《台語荒漠甘泉(全羅版)》

| | | 轉寄

"Sè-kan ê bí-niû"

listen



La̍k ge̍h tsa̍p-káu (La̍k ge̍h tsa̍p-káu ji̍t)

“Tsuè-piáⁿ ê gō͘-kak kiám khueh hō͘ i tshuì mah? Bô--lah, bô tn̂g-tn̂g phah i; sui-jiân īng tshia-lûn bé-tuê phah-suàⁿ i, ia̍h bô hō͘ i tshuì--khì.” (Í-sài-a 28:28)

Lán tsuē-tsuē lâng.buē thang tsuè tsia̍h-mi̍h lâi kái-kuat sè-kài ê ki-hng. In-uī lán iáu buē hō͘ Ki-tok peh khui. “tsuè mī-pau ê mī-hún sī ài king-kè buâ kè, tsiah piàn-tsuè hún. Beh piàn-tsuè Tsú ê tsiok-hok, lán pit-tīng king-li̍k iu-siong. Beh tit-tio̍h Ki-tok ê tsiok-hok, ū kám-tōng lâng ê un-sù, tshuā lâng kui Tsú, só͘ hù ê tāi-kè sī bô sǹg tsuè sím-mi̍h. Kin-á-ji̍t lán só͘ tin-sioh ê mi̍h lóng mā sī īng ba̍k-sái kap khó͘-thàng ê tāi-kè lâi tit-tio̍h ê. --- J.R. Miller

Siōng-tè í-king hō͘ guá tsiâⁿ-tsuè I só͘ kíng-suán ê lâng ê tsia̍h-mi̍h. Nā-sī guá pit-su hō͘ sai ê tshuì-khí lâi buâ-tshuì, piàn-tsuè piáⁿ lâi tshī I ê kiáⁿ-jî, guá beh tuā-tuā o-ló Tsú. --- Ignatius, Tē jī sè-kí tī Lô-má sûn-tō ê An-thê-o kàu-huē tsú-kàu.

Beh hō͘ lán ê sìⁿ-miā huat-kng, lán tio̍h tāi-sing siū hé sio. Uāⁿ uē kóng, Lán nā thîng-tsí lâu huih hi-sing, lán tsiū thîng-tsí hō͘ lâng tit tsiok-hok.

Sàn-tshiah, kan-khó͘, pháiⁿ-ūn uē hō͘ lâng piáu-hiān tshut tō-tik, lîng-sìng ê uí-tāi. Khùn-lân khó-giām lán ê tsing-sîn kap gē-li̍k, hō͘ lâng ê sìⁿ-miā ū siōng-hó ê phín-tsit. Tuā sî-tsing sī īng tîm-tāng ê tsing-thuî ê iô-pái lâi kiâⁿ ê. Sái-tsûn ê lâng uē thang tī gi̍k-hong, tuì-thâu hong tsiong tsûn hiòng tsîng kiâⁿ, pīng pîng-an sái ji̍p káng. Siōng-tè iā uē īng huán-tuì ê li̍k-liōng lâi tshiok-tsìn lán ê sìn-sim kap sū-hōng.

Sìng-king tiong tshut-miâ ê jîn-bu̍t lóng bat siū peh-khui, phah-phuà, buâ tshuì tsuè tsiâⁿ piáⁿ, hō͘ iau-gō ê lâng tsia̍h. A-pik-la̍h-hán, kiò tsuè “Sìn-sim ê pē”, in-uī i tī tsìng sìn-sim jîn-bu̍t tiong tsuè siōng-hó, tī siū-khó͘ iáu sūn-ho̍k. Ngá-kok tshin-tshiūⁿ be̍h siū-tio̍h giâm-giâm ê tá-kik, Iok-sik siū phah, siū siong, siū pik tī Pho-thê-huat ê tû-pâng kap Ai-ki̍p kaⁿ-ga̍k lāi siū-khó͘, tsiah uē tsiâⁿ-tsuè Ai-ki̍p ê tsáiⁿ-siòng.

Tāi-pi̍t tī suaⁿ-nih siū tui-jip, siū-siong, ià-siān, kha thàng, buâ tsuè piáⁿ, tsiah uē tsuè tsi̍t kok ê kok-ông. Pó-lô nā m̄-sī jím-siū piⁿ phah, tsio̍h-thâu tìm ê siong-hāi, tsua̍t-tuì buē tsiâⁿ-tsuè Kai-sat ke lāi lâng ê piáⁿ. I siū buâ tsuè iù mī-hún, tsiâⁿ-tsuè Lô-má ông-sik ê tsia̍h-mi̍h.

Ài sing ū tsiàn-tàu, tsiah uē tit sìng-lī. Nā sī Siōng-tè suán ti̍k-pia̍t ê buâ-liān hō͘ lí jím-siū, án-ni, lí thang pàng-sim, in-uī I í-king uī lí lâu tsi̍t-ê ti̍k-pia̍t ê tē-uī. Tsi̍t ê siū tāng-tāng tshòng-siong ê lâng tsiū-sī tsi̍t ê siū kíng-suán ê lâng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org