《台語荒漠甘泉(全羅版)》

| | | 轉寄

"Saⁿ nî tsi̍t lūn, hó-pháiⁿ tsiàu lûn"

listen

Tsa̍p ge̍h tshue-káu (Tsa̍p ge̍h káu ji̍t)

“Iâ-hô-hua in-uī án-ni beh thìng-hāu lâi si un-huī hō͘ lín, koh in-uī án-ni beh khí-lâi lîn-bín lín; ” (Í-sài-a 30:18)

Siōng tshiⁿ ê tsháu siⁿ tī hō͘-tsuí siōng tsuē ê só͘-tsāi. Tī Ài-jíⁿ-lân (Ireland) ū tsi̍t ê sió-tó, kiò tsuè “Tshuì-li̍k-tó”, sī bū-khì kap tsuí-khì tshut-miâ tsuē ê só͘-tsāi. Put-kuán-sî to sī khùn-khó͘ hō͘ lâng sim huân ê bū, kap iu-siong ê tsuí-khì. In-uī án-ni tī hia, ū tshiⁿ-tshuì phik-li̍k ê sim, tshiong-muá Siōng-tè ê an-uì thiàⁿ-sim bí-lē ê tshiū-ba̍k.

Tshin-ài ê ki-tok-tô͘, m̄-thang kóng, “ìⁿ-á lóng khì tá-uī lah, lóng bô khì ah, in it-tīng sī sí khì lah.” M̄-sī, in bô sí, sī pe kè nâ-sik ê hái, khì hn̄g-hn̄g ê só͘-tsāi, bô-kú in beh koh pe tńg-lâi.

Siōng-tè ê kiáⁿ-jî, m̄-thang kóng, “Só͘-ū ê hue lóng sí khì ah, tang-thiⁿ kā in tàng sí lah, lóng bô khuàⁿ-kìⁿ ah.” M̄-sī, sui-jiân tang-thiⁿ kā in mua tsi̍t tîng pe̍h-pe̍h ê saⁿ, bô kú, in tsiū beh koh tsiong thâu phû khí-lâi, koh ua̍h kah tsin hong-sīng.

Pîng-iú ah, m̄-thang kóng ji̍t-thâu sí-khì ah, tsí in-uī hō͘ hûn jia-khàm khí-lâi. Ji̍t-thâu iáu tī hia, jua̍h-thiⁿ iáu beh tsiò kah kng-iàⁿ-iàⁿ. hiah ê hûn tsiâⁿ-tsuè tshun-thiⁿ ê hō͘, tsiâⁿ-tsuè gō͘-ge̍h thiⁿ ta̍k-tsióng phang hue ê îng-ióng bú-tshin.

Siōng tiōng-iàu ê, tng Siōng-tè ng I ê bīn hō͘ lí khuàⁿ buē-tio̍h ê sî, m̄-thang kóng, Siōng-tè í-king buē-kì-tit lí lah. Tán tsi̍t ē, I beh koh-khah thiàⁿ lí. It-tān I lâi, lí beh huaⁿ-hí kah buē kò͘-tit, án-ni kóng, “Tsú sù tuā hí-lo̍k” (Nî-hi-bí 8:10), huaⁿ-hí suah lâi ho̍k-sāi I. Sui ū iân-tshiân, tsóng-sī m̄-bat siuⁿ uàⁿ lâi. --- Tsarles H. Spurgeon

Oh, ta̍k nî ū tang-thiⁿ,
Ta̍k nî iā ū lo̍h-hō͘ thiⁿ,
Tsóng-sī ū tsi̍t kang, ji̍t á mî,
Tsiáu-á pe tńg-lâi gîm-si.

Tshiū puh sin íⁿ,
Tsháu piàn tshiⁿ,
Hue khui tsin suí ê kî,
Tsiáu-á pe tńg-lâi gîm-si.

Oh, muí ê sim iu-siong tîm-tāng,
Muí ê sim uē khó͘-thàng,
Tsóng-sī ū tsi̍t kang,
Tsiáu-á pe tńg-lâi ua̍h-tāng.

Nā-sī sit-khì ióng-khì,
Huê-sióng kam-tiⁿ ji̍t-tsí,
Tng àm-tām ê ji̍t kè-khì,
Tsiáu-á pe tńg-lâi ê sî.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org