《台語荒漠甘泉（全羅版）》

Tiām-Tiām ê li̍k-liōng

作者 陳清俊 翻譯

listen










Sann ge̍h tsa̍p-pueh ji̍t

"Lí lóng bô ìn mah?" (Má-khó 15:4)

Tī sìng-king tiong siōng ū khì-phik ê tsi̍t-bōo kíng, tsiū-sī lán ê Tsú siū sím-mn̄g ê sî it-ti̍t tsīng-tsīng bô ìng tsi̍t kù ūe. I pún thang hián-tshut I sio̍k-thinn ê lîng-li̍k, iā thang ū hé it-puann ê khùi-la̍t, lí-khì, lâi tsik-pī in, hōo in lóng phak-pài tī I ê kha-tsîng. Tsóng-sī I tsīng-tsīng bô hûe tsi̍t kù, suah hōo in tsùe-tshut siōng pháinn ê kiat-kó. I ê tsīng-tsīng ê li̍k-liōng, hián tshut Thinn-pē sìng-kiat pîng-hô ê iûnn-ko.

An-tsīng ê li̍k-liōng hōo Thinn-pē ū ki-hūe ūi lán kang-tsok, koh sù lán pîng-an. An-tsīng ê li̍k-liōng hōo lán thîng-tsí ūn-iōng kè-bôo, thîng-tsí tsū-ngóo piān-hōo, bô koh īng ka-kī ê tì-hūi phùann-tùan khì tshē-kiû tsiām-sî ê kái-kuat hong-huat. Húan-tńg, an-tsīng ê li̍k-liōng hōo Thinn-pē pîng I būe hōo lâng sit-bōng ê sìn-si̍t kap thiànn-thàng lâi kái-kuat lán sóo siū ê khóo-thàng, kap bû-tsîng tá-kik.

Ah! Lán siông-siông ūi ka-kī ê bo̍k-piau, pó-hōo ka-kī lâi tá-kik lâng, suah tsóo-gāi tio̍h Siōng-tè ūi lán an-pâi beh tsùe hó koh súi ê kan-sia̍p. Gūan Thinn-pē sù lán múi tsi̍t lâng ū tsit tsióng an-tsīng ê li̍k-liōng, kap khiam-pi ê tsing-sîn. Tng lán tī sè-tsiūnn ê tsing-tsiàn, tshiong-thu̍t kè-liáu, pa̍t-lâng ūe hûai-liām lán tshin-tshiūnn hûai-liām tsá-khí-sî ê lōo-tsúi, ji̍t-tshut ê hiok-kng, pîng-hô ê liâng-hong, Kok-kok-thann ê iûnn-ko, un-jiû sìng-kiat thinn-ni̍h ê Tsínn-á (Hún-tsiáu) Iâ-soo tsi̍t-iūnn. --- A. B. Simpson

Hit ji̍t, Iâ-soo tan-to̍k khiā,
Lâng sim ná tsio̍h kian-tiānn,
I kàu sè-kan tsùe kiù-sio̍k-tsiá,
Hit ji̍t I tsīng-tsīng khiā tī hia.

In tsùe ké kan-tsìng hām-hāi lâng,
Īng bô-tsîng soh khún-pa̍k ké-sàng,
Koh kā I hì-lāng,
I tsīng-tsīng bô kóng pùann-hāng.

In phùi tshùi-nūa, khiú I thâu-tsang,
Thua I hiòng sai koh hiòng tang,
Tùi I bú-jio̍k, tshē-khang tshē-phāng,
I tsīng-tsīng bô kóng pùann-hāng.

Pîng-iú, lí bat in-ūi sió-khúa tāi-tsì
Huat phî-khì tòng-tsùe kong-gī,
Khóo-náu, lâng tùi lí ê biáu-sī?
I beh tsīng-tsīng bô kóng pùann-si. – L.S.P.

Gúa kì-tit thiann kè "Ìn-tē-an (Indian) lâng ê sù-tôo" Bîn-ne-só-tá (Minnesota) Tsú-kàu miâ-kiò Húi-po (Whipple) án-ni kóng, "Sann-tsa̍p nî lâi, gúa tī sóo bô tông-ì gúa ê lâng lâi tshē Ki-tok ê bīn."

Ū tsit khúan ê sim-hûai, lán tsiū ū li̍k-liōng thang jím-siū pa̍t-lâng ê u̍eh sim-kuann, bú-jio̍k, sún-hāi lán ūi Ki-tok ê kiàn-tsìng ê sū. Lán ê Tsú lâi sè-kan m̄-sī beh húi-bia̍t lâng, sī beh tsín-kiù lâng. --- W.H. Griffith-Thomas

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw