《台語荒漠甘泉(全羅版)》

| | | 轉寄

"Bîn-á-tsài"

listen

La̍k ge̍h tshue-káu (La̍k ge̍h káu ji̍t)

"Tio̍h uá-khò Iâ-hô-hua lâi kiâⁿ hó, tiàm tī tsit ê thó͘-tuē, īng sîng-si̍t tsuè bí-niû." (Si-phian 37:3)

Guá bat tú-tio̍h tsi̍t ê sàn-tshiah hū-lú, tsuè sin-khó͘ ê tshiàⁿ-kang teh tō͘ ua̍h, tsóng-sī tsin hí-lo̍k, tik-sìng ê ki-tok-tô͘. Ū līng-guā tsi̍t ê ki-tok-tô͘ lú-sū, ū tsi̍t kang tuì i kóng, “Nancy, guá liáu-kái lí kim-ji̍t ê khuài-lo̍k ê tō-lí, tsóng-sī lí nā hiòng khah hn̄g lâi khuàⁿ, uē hō͘ lí huân-ló, tshin-tshiūⁿ ká-sú lí nā phuà-pīⁿ, buē thang tsuè kang, á-sī tshiàⁿ lí ê lâng puaⁿ lī-khui tsit só͘-tsāi, lí tsiū tshē bô kang-tsok, ká-sú i̍.”

Lán-sí kiò kóng, “Mài koh kóng lo̍h-khì, guá lóng m̄ bat siūⁿ tio̍h ‘ká-sú’. ‘Iâ-hô-hua sī guá ê bo̍k-tsiá, guá bô khiàm-kheh.’” (Si-phian 23:1) Jî-tshiáⁿ, tuì hit ê pi-kuan ê pîng-iú kóng, “Lí só͘-í uē būn-būn put-lo̍k tsiū-sī tsiah ê ‘ká-sú’ tsō-sîng ê. Lí siōng-hó kā hiah ê hìⁿ-sak, tan-tan uá-khò Tsú.”

Tsi̍t tsat sìng-king tsat, ài lí īng sûn-tsin gín-ná ê thāi-tō͘ khì tsiap-siū, koh uē hîng-tōng, tsiong ‘ká-sú’ tuì sing-ua̍h tiong tû-khì, tsiū-sī Tsú án-ni kóng, “lia̍h só͘ ū ê tsuè kàu-gia̍h; in-uī Siōng-tè ū kóng, Guá kuat-tuàn bô pàng-sak lí. Só͘-í lán thang hó-táⁿ kóng, Tsú tsiū-sī pang-tsān guá ê, guá bô beh kiaⁿ-hiâⁿ, lâng beh siáⁿ huat-tit guá ta-uâ?” (Hi-pik-lâi 13:5-6). (ta-uâ tsiū-sī nāi-hô; ū Tsú pang-tsān, lâng uē kā guá án-tsuáⁿ, tuì guá bô pān-huat?) ---Hannah Whitall Smith

Tsîng-lō͘, siông-siông ū huân-ló khue tòng-teh,
Koh o͘, koh khuah, koh tshim-té,
Im-muá ê tsuí, tng guá huâiⁿ-kè
Tsîng-bīn iáu ū thòng-khó͘ ê kê.
Tsóng-sī guá beh tshiò-tshiò tshiùⁿ kóng,
“Guá íng-uán phō tio̍h hi-bōng kap sìn ê gán-kong,
Guá uē tsiap-siū thòng-khó͘, tng bîn-á-tsài lâi,
Tān-sī, guá bô beh tī kin-á-ji̍t huân-ló bîn-á-tsài.”

Bîn-á-tsài ê kiô sī guî-hiám ê,
Guá m̄-káⁿ hiān-tsāi kā I kiâⁿ-kè,
Khuàⁿ i ê tshâ la̍k-la̍k, soh iô-iô tōng-tōng,
Kiô-niû uan-khiau bô ún-tòng,
Sim-lîng ah, siông-siông khǹg hi-bōng,
Lí tio̍h sìn-khò lâi tshiùⁿ kóng,
Guá uē tsiap-siū thòng-khó͘, tng bîn-á-tsài lâi,
Tān-sī, guá bô beh tī kin-á-ji̍t huân-ló bîn-á-tsài.”

Pe kuâiⁿ ê ing-tsiáu bô teh huân-ló án-tsuáⁿ huâiⁿ-kè hô.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD,由人光出版社出版, 歡迎洽購(06-235-6277分機(122~124) , e-mail:bo͘k@pctpress.org