《台語荒漠甘泉（全羅版）》

Khùann-tiōng ka-kī ê lúan-jio̍k

作者 陳清俊 翻譯

listen





Sì ge̍h pueh ji̍t

"Sóo-í gúa ūi-tio̍h Ki-tok lia̍h tsiah ê lúan-jio̍k, khiàm-kheh, khún-tio̍k, khùn-pik tsùe huann-hí; in-ūi gúa lúan-jio̍k ê sî, húan-tńg ū khùi-la̍t." (II Ko-lîm-to 12:10)

Tíng-bīn ê king-bûn nā-sī ti̍t-tsiap ê huan-i̍k sī án-ni: “Gúa ūi tio̍h Ki-tok ê iân-kòo, tsiū lia̍h bô khùi-la̍t, siū bú-jio̍k, tú-tio̍h hūan-lān, hông kúann-tio̍k, ji̍p tsu̍at-kíng lóng tsùe huann-hí, in-ūi gúa sím-mi̍h sî bô khùi-la̍t, sím-mi̍h sî tsiū ūe ná tsà-io̍h hiah kiông-bíng.” Beh hián-tshut siūnn būe kàu ê li̍k-liōng.

Beh thé-giām tio̍h Siōng-tè ê li̍k-liōng ū kàu īng ê pì-kuat, tsiū-sī tng lán pún-sin, lán ê khûan-kíng lóng kiânn kàu bô lōo ê tē-pōo. Tī tsit tsióng tē-pōo, lán būe ūi ka-kī ê khùn-lân, á-sī siū bô kong-pîng ê tùi-thāi khì kiû lâng ê tông-tsîng, in-ūi tsiah ê sū su-iàu khah tūa ê tsiok-hok tsiah ū khó-lîng, sóo-í lán beh gióng-bōng Siōng-tè, bîng-pi̍k tse gûan-lâi sī Siōng-tè tī lán sin-tsiūnn tsùe-kang ê tsìng-kù. – A. B. Simpson

Soo-keh-lân tshut-miâ ê thûan-tō-su George Matheson, I nn̄g-lúi ba̍k-tsiu sit-bîng, bô khùann-kìnn, bat án-ni kóng, “Gúa tshin-ài ê Siōng-tè, gúa ūi-tio̍h gúa ê mûi-kùi hue kám-siā Lí tshiau-kè tsi̍t tshing pái, khiok m̄-bat ūi-tio̍h gúa ê tshì (tsí sit-bîng) lâi kám-siā lí tsi̍t pái. Gúa it-hiòng khùann-tiōng gúa sóo pē ê si̍p-jī-kè sóo beh tit-tio̍h siúnn ê ūi, khiok bô siūnn tio̍h si̍p-jī-kè pún-sin tsiū-sī gúa hiān-tsāi ê îng-kng.”

“Tsú ah, kiû Lí kà-sī gúa ūi gúa ê si̍p-jī-kè lâi huann-hí, kà-sī gúa bîng-pi̍k tshì ê kè-ta̍t, tsí-tiám gúa jû-hô tùi thòng-khóo ê lōo pê kàu Lí ê bīn-tsîng, hōo gúa bîng-pi̍k gúa sī thong-kè gúa ê ba̍k-sái khùann-tio̍h gúa ê tshái-khīng.”

Khó-lîn ê lâng khùann būe tio̍h,
Tshinn-kng tshiò thàu-kè pínn-pik tshiū ê hio̍h.

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw