《台語荒漠甘泉（全羅版）》

 | | | 轉寄

"Hok-pue muá-tshut-lâi"

作者 陳清俊 翻譯 2012.05.27

listen

Gō͘ ge̍h jī-tshit (Gō͘ ge̍h jī-tsa̍p-tshit ji̍t)

"The̍h lâi hō͘ guá." (Má-thài 14:18)

Tsit-sî, lí sī-m̄-sī tú-tú uī-tio̍h tsióng-tsióng ê khùn-lân, khiàm-kheh, tshì-liān, kín-kip teh tshau-huân? Tse sī Siōng-tè kiòng-ìng khì-bíng ê hong-huat beh ū Sìng-lîng kuàn-muá. Nā-sī ū tsìng-khak ê liáu-kái, tsiū khuàⁿ tse sī sin ê tsiok-hok, sin ê tsín-kiù ê ki-huē, sī tuì pa̍t-uī tit-buē-tio̍h ê.

Tsú kóng, "the̍h lâi hō͘ guá." Īng sìn-sim kap kî-tó the̍h khì-bíng kàu I ê bīn-tsîng. Tsīng-tsīng tī I bīn-tsîng, bô ka-kī tín-tāng, thìng-hāu I tsuè kang. I bô kiò lí tsuè, tsiū m̄-thang tsuè jīm-hô kang. Hō͘ Siōng-tè ū sî-kan lâi tsuè, I it-tīng uē tsuè. Tng tshì-liān ui-hia̍p lí kàu bô-sîn, sit-táⁿ, koh khùn-khó͘ ê sî, Siōng-tè beh īng lí só͘ m̄-bat ê hong-huat, hián-tshut I ê un-tián kap îng-kng tī lí ê sin-tsiūⁿ.

"The̍h lí ê su-iàu lâi hō͘ guá." --- A.B. Simpson "Koh guá ê Siōng-tè beh tsiàu I îng-kng ê pù-ū, tī Ki-tok Iâ-so͘, pó͘-tsiok lín it-tshè ê khiàm-kheh." (Hui-li̍p-pí 4:19)

Hô-tíng ê guân-thâu --- "Siōng-tè"! Hô-tíng ê kiōng-ìng --- "I îng-kng ê hong-hù"! Hô-tíng ê kuán-tō --- "Ki-tok Iâ-so͘"! Tsiong lí it-tshè só͘ su-iàu ê kau-thok hō͘ "I îng-kng ê hong-hù", sī thiⁿ só͘ sù hō͘ lí ê kuân-lī. Tī I uí-tāi ê thiàⁿ tiong-kan, I ǹg lí khai-hòng hit ê hong-hong hù-hù ê pó-tsông, īng sûn-tsin ê sìn-sim tsìn-ji̍p khì hiòng I the̍h, lí tsiū bô koh uá-khò pa̍t-hāng jīm-hô ê mi̍h-kiāⁿ. --- C.H.M.

Hok-pue muá-tshut-lâi (Si-phian 23:5)

Muá koh-tsài muá,
Tsú thang i-uá,
Muí pue thîn-muá,
Hô lâu kóng-tuā,
Bô pó-liû, tsin khuah,
Hong-sīng tsiap-suà,
Thiàⁿ-thàng kuàn-muá.

Muá koh-tsài muá,
Tsú tshin-tshiú tshuā,
Kám-un niá-siū,
O-ló I kiù,
Muá-tsiok tshim, lîng,
Lîng tsing, ba̍k bîng,
Sim khò Iâ-so͘,
Buán-tsiok ta̍k pō͘.

Muá koh-tsài muá,
Kóng I thiàⁿ tuā,
Tshim koh-khah tshim,
Tshuì kóng, kua gîm,
Kuân koh-khah kuân,
Kî-biāu thiàⁿ thuân,
O-ló tshing-siōng,
I miā bû-tsiong. -- Margraret E. Barber

“I kì-jiân bô sioh ka-kī ê Kiáⁿ, uī-tio̍h lán tsìng lâng hiàn I, kiám bô suà tsiong bān mi̍h pe̍h-pe̍h hō͘ lán mah?” (Lô-má 8:32)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org