《台語荒漠甘泉(全羅版)》

| | | 轉寄

"Sìng-lîng ê thó͘-khuì"

listen


Tsa̍p ge̍h sam-it (Tsa̍p ge̍h saⁿ-tsa̍p-it ji̍t)

"Koh Sìng Sîn iā tshin-tshiūⁿ án-ni hû-tshî lán ê nńg-tsiáⁿ; in-uī lán m̄ tsai-iáⁿ tio̍h tsáiⁿ-iūⁿ kî-tó tsiàu só͘ ing-kai ê; to̍k-to̍k Sìng Sîn ka-kī īng buē kóng-tshut ê thó͘-khuì thuè lán kiû. Kàm-tshat lâng ê sim ê iā tsai Sìng Sîn ê ì-sù in-uī I tsiàu Siōng-tè ê ì-sù lâi thuè sìng-tô͘ kiû." (Lô-má 8:26-27)

Tse sī kî-tó tshim-tîm ê ò-pì. Kî-tó sī buē-thang īng uē piáu-ta̍t ê sîn-sìng kang-kū, sī sîn-ha̍k só͘ oh kái-sik, tsóng-sī siōng pi-bî ê sìn-tô͘ lóng tsai kî-tó, sui-jiân i bô bîng tsit ê ò-pì.

Ah, lán guān-ì sîng-siū buē bîng-pe̍h ê tàⁿ! Tuì lán só͘ buē hiáu-gō͘ ê sū, lán ê sim ū buē-thang piáu-ta̍t ê khat-bō͘! Tsóng-sī lán tsai, tse sī tuì Siōng-tè pó-tsō ê huê-ìng, sī tuì I sim-lāi suè-suè siaⁿ. Tsin tsuē sî-tsūn, sī thó͘-khuì, m̄-sī kua-siaⁿ, sī tsi̍t tsióng tāng-tàⁿ, m̄-sī khin-khin ê ú-mô͘. Put-kò sī siū tsiok-hok ê tāng-tàⁿ, pún-tsit-siōng sī o-ló kap buē thang hîng-iông ê huaⁿ-hí ê thó͘-khuì. Sī kóng buē tshut-lâi ê thó͘-khuì. Lán pún-sin iā buē-hiáu piáu-ta̍t lán só͘ tsai ê, su-iàu Sìng-lîng tī lán lāi-bīn kî-kiû, tsí-ū I uē liáu-kái, su-iàu I tshun-tshiú lâi pang-bâng.

Só͘-í lán tsuân-sim tsiong lāi-bīn lîng ê tāng-tàⁿ kap ap tī lán sin-tsiūⁿ ê iu-siong piàⁿ tshut-lâi. Lán tsai I thiaⁿ-kìⁿ, thiàⁿ-thàng, bîng-pi̍k, iā tsiap-la̍p lán, tsiong lán ê kî-tó tiong só͘-ū ê tshò-gō͘, m̄-tio̍h, bô uân-tsuân ê pō͘-hūn tû-khì, tsiong só͘ tshun ê pō͘-hūn, kap Tuā Tsè-si ê sio-hiuⁿ hiàn tī I ê pó-tsō tsîng. Lán thang khíng-tīng, pá-ak Lán só͘ hōng I ê miâ ê kî-tó it-tīng uē thiaⁿ-tio̍h, tsiap-siū koh huê-ìng.

Lán bô pit-iàu put-tuān kap Siōng-tè kóng-uē, á-sī bô-thîng thiaⁿ Siōng-tè kóng, tsiah sǹg tsuè kap I ū kau-thong liân-hē, in-uī ū tsi̍t tsióng kóng-buē-tshut ê kau-puê pí uē-gú khah tiⁿ-bi̍t. Tsi̍t ê gín-ná tī lāu-bú sin-piⁿ, tsuan-sim tshit-thô, lāu-bú iā tsuan-sim tsuè i ka-kī ê khang-khè. Sui-jiân nn̄g lâng lóng bô-îng, lóng bô kóng-uē, tī in tiong-kan ū tsin suí ê kau-puê kau-thong. Gín-ná tsai lāu-bú tī sin-piⁿ, lāu-bú tsai gín-ná an-jiân bô sū pîng-an.

Siâng-khuán, tsi̍t ê sìn-tô͘ thang kap Kiù-tsú tī thiàⁿ-thàng tiong tsīng-tsīng kau-puê tsin kú ê sî-kan. Sui-jiân sìn-tô͘ khó-lîng bô îng tī ji̍t-siông sing-ua̍h, i uē kám-siū tio̍h sing-ua̍h ê muí tsi̍t ê sè-tsiat lóng ū Siōng-tè tông-tsāi, iā uē kám-kak tio̍h I ê tông-ì kap sù-hok.

Tng tú-tio̍h tāng-tàⁿ khùn-lân ê khùn-jiáu, iū-koh hok-tsa̍p kàu buē hiáu īng giân-gú lâi piáu-ta̍t, iā buē-thang tshiong-hun liáu-kái, tsí-iàu tó tī Siōng-tè ê sim-huâi tiong, īng bô kóng-uē ê iu-siong khàu tshut-lâi, tse sī hô-tíng ê tiⁿ-bi̍t ah!


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org