《台語荒漠甘泉(全羅版)》

| | | 轉寄

"Khuàⁿ-buē-tio̍h ê sìn"

listen


Sì ge̍h jī-sì (Sì ge̍h jī-tsa̍p-sì ji̍t)

“Sìn tsiū-sī só͘ ǹg-bāng ê ê si̍t-tsāi, kap bē khuàⁿ-kìⁿ ê sū ê pîn-tsún.” (Hi-pik-lâi 11:1)

Tsin-tsiàⁿ ê sìn-sim tshin-tshiūⁿ tsiong phue hiat lo̍h-khì phue-tháng í-āu tsiū bô khì kuán i. Bô sìn-jīm ê, ná tshin-tshiūⁿ tshiú lia̍h tī phue ê tsi̍t-pîng, (bô kià-tshut) jiân-āu huân-ló tuì-hong uī-hô iáu-buē huê-phue. Guá ê tsu-toh-á tíng ū phue, ū ê sī kuí-nā lé-pài tsîng só͘ siá ê. Sī in-uī tsū-só͘ bô khak-tīng, lāi-iông iáu-buē hó, tsiū bô kià-tshut. Tsiah ê phue tuì guá tuì pa̍t-lâng lóng bô lī-ik. Guá nā bô kià tshut, tsiū íng-uán buē ta̍t kàu tuì-hong ê tshiú.

Tsin-tsiàⁿ ê sìn-sim iā sī án-ni. Sìn-sim sī tsiong tāi-tsì kau-thok Siōng-tè, hō͘ I khì tshù-lí. Si-phian 37:5 sī tuì tsit-tiám ki̍k iú-li̍k ê khak-jīm, “ Tng lí tsiong tāi-tsì kau-thok Iâ-hô-hua, uá-khò I, I beh sîng-tsuân.” I ài lán tsiong sū kau-thok I, I tsiah beh sîng-tsuân. Sìn-sim sī tsiap-siū, kóng khah tsìng-khak ê, tsin-tsiàⁿ sī tuì Siōng-tè tit-tio̍h lán ê lé-mi̍h. Lán siong-sìn I, kàu I ê bīn-tsîng, tsiong ka-kī kau-thok hō͘ I, tī I ê lāi-bīn tit an-hioh. Tsóng-sī lán iáu-buē sūn-ho̍k lâi tsiap-siū I í-tsîng, buē-thang tshiong-hun tsai lán só͘ hióng-siū ê hok-khì. --- Lio̍k tuì “Tī-tē ná tī-thiⁿ” (from Days of Heaven upon Earth)

Ū tsi̍t ê lāu-thài-thài uī-tio̍h i ê kiáⁿ ê tsîng-hîng teh tam-iu, Phê-sng phok-sū (Dr. Payson), siá phue hō͘ tsit ê lāu thài-thài, kóng:

“ Lí uī i kè-thâu tshau-sim. Lí uī i kî-tó, tsiū lí í-king tsuè-kè, iā tsiong i kau-tài hō͘ Siōng-tè, lí tsiū bô ing-kai koh uī i iu-siong.” Siōng-tè ài lán “It-khài bo̍h-tit khuà-lū”, (Hui-li̍p-pí 4:6) sī bô lâu tsi̍t-tiám huân-ló tī ka-kī ê sim-lāi. Līng-guā tsi̍t tsat king-bûn, “Lín tio̍h tsiong it-tshè ê khuà-lū kau-hù Siōng-tè” (I Pí-tik 5:7), iā-sī án-ni ê ì-sù. Nā-sī lán í-king tsiong tàⁿ kau hō͘ pa̍t-lâng, tsit ê tàⁿ kiám iáu-uē teh tī lán ê sin-tsiūⁿ mah? Sī-m̄-sī lán koh tsiong tàⁿ the̍h tńg-lâi, lâu tī sin piⁿ, tse tsiū piáu-sī lán bô tsiong tàⁿ kau hō͘ Siōng-tè. Tī lán ê sing-ua̍h tiong, guá án-ni tshì-giām guá ê kî-tó: guá nā tsiong tsi̍t kiāⁿ sū kau-thok Siōng-tè, uē tshin-tshiūⁿ Hap-ná án-ni (I Sat-bó͘-jíⁿ 1:18), sim bô iu-tshiû, thòng-khó͘, iu-lū. Guá jīm-uī he tsiū tsìng-bîng guá ū sìn-sim ê kî-tó. Ká-sú guá kî-tó liáu, iáu-ū tāng-tàⁿ, guá thang khak-tīng guá bô piáu-ta̍t tshut tsin-tsiàⁿ ê sìn-sim.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org