《台語荒漠甘泉（全羅版）》

Siong-sìn bô giâu-gî

作者 陳清俊 翻譯

listen





Sì ge̍h it ji̍t

"I beh thâi-sí gúa, gúa bô thang ǹg-bāng." (Iok-pik-kì 13:15)

"In-ūi gúa bat gúa sóo sìn ê." (II Thê-môo-thài 1:12)

Gúa būe giâu-gî,
Sóo ū tńg-lâi ê tsûn lóng pháinn-khì,
Gúa siong-sìn Sìng-tshiú, íng būe sit-tshò, teh kà-sī,
Pháinn-sū iā beh piàn tsùe iú-lī,
Sui-jiân tsûn phùa, lâu ba̍k-sái, hi-bōng sit-khì,
Gúa iáu beh kóng, “Gúa siong-sìn Lí.”

Gúa būe giâu-gî,
Sui-jiân gúa ê kî-tó bô tit-tio̍h thiann-kìnn,
Gúa siong-sìn tse lóng sī hó-ì,
Sui-jiân tsin siong-pi,
Gúa iáu kian-sìn tsìng-gī,
Kè-sio̍k huat kng tsiò bô tsí.

Gúa būe giâu-gî,
Iu-siong ná hōo tsha̍p-tsha̍p-tih,
Mâ-hûan sū ná phang kúann būe lī,
Gúa siong-sìn lóo-li̍k hiòng kûainn peh-khí,
Tsí-ū thong-kè thòng-khóo, ai-thiànn tsiah ūe sìng-lī,
Tī si̍p-jī-kè ē, ai-kiû, sù tsû-pi
Siōng tūa ê sún-sit piàn tsùe khah tūa ê ik-lī.

Gúa būe giâu-gî,
Sìn-sim ê tiànn khak-tīng put-î,
Ná kian-kòo ê tsûn, hiòng tūa hong-íng sái khì,
M̄-kiann sit-pāi, ióng-kám hiòng sí-bông ê hái-ni̍h,
Sui-jiân jio̍k-thé kap lîng-hûn pun-lī,
Īng tsùe-āu tsi̍t khùi, hōo sè-kan-lâng thiann-kìnn,
Gúa tūa-siann âu-kiò. “Gúa bô giâu-gî.”

Tsi̍t ūi tsin-ū king-giām ê tsúi-siú án-ni kóng, "Tī kiông-lia̍t ê po̍k-hong tiong, lán sóo tio̍h tsùe ê sū, tsí-ū tsi̍t tiâu pó sìnn-miā ê lōo: tsiū-sī tshē bóo tsi̍t ê ūi-tì thîng tī hia bô sùa ūi." Tshin-ài ê ki-tok-tôo, tse tsiū-sī lán sóo pit-su tsùe ê sū.

Ū sî, tshin-tshiūnn sù-tôo Pó-lô, tú-tio̍h kiông-lia̍t po̍k-hong, bô thài-iông á-sī thinn-tshinn thang lâi pang-tsān kiânn-tsûn. Tsit sî, lí tsí-ū su-iàu tsùe tsi̍t hāng sū, iā sī in-ūi tsí-ū tsi̍t tiâu lōo. Lí-tì būe pang-tsān lí, kè-khì ê king-giām iā būe tsí-tiám lí, liân kî-tó to būe an-ùi lí. Tsí tshun tsi̍t tiâu lōo, tsiū-sī tsiong lí ê sim-lîng tīng tsi̍t ê ūi-tì, lâu tī hia.

Lí pit-su tsiong ka-kī pang tiànn tī Tsú ê sin tsiūnn, jiân-āu put-kúan sī hong, lōng, tūa-tô, sih-ná, lûi tân, àm-tsio̍h, tūa-íng, hūann-tiâu-tiâu lí ê tsûn-tūa. Kian-kuat siong-sìn Siōng-tè ê sìn-si̍t, I ê li̍p-iok ìng-ún kap I tī Iâ-soo Ki-tok íng-úan ê thiànn. --- Ritsard Fuller

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw