《台語荒漠甘泉（全羅版）》

Lâng ê tsīn-bé sī Thinn-pē ê khai-sí

作者 陳清俊 翻譯

listen











Sann ge̍h jī-tsa̍p-gōo ji̍t

"Siat-sú bô sìn, tsiū būe-ūe hōo Siōng-tè huann-hí; in-ūi tshin-kūn Siōng-tè ê, tik-khak tio̍h sìn I ū, iā sī pò-siúnn hiah ê kiû I ê lâng." (Hi-pik-lâi 11:6)

Tī tsáu-tâu bô-lōo ê sî, lán sóo su-iàu ê, sī sìn-sim nā-tiānn. Tī sìng-king tiong ū kì-tsài tsin tsūe tsit lūi ê lē. Īng kóng-kóo, si-kua, ū-giân lâi tâm-lūn. Tsáu-tâu bô-lōo ê sî-ji̍t, sī hiòng kng-bîng lōo ê ta̍h-kha-tsio̍h, sī Thinn-pē ài lán ha̍k-si̍p tì-hūi ê hó ki-hūe.

Si-phian tē 107 phinn tsiū-sī Siōng-tè si-lo̍h thiànn-thàng ê kòo-sū. Múi tsi̍t ê tsín-kiù ê kòo-sū, tsiū-sī, tng lâng í-king kiânn kàu tsīn-pōng ê sî, tsiū-sī Thinn-pē hîng-tōng ê sî-khik. Lâng ê tì-hūi bô huat-tōo ê sî, tsiū-sī Siōng-tè huat-hui li̍k-liōng ê sî. (tsham-khó Si-phian 107:27)

Kì-tit tsá-sî, Thinn-pē bat tùi tsi̍t-tùi "tshin-tshiūnn í-king sí ê" hu-hū ìng-ún, tap-ìng in ê kiánn-sun beh "sinn-thùann tshin-tshiūnn thinn-tshinn ê tsūe, tshin-tshiūnn hái-sua ê būe sǹg-tit" (Hi-pik-lâi 11:12). Koh tha̍k tsi̍t phinn Í-sik-lia̍t tī Âng-hái siū tsín-kiù ê kòo-sū, í-ki̍p kng Iâ-hô-hua iok-kūi ê tsè-si tī Iok-tàn hô tiong ê ta-tē khiā tsāi-tsāi ê kì-tsài (Iok-su-a 3:17). Koh gián-kiù tsi̍t pái, A-sat, Iok-sa-huat kap Hi-se-ka tsiah ê ông tī ki̍k-kî khùn-lân, m̄-tsai beh án-tsúann tsùe ê sî, sóo huat-tshut ê kî-tó. Koh ū Nî-hi-bí, Tān-í-lí, Hô-se-a kap Ha̍p-pa-kok ê li̍k-sú. Iáu-ū tī oo-àm tiong ê Khik-se-má-lī hn̂g, tī A-lī-má-thài ê Iok-sik ê hûn-bōng tsîng, (Má-thài 27:57) hiah ê kan-khóo kiann-hiânn ê sî-khik, kap tshoo-tāi kàu-hūe ê kiàn-tsìng-jîn, koh sù-tôo tng in tī khùn-kíng ê ji̍t-tsí ê king-li̍k, king-giām, thang hōo lán lâi tha̍k-tha̍k siūnn-siūnn ê.

Tī tsu̍at-kíng tiong pí tsu̍at-bāng khah hó. Lán tú-tio̍h tsu̍at-kíng pīng m̄-sī in-ūi lán ê sìn-sim. Sìn-sim ê kang-tsok sī hōo lán tōo-kè hiah ê tsu̍at-kíng, kan-lân ê ji̍t-tsí, hōo lán ū lîng-li̍k lâi kái-kuat hiah ê būn-tê. Siōng-kiann-ê, sī tī tsu̍at-kíng tiong sit-khì sìn-sim, tse tsin-tsiànn sī tsu̍at-bāng lah. Sìn hōo lán ūe kian-tshî, koh ūe khik-ho̍k khùn-lân.

Tú-tio̍h ki̍k gûi-hiám koh ūe pó-tshî sìn-sim, siōng-hó ê lē tsiū-sī Sa-tik-la̍h, Bí-suah, A-pik-nî-ko tsit sann-ê Hi-pik-lâi tshing-liân lâng ê kòo-sū. (Tān-í-lí tē 3 tsiunn) In tī tsîng-hóng ki̍k gûi-hiám ê sî ióng-kám án-ni kóng, "Kó-jiân án-ni, gúan sóo ho̍k-sāi ê Siōng-tè ūe kiù gúan tshut iām-jia̍t ê hé-lôo; ông ah, I iā beh kiù gúan thuat-lī lí ê tshiú. Nā bô án-ni, ông ah, lí tio̍h tsai gúan kuat-tùan bô beh ho̍k-sāi lí tsiah ê Siōng-tè, iā bô beh kìng-pài lí sóo li̍p ê kim-siōng." (Tān-í-lí 3:17,18) tī tsia, gúa ti̍k-pia̍t ài tsit ê hûe-tap kóng "Nā bô án-ni."

Lán koh lâi thê-khí Khik-se-má-lī hn̂g ê kòo-sū, tī king-bûn án-ni kì-tsāi "Nā ūe tsùe-tit, ... tsóng-sī, ..." (Má-thài 26:39) Lán ê Tsú ê lîng í-king hām-lo̍h tī ki̍k tshim ê oo-àm tiong. Sìn-khò ê ì-gī tsiū-sī king-giām tio̍h kàu lâu-huih ê tē-pōo, hām-lo̍h tī ki̍k tshim ê oo-àm tiong, iáu ūe kóng, "tsóng-sī"! "tsóng-sī!"

Tshē tsi̍t pún si-kua, tshiùnn tsi̍t siú lí sim-ài ê "tī gûi-kip tiong iáu ūe pó-tshî sìn-sim" ê kua. --- S. Tsadwick

Tng tshì-giām, that-gāi sì-bīn ûi gúa ná kûainn-
tshiûnn,
Gúa sóo thang tsùe ê sī kau-thok Lí, ǹg Lí tshíng-
kiû.

Tsiàu khùann sī bô ki-hūe, bô tsúan-ūann, lâi
thuat-lī gúa sóo siū,
Tī tsu̍at-kíng tiong an-tsīng thìng-hāu Lí ê tsín-
kiù.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw