn-sìng ê jīm-bū. Jím-nāi, thun-lún tit-tio̍h sîng-kong lah. (Ngá-kok 1:4) Siū tìng tī si̍p-jī-kè ê thòng-khóo khai-sí pian-tsit tsùe îng-kng ê bián-liû.

Sìng-lîng tsiū-sī īng tsit tsióng ûan-ûan tsûan-tsûan ê siū-khóo king-li̍k, tī lán lîng-hûn ê tshim-tshù sîng-tsiū liáu tsin tsūe kî-biāu ê tāi-tsì. Tī tsit tsióng khûan-kíng ē, tsiong kui ê lâng ûan-tsûan an-tsīng tī Siōng-tè ê tshiú tiong, sim-su, ì-tsì, sim-lîng sóo ū ê li̍k-liōng lîng-li̍k lóng-tsóng kau tshut lâi tī Siōng-tè ê kha tsîng, íng-úan ê an-lîng tshiong-múa tsûan lîng-hûn, tsùe-āu, tshùi iā an-tsīng, beh kóng ê ūe iā tsin tsió lah, bô koh kiò "Gúa ê Siōng-tè, gúa ê Siōng-tè, siánn-sū pàng-lī gúa?" (Si-phian 22:1)

Kàu hit sî, lâng bô koh khong-su bōng-sióng, sióng-siōng khong-tiong lôo-koh, tui-kiû gû-tshùn ê liām-thâu, i ê thui-lí siūnn-huat iā pîng-tsīng, khin-sang lo̍h-lâi, bô koh kíng-tang kíng-sai, in-ūi Siōng-tè ê ì-tsì sī i î-it ê súan-ti̍k. Iáu-koh i tùi lâng tùi sū bô koh tōng kám-tsîng, bô khùai siū-khì, tì-kàu bô sím-mi̍h sū-bū ūe siong tio̍h i, kong-kik tio̍h i, tsóo-tsí tio̍h i, á-sī hóng-gāi tio̍h i ê hong-hiòng. Tann i thang bô tshap khûan-kíng, it-sim kè-sio̍k tui-kiû Siōng-tè kap I ê tsí-ì. Khak-sìn ú-tiū tiong sóo-ū ê sū-bu̍t, bô-lūn sī hó, sī pháinn, sī kè-khì, sī hiān-tsāi, lóng beh "hōo thiànn Siōng-tè ê lâng tit lī-ik." (Lô-má 8:25).

Ah! Tsu̍at-tùi sūn-ho̍k Ki-tok sī hô-tíng ê hok-khì ah! Bô īng ka-kī ê li̍k-liōng, tì-hūi, kè-ūe kap gūan-bōng, hōo kui ê lâng, sim-sîn ûan-tsûan tshin-tshiūnn pîng-tsīng ê Ka-lī-lī hái, hē tī Ki-tok ê kha-tsîng, Tsit ê hok-khì sī jūa tsiânn tūa! --- tùi "lîng-niû"Tiōng-iàu ê sī siū-khóo bô hue-sim, bô sit-tsì. --- Francois Fenelon

Tsi̍t-ê ho̍k-bū, thiànn-thàng, khînn-tiâu ê sim,
Sûi-sî ūe thiann tio̍h thinn-sài si̍t-kóo tín-tāng ê siann-im.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw