《台語荒漠甘泉（全羅版）》

Thinn-pē tsai lán ê it-tshè

作者 陳清俊 翻譯

listen







Sì ge̍h jī-tsa̍p-jī ji̍t

"I tsai gúa sóo kiânn ê lōo." (Iok-pik-kì 23:10)

Sìn-tôo ah, tsit tsat king-bûn sī jūa-tsiânn súi ê pó-tsìng! Gúa ū sìn-sim, "gúa sóo kiânn ê lōo", sī I sóo tshūa ê, sī tshiong-múa tshì-liān lâu ba̍k-sái, sī uan-khiau, ún-tsông, khi-khu ê lōo, tsóng-sī I tsai! Tng "Hé-lôo pí pîng-siông tshit-pē khah jia̍t," (Tān-í-lí 3:19) gúa tsai I iáu tsiò kng gúa ê lōo. Ū tsûan-lîng ê ín-tshūa-tsiá, i tsai koh tō-ín gúa múi tsi̍t pōo, put-kúan sī ǹg Má-la̍h ê kóo-tsínn á-sī hiòng ū tsúi-tsûan ê Í-lîm tshinn-tshùi ê tshiū-pinn, li̍k-tsiu. (tsham-khó Tshut-ai-ki̍p-kì 15:23, 27).

Tùi Ai-ki̍p lâng kóng, tsit tiâu lōo sī oo-oo àm-àm, tsóng-sī tùi Í-sik-lia̍t bîn-tsiòng kóng, sī ū hûn-thiāu, hé-thiāu ê lōo. Lôo-hé sui-jiân jia̍t, lán thang sìn-jīm sai-hū, hé būe tì-kàu húi-bia̍t, tsí sī thùan-liān ê pó-tsìng. Nā-sī thùan-liān ûan-sîng, tsiū-sī būe siunn tsá, būe siunn bān, "gúa beh tshin-tshiūnn kè thùan-liān ê kim." (Iok-pik-kì 23:10)

Tng gúa kám-kak Siōng-tè lī gúa tsin hn̄g ê sî, kî-si̍t I óng-óng tsiū lī gúa siōng-kūn. "Gúa ê sîn tī gúa ê lāi-bīn hun khì ê sî, Lí tsai gúa ê lōo;" (Si-phian 142:3) Lán kiám tsai ū sím-mi̍h pí siōng tshàn-lān ê ji̍t-kng khah kng neh? Thinn tsi̍t ē kng, I tsiū tī pâng-king teh kiò lán, kui-ji̍t īng bû-hān ê un-jiû kap tsû-ài khùann-kòo lán, pīng-tshiánn I tsai lán beh kiânn ê lōo.

Sè-kan lâng tshú tsāi gi̍k-kíng ê sî, lóng kóng sī "thian-ì", khiok bô bîng-pi̍k i ê ì-gī. In tsiong ú-tiū kan khùann-kòo bān-mi̍h íng-u̍ah ê Tsú-tsáinn kàng keh tsùe bô sìnn-miā, sí-sí thiu-siōng ê kuan-liām. "Thian-ì" khùann-tsùe "miā", ná tshin-tshiūnn tsiong ū lîng-li̍k ê Siōng-tè kúann lo̍h I ê pó-tsō tsē-ūi.

Nā-sī lán khùann-tio̍h Iok-pik siū tio̍h siōng tshim-tîm ê khóo-lān, jîn-kan ê it-tshè hi-bāng lóng bô khì, án-ni lán hiān-tsāi sóo siū tshì-liān ê thòng-khóo tsiū sǹg-put-tit sím-mi̍h lah. Iok-pik bô khùann sím-mi̍h, tsí khùann Siōng-tè ê tshiú, sī kong-kik i ê lôo-po̍k kap gû-kûn ê Sī-pa lâng ê to-kiàm pūe-āu ê tshiú, sī húi-hūai it-tshè ê sih-nà āu-bīn hit ki tshiú, sī tshe khí sua-bôo jia̍t-hong tu̍at-khì i kiánn-jî sìnn-miā ê tshiú, kap i ê ka-hn̂g siū húi-bia̍t āu-bīn hit ki kiann-hiânn tsīng-tsīng ê tshiú.

Án-ni, Iok-pik tī múi tsi̍t kiānn sū lóng khùann tio̍h Siōng-tè ê tshiú, thang kóng, "Iâ-hô-hua siúnn-sù, Iâ-hô-hua the̍h-khì, tio̍h o-ló Iâ-hô-hua ê miâ." (Iok-pik-kì 1:21) Tsit ūi bat tshing-tsùe sua-bôo tiong ê ông-tsú, hiān-sî khiok "tsē tī hé-hu tiong." (Iok-pik-kì 2:8) iáu ūe kóng, "I beh thâi-sí gúa, gúa bô thang ǹg-bāng; tsóng-sī gúa beh tī I ê bīn-tsîng piáu-pi̍k gúa ê sóo kiânn" (Iok-pik-kì 13:15) I ê sìn-sim ná tiong-tàu ê ji̍t hiah tūa. --- J.R. Macduff

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw