《台語荒漠甘泉（全羅版）》

"Hok-pue múa-tshut-lâi"

作者 陳清俊 翻譯

listen







Gōo ge̍h jī-tsa̍p-tshit ji̍t

"The̍h lâi hōo gúa." (Má-thài 14:18)

Tsit-sî, lí sī-m̄-sī tú-tú ūi-tio̍h tsióng-tsióng ê khùn-lân, khiàm-kheh, tshì-liān, kín-kip teh tshau-hûan? Tse sī Siōng-tè kiòng-ìng khì-bíng ê hong-huat beh ū Sìng-lîng kùan-múa. Nā-sī ū tsìng-khak ê liáu-kái, tsiū khùann tse sī sin ê tsiok-hok, sin ê tsín-kiù ê ki-hūe, sī tùi pa̍t-ūi tit-būe-tio̍h ê.

Tsú kóng, "the̍h lâi hōo gúa." Īng sìn-sim kap kî-tó the̍h khì-bíng kàu I ê bīn-tsîng. Tsīng-tsīng tī I bīn-tsîng, bô ka-kī tín-tāng, thìng-hāu I tsùe kang. I bô kiò lí tsùe, tsiū m̄-thang tsùe jīm-hô kang. Hōo Siōng-tè ū sî-kan lâi tsùe, I it-tīng ūe tsùe. Tng tshì-liān ui-hia̍p lí kàu bô-sîn, sit-tánn, koh khùn-khóo ê sî, Siōng-tè beh īng lí sóo m̄-bat ê hong-huat, hián-tshut I ê un-tián kap îng-kng tī lí ê sin-tsiūnn.

"The̍h lí ê su-iàu lâi hōo gúa." --- A.B. Simpson

"Koh gúa ê Siōng-tè beh tsiàu I îng-kng ê pù-ū, tī Ki-tok Iâ-soo, póo-tsiok lín it-tshè ê khiàm-kheh." (Hui-li̍p-pí 4:19)

Hô-tíng ê gûan-thâu --- "Siōng-tè"! Hô-tíng ê kiōng-ìng --- "I îng-kng ê hong-hù"! Hô-tíng ê kúan-tō --- "Ki-tok Iâ-soo"! Tsiong lí it-tshè sóo su-iàu ê kau-thok hōo "I îng-kng ê hong-hù", sī thinn sóo sù hōo lí ê kûan-lī. Tī I úi-tāi ê thiànn tiong-kan, I ǹg lí khai-hòng hit ê hong-hong hù-hù ê pó-tsông, īng sûn-tsin ê sìn-sim tsìn-ji̍p khì hiòng I the̍h, lí tsiū bô koh úa-khò pa̍t-hāng jīm-hô ê mi̍h-kiānn. --- C.H.M.

Hok-pue múa-tshut-lâi (Si-phian 23:5)

Múa koh-tsài múa,
Tsú thang i-úa,
Múi pue thîn-múa,
Hô lâu kóng-tūa,
Bô pó-liû, tsin khuah,
Hong-sīng tsiap-sùa,
Thiànn-thàng kùan-múa.

Múa koh-tsài múa,
Tsú tshin-tshiú tshūa,
Kám-un niá-siū,
O-ló I kiù,
Múa-tsiok tshim, lîng,
Lîng tsing, ba̍k bîng,
Sim khò Iâ-soo,
Búan-tsiok ta̍k pōo.

Múa koh-tsài múa,
Kóng I thiànn tūa,
Tshim koh-khah tshim,
Tshùi kóng, kua gîm,
Kûan koh-khah kûan,
Kî-biāu thiànn thûan,
O-ló tshing-siōng,
I miā bû-tsiong.
-- Margraret E. Barber

“I kì-jiân bô sioh ka-kī ê Kiánn, ūi-tio̍h lán tsìng lâng hiàn I, kiám bô sùa tsiong bān mi̍h pe̍h-pe̍h hōo lán mah?” (Lô-má 8:32)

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw