《台語荒漠甘泉（全羅版）》

"Ki-tok tông-tsāi"

作者 陳清俊 翻譯

listen







La̍k ge̍h sann ji̍t

"Lán kè-lâi khì hit pîng hūann." (Má-khó 4:35)

Lán tsun-thàn Ki-tok ê bīng-līng, iā būe in-ūi án-ni tsiū būe tú-tio̍h hong-thai, po̍k-hong. Tī tsit tūann ê king-bûn ha̍k-sing tsun-thàn I ê bīng-līng, khiok tú-tio̍h kiông-lia̍t ê po̍k-hong. Kàu ū sit-khì sìnn-miā ê gûi-hiám, in tī khóo-lān tiong kiû-kiò Ki-tok ê pang-tsān.

Ki-tok tī lán siū-khóo ê sî, khó-lîng bô má-siōng lâi, put-kò tse sī in-ūi beh khó-giām pīng ka-kiông lán ê sìn-sim. I ê bo̍k-tik sī hōo lán ê kî-tó koh-khah ū li̍k-liōng. Lán kiû tsín-kiù ê sim lú pik-tshiat, tng tsín-kiù lâi kàu, lán lú ūe khah kám-siā.

Ki-tok un-jiû tsik-pī ha̍k-sing kóng, “Lín siánn-sū hiah kiann? Lín iáu-bē ū sìn mah?” (Má-khó 4:40) I ê ì-sù sī kóng, “Lín ūi-sím-mi̍h būe tshiò-tshiò bīn-tùi po̍k-hong, tùi kông-hong tūa-íng tūa siann kóng, ‘Lín būe thang siong-hāi tio̍h gúan, in-ūi úi-tāi ê Kiù-tsú Ki-tok tsiū tī tsûn tíng neh?’”

Tong-jiân tī ji̍t-kng phóo-tsiò ê sî sìn Tsú pí tī po̍k-hong tiong lâi sìn khah iông-ī. Tsóng-sī, kiông-hong sī tshik-giām lán ê sìn-sim, ài liáu-kái lán ka-kī tsin-tsiànn siong-sìn ê thîng-tōo. Tse tsiū-sī lán ê Kiù-tsú tī tsûn tíng ê iân-kòo.

Ká-sú lín nā “tiàm-tī Tsú kap I khùi-la̍t ê kûan-lîng lâi ióng-tsòng,” (Í-hut-sóo 6:10) lín ê li̍k-liōng ūe tī po̍k-hong tiong sán-sing.

Ū Ki-tok tī tsûn ni̍h hioh,
Tùi po̍k-hong gúa kánn tshiò.

Ki-tok kóng, “Lán kè-lâi khì hit pîng hūann.” I bô kóng “lán lâi khì hái tiong-sim sí tiàm hia.” --- Daniel Crawford

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw