《台語荒漠甘泉（全羅版）》

 | | | 轉寄

"Tshì-liān"

作者 陳清俊 翻譯 2013.02.03

listen


Jī ge̍h tshue-saⁿ (Jī ge̍h saⁿ ji̍t)

"Sìng sîn tsik-sî pik I khì khòng-iá." (Má-khó 1:12)

Siōng-tè īng tsin kî-kuài ê hong-sik lâi piáu-sī I ê huaⁿ-hí. "Tsik-sî" sī sím-mi̍h tāi-tsì lah, sī tī "thiⁿ li̍h-khui, Sìng-sîn tshin-tshiūⁿ tsíⁿ-á kàng-lîm tī I ê tíng-bīn;" koh ū Siōng-tè ê tsiok-hok kóng, "Lí sī guá só͘ thiàⁿ ê Kiáⁿ, guá huaⁿ-hí lí." (Má-khó 1:10-11) Tse sī tsin bô pîng-siông ê king-giām.

Guá ê lîng ah, lí iā ū tsit khuán ê king-giām. Lán tī siōng huaⁿ-hí khuài-lo̍k ê sî, hut-jiân siak lo̍h tī sit-bāng, sit-tsì tiong. Tsa-hng lí iáu sī pe tī khong-tiong, tuā-siaⁿ tshiùⁿ kua; kin-á-ji̍t, lí ê si̍t siu khí-lâi, lí ê kua-siaⁿ bô khì ah. Tiong-tàu, Siōng-tè tshiò-tshiò ū ji̍t-kng tsiò lí, àm-sî, lí tī hong-iá huat siaⁿ kóng, "guá ê tō-lō͘ ún-ba̍t tī Iâ-hô-hua." (Í-sài-a 40:27)

Guá ê lîng ah, tsit tsióng ê tuā tsuán-piàn pīng m̄-sī put-tsìng-siông. Lí kiám ū siūⁿ tio̍h "Tsik-sî" sī an-uì ê jī-gán mah? Uī sím-mi̍h tī tsiok-hok āu, hut-jiân khí piàn-huà? Guân-lâi, tse tsiū-sī tsi̍t liân-tshuàn tsiok-hok ê hong-sik. Siōng-tè ê kng tsiò, sī hùn-liān lí uē sik-ìng jîn-sing ê khòng-hān, Khik-se-má-nî, kap Kok-kok-thaⁿ ê khó͘-lān. I thê sing lí kàu khah kuân ê kíng-kài, sī tsing-ka lí ê li̍k-liōng, thang phài lí ji̍p tī o͘-àm, pang-tsān hiah ê sit-lo̍h, su-iàu pang-tsān ê lâng.

Lâng pīng m̄-sī tshut-sì tsiū uē sik-ìng khòng-iá ê sing-ua̍h. Ài ū king-li̍k tio̍h "kè Iok-tàn hô" ê pó-kuì king-giām, tsiah ta̍t tit tī khòng-iá ê sing-ua̍h. Tsí ū Jîn-tsú Iâ-so͘ ê īⁿ-siōng ê tsong-pī, lí tsiah uē kham-tit hū-khí Sìng-lîng ê kau-thok. Iā tsí ū Tsú Iâ-so͘ siū-sué só͘ tit ê îng-kng, tsiah uē tòng tit khòng-iá sì-tsa̍p ji̍t ê iau-gō. --- George Matheson

Tsiok-hok liáu-āu tsiū ū tsing-tsiàn.

Tshì-liān sī hong-hù sio̍k-lîng ê sū-gia̍p, sī tsin ti̍k-pia̍t ê sî-tsūn. Tshì-liān sī ná tē-gi̍k ê li̍k-liōng lóng pàng tshut lâi huán-tuì lí, sī ná tshin-tshiūⁿ lán ê lîng-hûn hām-lo̍h tī lô-bāng tiong. Lán ài tsai Siōng-tè ín-tsún mô͘-kuí ê tshiú giú lán. Tsóng-sī lán khak-sìn tsit ê sî-khik lóng sī hō͘ lán tit sìng-lī tsuè kiat-kio̍k. Kìⁿ-nā tsiong lîng-hûn kau-thok tī Siōng-tè ê lâng lóng beh án-ni tit sìng-lī. Tshì-liān liáu-āu uē kiat tsìng-gī kap hô-pîng ê ké-tsí. (Hi-pik-lâi 12:11), iā beh ū saⁿ-tsa̍p pē, tsi̍t-pah pē ê siu-sîng. (Má-thài 13:23) --- Aphra White


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.org