《台語荒漠甘泉（全羅版）》

"An-tsīng tī Tsú bīn-tsîng"

作者 陳清俊 翻譯

listen







La̍k ge̍h tsa̍p-tshit ji̍t

"Tī in thâu-khak-tíng kiong-tshong ê tíng-bīn ū siann; in thîng ê sî, si̍t tsiū pàng lo̍h-lâi." (Í-se-kiat 1:25)

“In thîng ê sî, si̍t tsiū pàng lo̍h-lâi,” sī sím-mi̍h ì-sù? Lâng siông-siông mn̄g, gúa án-tsúann tsiah ūe thiann tio̍h Tsú ê siann-im? Hit ê pì-kuat tsāi-tī-tsia: tsiah ê “u̍ah-mi̍h” (Í-se-kiat 1:5) thiann-tio̍h siann-im … thîng ê sî, tsiong si̍t pàng lo̍h lâi.

Lán iā bat khùann tio̍h tsiáu-á hioh tī tshiū-ki tíng, tsóng-sī in ê si̍t iáu teh iô tsi̍t-ē, iô tsi̍t-ē. Tān-sī tī tsi̍t tsat kóng, “In thiann tio̍h siann-im, tsiū thîng lo̍h-lâi, si̍t iā pàng lo̍h lâi.”

Lí kiám bat tī Tsú ê bīn-tsîng tsē á-sī kūi ê sî, lí ê lîng ê si̍t iáu teh iô mah? Nā-sī án-ni, lí tī Siōng-tè ê bīn-tsîng tsiū bô tsin-tsiànn ê an-tsīng.

Tsi̍t ê lâng bô kúi ji̍t tsîng kā gúa kóng, “Gúa ūi tio̍h bóo tsi̍t hāng sū kî-tó, tsóng-sī iáu-būe tit-tio̍h hûe-tap.” Tsiū-sī kóng, i bô an-tsīng lo̍h lâi thiann Siōng-tè ê ūe tsiū lī-khui, tsiàu ka-kī ê siūnn-huat khì tsùe, kiat-kó tshòng kàu lūan-tshau-tshau, to̍h ài koh tîng lâi.

Ah, lán lōng-hùi jūa-tsūe king-li̍k, in-ūi lán kū-tsu̍at tsiong lán ê sim-lîng ê si̍t pàng lo̍h-lâi, būe thang tī Siōng-tè ê bīn-tsîng ûan-tsûan an-tsīng lo̍h-lâi, tì-kàu sún-sit tsūe-tsūe ê sî-kan? Bi̍k-sióng lán tī I ê bīn-tsîng an-tsīng thìng-hāu I ê hûe-tap sóo tit-tio̍h ê an-tsīng, hio̍h-khùn kap pîng-an!

Liáu-āu, kàu-sî, lán beh “tsáu-lâi tsáu-khì, tshin-tshiūnn sih-nà teh sih.” (Í-se-kiat 1:14) iā ti̍t-tsiap khì “sîn sóo beh khì ê sóo-tsāi.” (Í-se-kiat 1:20)

An-tsīng! Tsit-sî an-tsīng tiānn-tiānn!
Lîng sóo būe bat thiann,
M̄ sī tsiáu-á-siann,
M̄ sī hong, íng á-sī tshinn ê iánn,
Sī tùi hn̄g-hn̄g Siōng-tè hia,
Hōo su-hiong ê lîng-hûn huann-hí bô pí,
Tī tsīng-tsīng ê sî, tsiah ūe thiann-kìnn.

An-tsīng! Tsit-sî an-tsīng tiānn-tiānn!
Un-hô tinn-bi̍t ê iánn,
Bô thiann tio̍h jīm-hô kha-pōo siann,
Sī Iâ-soo sóo tshē An-ùi-tsiá,
Kà-sī I ê tsin-lí, sîn-sìng,
Tshiong-múa tī gūan-ì thìng-hāu ê lîng,
Lí nā beh thiann I ê sìn-sit, kong-tsìng,
Tshin-ài ê sim-lîng! Ài an-tsīng!

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw