《台語荒漠甘泉（全羅版）》

"Bīng-līng, kau-tài, huan-hù Siōng-tè"

作者 陳清俊 翻譯

listen







La̍k ge̍h jī-tsa̍p-sì ji̍t


"Gúa ê tshiú sóo-tsùe ê, lín thang kau-tài Gúa." (Í-sài-a 45:11)
Tsú Iâ-soo tùi Siōng-tè ê thāi-tōo sī án-ni, I kóng, "Pē ah, lí sóo hōo gúa ê, gúa ài in tī gúa sóo tī-teh ê sóo-tsāi, ia̍h kap gúa sann-kap tī hia." (Iok-hān 17:24) Iok-su-a tit-tio̍h tūa sìng-lī ê sî, giâ i ê tshiú hiòng beh lo̍h ê ji̍t tūa-siann kiò kóng, "Ji̍t-thâu ah, lí tio̍h thîng tī Ki-piàn ê tíng-bīn." (Iok-su-a 10:12) Í-lī-a iā īng tsit tsióng ê thāi-tōo tsóo-tsí thinn lo̍h-hōo; sann nî pùann liáu-āu, koh kiû hōo kàng lo̍h-lâi. Lōo-tik Má-ting (Martin Luther) tī i ê tông-sū Me-lán-tóng Hui-li̍p (Philipp Melantsthon) beh sí ê tsìn-tsîng kūi teh kî-tó kóng, m̄-tsún sí-bông tu̍at-khì i.Siōng-tè iau-tshiánn lán kap I ū tsit tsióng bí-biāu ê kuan-hē. Sìng-king kóng, "Gúa tshin-tshiú tián-khui tsiah ê thinn, thinn-tíng ê bān-siōng ia̍h sī Gúa sóo bīng-līng ê." (Í-sài-a 45:12) Lán tsai Siōng-tè ê lîng-li̍k tsiah tūa. Lán nā tsai, Siōng-tè iau-tshiánn lán thang bīng-līng, (kau-tài, huan-hù) I, lán kap I ê ji̍t-siông ê kuan-hē beh ū siūnn būe-tio̍h ê kái-piàn!Tsit tsióng thāi-tōo, kap lán siông-siông bô sìn-sim ê kî-tó, hûai-gî, bô tiānn-tio̍h, sī ū jūa tūa ê tsha-pa̍t! Lán siông-siông tiông-hok ê kî-tó, iā hōo kî-tó tshin-tshiūnn lāi-to, sit-khì i ê lāi-tōo.Hûe-sióng Iâ-soo tī tē-tsiūnn thûan-tō ê sî, siông-siông kiò lâng bīng-līng I. I kap ha̍k-sing beh lī-khui Iâ-lī-ko ê sî, Iâ-soo khiā teh, hûe-ìng kiò hit nn̄g ê tshinn-mî lâng lâi, kóng, "Lín ài gúa tsùe sím-mi̍h?" (Má-thài 20:29-32) Ná tshin-tshiūnn I ê ì-sù sī kóng, "gúa gūan hōo lí sú-iōng, hōo lí tshe-kah."Lán kiám būe-kì-tit, Iâ-soo ū thiann tsi̍t ūi Hi-lia̍p lâng, sī Sū-lī-hui-nî-ki lâng ê tshíng-kiû. Si̍t-tsāi I ì-sù kóng, lí sóo su-iàu ê ka-kī thang tsīn-liōng the̍h. (tsham-khó Má-khó 7:24-30)Lâng kiám ūe tshiong-hun liáu-kái Siōng-tè tsiong I ê kiánn-jî hē tī tsiah kûainn tē-ūi ê ì-gī mah? I ná tshin-tshiūnn kóng, "Gúa ê it-tshè li̍k-liōng lóng hōo lí sú-iōng." "Lín tī gúa ê miâ, hūan sóo kiû ê, gúa beh kiânn i;" (Iok-hān 14:13) --- F.B. Meyer
Tùi suann kóng, KhìKhì tó tī hái-ni̍h,Bô giâu-gî,I beh thiann-thàn lí,Bô hûai-gî, it-tīng sîng,Hōng Tsú ê miâ tùi lí ê suann hā līng!
Tshíng-kiû siū-sio̍k kuan-hē,Īng Tsú pó-huih lâi búe,Liân-ha̍p Sam-ūi it-thé,Tsiânn-tsùe tsin-si̍t bān-sè,It-tīng sîng, sū beh án-ni sîng,Hōng Tsú ê miâ tùi lí ê suann hā līng!
Tsū-su, pīnn-thiànn, pi-siong kap tsūe-ok,Tsú ūi I sóo thiànn ê lâng siū khóo-to̍k,Tī hit ji̍t I tam-tng,Hōo lí tit tsū-iû khùai-lo̍k,Khò I ê ūe, it-tīng sîng,Hōng Tsú ê miâ tùi lí ê suann hā līng!
Ûi-khún ti̍k-jîn siânn-tshiûnn,Īng bô siann kî-tó ê tshiú,Hōo i tó-lo̍h-khì,Huah-tshut o-ló sìng-lī.It-tīng sîng, sìn-sim pó-tsìng,Hōng Tsú ê miâ tùi lí ê suann hā līng!
Kian-kòo tâng-mn̂g thih-tshùann,Lóng-tsóng phah phùa,Tiong-sìn ê lâng tsìn-ji̍p,Tsing-ho̍k múi tsi̍t sùann,Bô kiann ti̍k-jîn, it-tīng sîng,Hōng Tsú ê miâ tùi lí ê suann hā līng!
Lia̍h-tiâu Siōng-tè sìn-si̍t, tsin-lí,Bô tsi̍t tiám á giâu-gî,Giâ sîn-jiah ê kúai lâi kí,Tsiong it-tshè iu-lū pàng-līKhiā tī Siōng-tè ìng-ún, it-tīng sîng,Hōng Tsú ê miâ tùi lí ê suann hā līng!

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw