《台語荒漠甘泉(全羅版)》

| | | 轉寄

"Ài piàⁿ, tsiah uē iâⁿ"

listen


Tsiaⁿ ge̍h tshue jī. (It ge̍h jī ji̍t)

“Tsiah-ê sì-uî ê piⁿ-pâng, ná-kuâiⁿ ná-khuah; in-uī tshù ê uî tī tshù ê sì-bīn ná-kuâiⁿ, só͘-í tshù ê khuah ti̍t-ti̍t kàu tíng-bīn; tuì ē-tsàn kàu tíng-tsàn, tio̍h tuì tiong-tsàn tsiūⁿ-khì.” (Í-se-kiat 41:7)

Phah-piàⁿ ǹg-hó
Uī tse lâi kî-tó,
Tsi̍t-kuì kè tsi̍t-kuì, tsi̍t-nî koh tsi̍t-nî,
Kè-sio̍k phah-piàⁿ ǹg-hó.

Sin-nî mā phah-piàⁿ ǹg-hó,
Sui-jiân lō͘-tô͘ tshiⁿ-so͘,
Uá-kūn Tsú Iâ-so͘,
Kè-sio̍k phah-piàⁿ tsîng-bīn ê lō͘.

Iu-siong ê sî, iā phah-piàⁿ ǹg-hó,
Tshì-liān teh-tiâu guá sim-tó͘,
Tsing-sîn tsin thòng-khó͘,
Ū Ki-tok tâng kiâⁿ, phah-piàⁿ ǹg-hó.

Phah-piàⁿ ǹg-hó kàu thiⁿ-kng,
It-tshè im-iáⁿ khì hn̄g-hn̄g,
Phah-piàⁿ ǹg-hó kàu thian-tîng,
Tiàm-tī Tsú pó-tsō ê thâu-tsîng.

Uē tī pîⁿ-tē pháu-tsáu, pīng buē thang buán-tsiok, lán ài koh ǹg kuâiⁿ ê uī huat-tián. Tī suaⁿ-tíng lō͘-tsuí sī hô-tíng ê sûn-kiat, bí-lē, khong-khì sī hô-tíng ê tshing-khì, sin-sian, tuà tī hia ê bîn-tsiòng sī hô-tíng ê iu-ik, tshing-ko. In tsi̍t ē khui thang-á, tsiū thang khuàⁿ-tio̍h Iâ-lō͘-sat-líng!

Tsin-tsuē lâng kam-sim lo̍k-ì kè khòng-kang-sìng ê sing-ua̍h--- kui ji̍t lóng bô khuàⁿ-tio̍h ji̍t-thâu. In ê bīn pún-lâi sī ū buah thiⁿ-tíng ê hí-lo̍k-iû, taⁿ khiok sī kô͘-tio̍h ba̍k-sái. In pún-guân thang tī kiong-tiān tíng sàn-pō͘, him-sióng Lī-pa-lùn ê bí-kíng, khiok buán-tsiok tī kaⁿ-lô-sik ê sing-ua̍h. Tshíⁿ khí-lâi! Pîng-iú ah! Lī-khui lí ê pîⁿ-tē, ló͘-li̍k ǹg kuân peh! Tsiong lí ê ià-siān, pîn-tuāⁿ, líng-sim kap it-tshè uē tsó͘-tòng lí hiòng-siōng tui-kiû Ki-tok ê, lóng tsóng tû-khì. Hō͘ Ki-tok tsuè lí ê guân-thâu, lí ê tiong-sim, hō͘ I tī bān-uī tiong tsē thâu-uī. M̄-thang buán-ì lí bo̍k-tsîng ê só͘-ū, ài khat-bōng tsit-ê khah kuân, khah kuì, khah hong-sīng, khah pù-ū ê sìⁿ-miā. Ǹg thiⁿ peh! Tui-kiû tshin-kūn Siōng-tè! --- (Tsarles H. Spurgeon)

Beh peh kàu siōng-kuân ki̍k-uī.
Ài khuàⁿ thiⁿ-tíng tsin kong-hui;
Ti̍t-ti̍t kî-tó tán thiⁿ khui,
Tsú ín-tshuā hiòng-siōng ê suí!

Lán tiong-kan bô tsin-tsuē lâng sī tsīn lán só͘ uē ê lâi ua̍h-teh. Lán tham-luân tī pîⁿ-tē, in-uī lán kiaⁿ peh suaⁿ. Suaⁿ-lō͘ kiā-khu, guî-hiám, oh kiâⁿ, hō͘ lán ê sim líng lo̍h-khì. Lán it-sing lōng-huì tī hûn-bū ê suaⁿ-kok-nih, buē-hiáu khì liáu-kái suaⁿ-tíng ê bí-kíng. Ah! Khuan-iông ka-kī, tsū-buán, an-ik tī hiān-tsāi só͘ tì ê sún-sit sī guā-tsiàⁿ tuā ah! Tsí-iàu lán nā khíng kuat-sim peh kuân tshē-kiû Siōng-tè, tsîng-bīn beh ū ki̍k tuā ê îng-iāu kap tsiok-hok teh tán lán. --- (J. R. Miller)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org