《台語荒漠甘泉（全羅版）》

Thùan-liān

作者 陳清俊 翻譯

listen








Sann ge̍h sì ji̍t

"Tsiū-sī o̍h hiah ê tùi sìn kap thun-lún lâi sîng-tsiap tsiah ê ìng-ún ê lâng." (Hi-pik-lâi 6:12)

Sìng-king tiong sìn-sim ê úi-jîn, tùi in sìng-lī ê kuan-tiám ǹg lán hoo-kiò, kóo-lē lán kóng, "í-tsîng ê lâng tsùe ūe kàu ê, hiān-tsāi ê lâng iā it-tīng tsùe ūe lâi." In ê thê-tshínn, m̄-nā ài ū sìn-sim, iā ài ū jím-nāi, thun-lún tsiah ūe tsiong kang-tiânn tsùe ûan-siān. Lán tio̍h tsù-ì, m̄-thang in-ūi lán ut-tsut koh giâu-gî, siūnn beh thuat-lī Siōng-tè ê tshiú, á-sī the-sî I sóo hōo lán tsi̍t pái kà-sī ê ki-hūe.

Tsi̍t ê lāu thih-tshiūnn kóng liáu tsin tio̍h, "Gúa siōng kiann ê sū, sī hông hiat-lo̍h tī pháinn-thih tui lāi-bīn. Lí tsai, ūi-tio̍h beh ū tsi̍t-tè hó kǹg, gúa tsiū thùan-liān i, tsiong i ka jia̍t, tûi, kòng, jiân-āu khǹg ji̍p-khì líng-tsúi lāi. Tsin-kín gúa tsiū tsai tsit tè thih sī-m̄-sī tòng-ūe-tiâu tsit tsióng ê thùan-liān. Tshì nn̄g sann pái tsiū tsai. Nā-sī i tòng-būe-kè thùan-liān, suah tshùi-khì, tsiū hiat i tī pháinn-thih tui lāi, sio̍k-sio̍k būe hōo siu pháinn-thih-á ê lâng."

"Gúa tsai Siōng-tè iā īng siâng hong-sik lâi thùan-liān gúa, īng hé, īng tsúi kap I ê tāng-thûi tûi, phah. Nā-sī gúa m̄-gūan siū khó-giām á-sī tsìng-bîng put-phùe siū thùan-liān, khióng-kiann I iā ūe kā gúa hiat tī pháinn-thih-á tui ni̍h."

Tī sìnn-miā ê hé tng jia̍t teh sio lí ê sî, ài kian-tīng khiā tiâu-tiâu, in-ūi "nā-sī āu-lâi, tsiū tī hiah-ê tùi kíng-kài lâi liān-ta̍t ê lâng, kiat pîng-an ê ké-tsí, tsiū-sī gī ê ké-tsí." (Hi-pik-lâi 12:11)

Thong-kè khóo-tshóo tsiah ūe tit tsiânn-sìng. Lí tsai, Kǹg-khîm ê hiân sī su-iàu tsa̍p-it tùn ê ap-li̍k tsō-sîng, tsiah lâi tiâu-im, lí nā siū ūe khí hit-tsióng ê ap-li̍k, Tsú beh tsiong lí ê khîm-im tiâu-tsíng kap thinn-tíng ê ga̍k-ūn ûan-tsûan hô-ha̍p.

Siū-siong, sún-hāi ê sū-piàn,
Hōo lâng tsiânn-tsùe khah kìng-khiân.
Tshinn-kiann, kín-tiunn kap piàn-tshian,
Pí tshiò-tshiò kè-ji̍t khah iú-siān.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw