《台語荒漠甘泉（全羅版）》

 | | | 轉寄

"Tshun kuâⁿ, hō͘ ná tsuāⁿ"

作者 陳清俊 翻譯 2011.06.12

listen


La̍k ge̍h tsa̍p-jī (La̍k ge̍h tsa̍p-jī ji̍t)

“in-uī lín tiàm-tī I ta̍k hāng tāi-tsì hù-tsiok,” (I Ko-lîm-to 1:5)

Lí bat tú-tio̍h king-kè tuā khó͘-lān lâi pik-tshiat kî-tó ê lâng mah? Lí beh tsù-ì tio̍h khó͘-lān liáu-āu, in ê sim-lîng ū kam-tiⁿ, un-luán kú-kú buē bô khì.

Tse hō͘ guá siūⁿ-khí tsi̍t tsân king-li̍k. Ū tsi̍t ê tshun bua̍t thiⁿ, thiⁿ-sik tuā àm, hong-hō͘ kau-ka huat-tsok, ná tshiūⁿ thiⁿ phuà-khiah, hong-hō͘ tsīn piàⁿ lo̍h-lâi.

Tē-bīn siū tshui-tshân, sún-hāi tsin lī-hāi. Liân siōng-ióng ê tshiūⁿ-tshiū iā khì hō͘ i khau-khí-lâi, ián-tó tī thô͘-kha. Liân tī bô iáⁿ-ba̍k ê ti-tu-si iā lóng phuà-lī-lī. Tng hong tiāⁿ, sih-nà thîng, luî iā bô koh tân, hō͘ iā bô khì lah, thiⁿ piⁿ tshut-hiān tsi̍t lìn suí-suí ê tshái-khīng, tshin-tshiūⁿ tsi̍t-tiâu uî-kun phuāⁿ tī ām-kún, hioh tī king-kah thâu, lâi tuì guá khuàⁿ tsi̍t-ē, bî-bî-á tshiò tsi̍t-ē, koh kín-kín siau-sit khì.

Kuí lé-pài liáu-āu, tshân-iá khui-tshut kok-tsióng suí koh phang ê huē-luí, tsháu iā siōng tshiⁿ-tshuì, khue-á-tsuí muá-muá, tsuí-liōng tshiong-tsiok, tshiū-ba̍k bō͘-sīng, ki-tshun hio̍h-huat, khì-siōng king-sin. Hō͘ lâng ū tsiah-ni̍h bí-lē ê kíng-tì, sim-sîn sòng-khuài khui-khuah.

Tsiah-ê it-tshè, lóng sī siū hit-ê po̍k-hong-hō͘ ê tì-ìm. Sui-jiân lâng í-king buē-kì-tit po̍k-hong, tuā-hō͘, tshái-khīng ê tāi-tsì lah. --- Theodore Parker

Sui-jiân Siōng-tè bô hō͘ lán kiâⁿ ǹg “ìng-ún ê tē” ê lú-tîng sūn-lī, tsóng-sī, I hō͘ lán ê lō͘-tô͘ pîng-an. --- Horatius Bonar

Tī Ìn-tō͘, ū tsi̍t piàn ê hong-thai-hō͘, lâi huat-kiàn tio̍h kim-khòng. Lán kiám bô mā-sī tuì tú-tio̍h hong-thai-hō͘, lâi huat-kiàn tio̍h kè-ta̍t bû-pí, Siōng-tè thiàⁿ-thàng ê pó-khòng mah?

Suè-suè hue-luí,
Lo̍h-hō͘ sî teh khui,
Tsuē pha̍k uē thuat-tsuí,
Ji̍t tshut koh-khah suí.
Ba̍t-hûn o͘-o͘ tuì-tuì,
Liáu-āu tshing-thiⁿ sòng-khuài.

Ià-siān ê sim-kuaⁿ,
Khó͘ ia̍h huaⁿ,
Siong-pi tiong, lâi tióng-tuā,
Ná hō͘ nih ê hue-tuâⁿ.
Siōng-tè teh khuàⁿ,
Hûn bé siā kng-suàⁿ.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org