《台語荒漠甘泉(全羅版)》

| | | 轉寄

"Tióng-tsìn"

listen

Káu ge̍h saⁿ-tsa̍p (Káu ge̍h saⁿ-tsa̍p ji̍t)

"I uî-se̍h i, khuàⁿ-kò͘ i, ... koh tshin-tshiūⁿ ing-tsiáu lā i ê siū, tī ing-á tíng-bīn ia̍t i ê si̍t, thí-khui si̍t-kó͘ lâi sîn i, tsài i tī i ê si̍t-kó͘. Tsí-ū Iâ-hô-hua tshuā i, bô pa̍t ê siōng-tè kap i tī-teh." (Sīn-bīng-kì 32:10-12)

Lán tsuân-lîng ê Siōng-tè, tshin-tshiūⁿ tuā ing-tsiáu, pó-hō͘ tài-niá i ê suè-tsiah ing-á, tshuā i kàu suaⁿ-gâi tíng, sak i lo̍h khàm, án-ni tsuè sī ài ing-á huat-tshut i í-tsîng só͘ m̄-tsai uē pe ê lîng-li̍k, tsit ê pe ê lîng-li̍k hō͘ i thang it-sing hióng-siū an-tsuân kap khuài-lo̍k. Tsóng-sī nā-sī ū guî-hiám, i uē kín-kín pe kàu ing-á ê ē-bīn īng i tuā si̍t-kó͘ sîn khí-lâi. Siōng-tè tshuā I ê kiáⁿ-jî tī hui-siông ê khùn-kíng tiong, iā sī án-ni, lán thang khò I tit tsín-kiù. --- tuì "Sìng-lī ê kua"

I tsiong tàⁿ hē tī lí sin tsiūⁿ, iā uē tsiong I ê king-kah tshiú-kut, hē tī lí ê ē-bīn.

Í-tsîng ū tsi̍t tsâng suè-suè ê tshiū siⁿ tī tuā siōng-tshiū kha, siū siōng-tshiū ê tì-ìm. Suè tsâng tshiū tsin huaⁿ-hí ū tuā tshiū ê pó-hō͘, kap an-tsīng. Tsóng-sī tsit tsâng sió tshiū m̄-tsai khah tuā ê un-huī beh lîm-kàu i lah.

Ū tsi̍t ji̍t, tsi̍t ê tshò-tshâ lâng tuà pó͘-thâu kàu tī tsi̍t ê tshiū-nâ, tsiong hit tsâng tuā siōng-tshiū phut tó tī tē bīn. Sió tshiū khai-sí khàu kóng, guá ê jia-phè hō͘ lâng the̍h khì lah. Hiān-tsāi nā khí tuā hong, á-sī tuā-hō͘, tsiū uē tsiong guá liân-kun khau khí-lâi.

Pó-hō͘ sió tshiū ê thiⁿ-sài tuì i kóng, "M̄-sī án-ni, hiān-tsāi ji̍t-thâu uē tsiò tio̍h lí, hō͘ uē ak tio̍h lí, pí í-tsîng ke tsiâⁿ tsuē pē. Lí ueh-ueh ê sing-khu beh tuā-tsâng, tuā kàu tsin suí. Lí tī ìm-iáⁿ ē buē huat-io̍k ê hue-m̂ beh tī ji̍t-kng ē khui tshut tshiò-iông. Lâng beh gōng-ngia̍h kóng, khuàⁿ ah, hit tsâng tshiū tuā kah hiah tuā tsâng ah! Kè-khì huaⁿ-hí ê jia-phè tû-khì āu, tióng-tuā kàu tsiah tuā tsiah suí!"

Tshin-ài ê sìn-tô͘, lín kiám bîng-pi̍k Siōng-tè uī-hô tsiong lín ê an-i̍k, ti̍k-kuân tû-khì sī beh hō͘ lín piàn tsuè kian-kiông ê ki-tok-tô͘ mah? Lín kiám bîng-pi̍k Siōng-tè uī-hô hùn-liān lâng tsuè I ê tsing-ping, bô hō͘ in tó tī sóng-khuài ê bîn-tshn̂g, khiok hō͘ in tsuè kan-khó͘ ê hîng-kun mah? I kiò in kiâⁿ kè sió khue, siû kè tuā hô, puâⁿ kè kuâiⁿ niá, pē iu-siong tîm-tāng ê puē-pau tiông-hok ê tn̂g-kî hîng-kun. Tse sī hùn-liān tsing-ping ê hong-huat. M̄-sī hō͘ in tshīng suí-suí ê kun-ho̍k, tī iâⁿ-mn̂g guā lâi-huê tuā pō͘ kiâⁿ, á-sī khì kong-hn̂g hông him-sióng in ê ui-hong. Siōng-tè ê tsing-ping tsí ū tī tsiàn-tàu tiong sán-sing, buē thang tī thài-pîng tiong liān tshut-lâi. Lán khó-lîng thang tsè-tsō tsing-ping ê kok-tsióng tsâi-liāu, tān-sī ài in piàn-tsuè tsin-tsiàⁿ ê bú-sū, tsiū in su-iàu phīⁿ-tio̍h hé-io̍h bī, tī tshìng-tsí pe-kè, tsà-tuâⁿ la̍k-lo̍h po̍k-tsà tiong siū hùn-liān, kan-taⁿ tī su-sik hô-pîng tiong ê sing-ua̍h sī buē-īng-tit.

Só͘-í tshin-ài ê sìn-tô͘, tse uē thang suat-bîng lí ê tsîng-hóng mah? Tsú sī-m̄-sī huat-hiān lí ê tsâi-lîng lâi puê-ióng? I sī-m̄-sī ke-thiⁿ lí sin tsiūⁿ tsing-ping ê phín-tsit, tsiong lí sak hiòng tsiàn-tàu ki̍k-lia̍t ê só͘-tsāi mah? Lí kiám buē thang tsiong I só͘ sù ê it-tshè un-sù kap bú-khì īng lâi tit-tio̍h sìng-lī mah? --- Tsarles H. Spurgeon


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org