《台語荒漠甘泉（全羅版）》

"Sūn thian-ì"

作者 陳清俊 翻譯

listen







Gōo ge̍h jī-tsa̍p ji̍t

"Pē sóo hōo gúa ê pue, gúa kiám bô beh lim mah?" (Iok-hān 18:11)

Siōng-tè tùi lán ê thāi-tōo ê jīn-tsin, sùe-jī tsing-sim pí ūe-tôo-ka khah tsūe tshing pē í-siōng. I īng tsin-tsūe pi-siong ê ūe-pit, sik-tshái tī bô siâng ê khûan-kíng, lâi tsiong lán ūe sîng I sóo sióng-siōng siōng hó siōng súi ê hîng-siōng. Lán ài īng tsìng-khak ê sim-tsîng lâi tsiap-siū I hó-ì ê khóo-io̍h.

Lán nā tsiong I ê khóo-pue the̍h khui, sóo tshun ê kà-sī tsiū bô lōo-īng, iā lán ê sim-lîng sóo siū ê siong-hāi koh-khah tūa, ū-sî kàu būe thang póo-kiù ê thîng-tōo. Lâng būe thang sióng-siōng I sī īng bô-pí ê thiànn, sù lán khóo-io̍h. Lán tsóng-sī in-ūi líng-tām, bô tsim-tsiok, suah hōo tsit ê tūa lé-mi̍h sit-khì, bô tsiap-siū, kàu-bé lán ê lîng koo-ta, būe tsùe sím-mi̍h.

Tān-sī lán tī hong-bôo tiong iáu tshut ùan-giân kóng, "Tsú ah, gúa kám-kak tshùi-ta, gúa lāi-sim kám-kak tsin oo-àm!" Sùe-kiánn ah, gúa ài khóo-khǹg lí, "Phah-khui lí ê sim-mn̂g, tsiap-siū I ê khóo-io̍h, beh tī lí ê sim-tsîng, tsin-si̍t siōng ū tsin tūa ê sîng-tsiū kap hó-tshù." --- Tauler

Lâng pi-siong ê hoo-kiò ta̍t-kàu Siōng-tè hia kóng:
"Tsú ah, the̍h-khì gúa ê khóo-thàng,
Tû-khì tsit sè-kài ê im-iánn àm-khang,
Tû-khì hit ê só-liān tī sim-pâng,
Tû-khì si̍t-kóo tíng ê tāng-tànn, pe būe tín-tāng,
Tû-khì sè-tsiūnn ê khóo-thàng,
Hōo gúa lú thé-hūe Lí ê thiànn-thàng."

Tsú án-ni hûe-tap sè-kài ê hoo-kiò:
"Kiám-thang the̍h-khì,
hit-ê ūe tsing-ka jím-nāi ê khóo-thàng mah?
Kiám thang tû-khì,
hit ê hōo sim liâm sim, gūan-ì hi-sing ê lîn-bín mah?
Lí kiám beh sit-khì,
hiah ê king-kè hé ê thùan-liān lâi gióng-bōng ǹg thinn ê ing-hiông mah?
Gúa kiám thang the̍h-khì,
kam-gūan sún-sit, īng tāng-kè hi-sing kiù-sio̍k ê thiànn mah?
Lí kiám kam-gūan sit-khì,
hōo lí thang kàu Gúa tsia sóo su-iàu Ki-tok ê si̍p-jī-kè mah?

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw