《台語荒漠甘泉（全羅版）》

Khó-giām tsing-ka sìn-sim

作者 陳清俊 翻譯

listen






Sì ge̍h tsa̍p-gōo ji̍t

"Gúa úa-khò Lí ê ūe." (Si-phian 119:42)

Lán sìn-sim ê li̍k-liōng ûan-tsûan sī tùi lán ê siong-sìn Thinn-pē ūe si̍t-hiān I ê ìng-ún ê jūa tsūe lâi tīng. Sìn-sim kap kám-tsîng, ìn-siōng, gūa-piáu, sū-tsîng ê khó-lîng á-sī bô khó-lîng lóng bô kuan-hē. Lán nā tsiong tsiah ê sū kap sìn-sim liâm tsùe-hé, lán tsiū bô úa-khò Siōng-tè ê ūe lah. Sìn-sim sī īng Siōng-tè ê ūe tsùe pîng-kù, m̄-sī úa-khò kî-thann ê sū-bu̍t. Tng lán khò Siōng-tè ê ūe, lāi-sim tsiū ū pîng-an.

Thinn-pē huann-hí thùan-liān lán ê sìn-sim. I án-ni tsùe, ài beh sù-hok hōo lán kò-jîn, sù-hok hōo kàu-hūe, iā ài tùi án-ni kiàn-tsìng hōo bô sìn ê lâng. Tsóng-sī lán siông-siông bô huan-gîng sìn-sim siū thùan-liān, lán beh thè-āu. Tng khó-giām lâi ê sî, lán ing-kai án-ni hûe-ìng, kóng, "Gúan tī thinn-ni̍h ê Pē, tsiong tse khó-giām ê pue hē tī gúa ê tshiú, hōo gúa āu-lâi thang tit-tio̍h khùai-lo̍k."

Khó-giām sī sìn-sim ê niû-si̍t. Lán thang tsiong pún-sin ûan-tsûan hē tī Thinn-pē ê tshiú ni̍h! Kìnn-nā ūi-tio̍h kiánn-jî ê hó-tshù, I lóng huann-hí khì tsùe. Tsóng-sī khó-giām kap kan-lân pīng m̄-sī thùan-liān, tsing-ka sìn-sim î-it ê hong-huat. Tha̍k sìng-king iā thang pang-tsān lán jīn-bat Tsin-sîn, in-ūi I tī sìng-king tiong khé-sī I pún-sin.

Tsiàu lí tùi Thinn-pē ê jīm-sik kap tùi I ê kuan-hē, I sī-m̄-sī tsi̍t ūi khó-ài ê Siōng-tè mah? Nā m̄-sī, gúa ài kóo-lē lí, kiû Thinn-pē ūe tsiong lí tshūa kàu tsit ê kíng-kài, hōo lí tsa̍p-tsiok jīn-bat koh kám-siā I ê un-jiû kap tsû-ài, ūe thang kóng tshut I sī tsin súi, tsin hó. Iāh tsai Thinn-pē tsin huann-hí ūi-tio̍h I ê kiánn-jî lâi tsùe tsin-tsūe ê kang-tsok.

Lán ê sim-lāi nā ná tsiap-kūn tsit tiám, lán tsiū ná gūan-ì tsiong pún-sin kau tī Thinn-pē ê tshiú-ni̍h, koh-khah múa-ì I tī lán sin-tsiūnn sóo tsùe ê it-tshè. Khó-giām lâi ê sî, lán beh gūan-ì kóng, "Gúa ūe jím-nāi thìng-hāu, khùann Siōng-tè tī gúa sin-tsiūnn sóo tsùe ê hó, iā khak-si̍t sìn I ūe án-ni tsùe."

Án-ni, lán beh tùi sè-kan lâng tsùe tshut ū-la̍t ê kiàn-tsìng, pang-tsān lâng, hōo pa̍t-lâng sìnn-miā tit hong-sīng, tit khùi-la̍t. --- George Mueller

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw