《台語荒漠甘泉（全羅版）》

Tsùe ông ê kang

作者 陳清俊 翻譯

listen



Tsa̍p-it ge̍h tsa̍p-jī ji̍t

"Tsiah ê lâng lóng sī sio-hûi sai-hū, sī Nî-tha-ìng kap Ki-te-la̍h khiā-khí ê peh-sìnn; in tī-hia kap ông khiā-khí, tsùe ông ê kang." (I Li̍k-tāi-tsì-lio̍k 4:23)

Lán thang tī jīm-hô ê sóo-tsāi "kap ông khiā-khí, tsùe ông ê kang." Lán khó-lîng siū-tiàu khì siōng bô khó-lîng ê sóo-tsāi, tī siōng kan-lân ê tsîng-hîng ūi Tsú tsùe kang. Khó-lîng tī tsng-kha, kap Ông ê tsin-tsūe siânn-lāi ê u̍ah-tāng keh-lī. Iā khó-lîng tī "hue-hn̂g, kap lî-pa tshiū ê tiong-kan" ū tsin-tsūe tsóo-tòng kap that-gāi ûi teh. Iā lán khó-lîng sī sio-hûi sai-hū, tshiú nih ū kok-tsióng ê hûi-á thôo-phe, lâi ûan-sîng lán múi-ji̍t ê kang-tsok.

Tī tó-ūi lóng bô kuan-hē, Ông an-pâi lán tī hia, I ūe lâi kap lán tsùe-hé. Lî-pa, tsóo-gāi tùi lán iā ū lī-ik, nā-bô I tsá tsiū kā in súa-khui loh. Kìnn-nā tsóo-tòng lán ê mi̍h-kiānn, khó-lîng iā sī kā lán pó-hōo, tse kiám m̄-sī tsin ha̍p-lí ê mah? Hûi-á phe, he sī I jīm-ûi sik-ha̍p hē tī lán tshiú tiong ê mi̍h, sik-ha̍p hiān-tsāi ê "ūi ông tsùe-kang." --- Frances Ridley Havergal

Tshin-ài ê, kàu lí ê hn̂g tsùe-kang,
Kàu ji̍t lo̍h suann tsiah pàng,
Khún tshiū-tîn, pa̍k hue-tsâng,
Kàu Tsú-lâng kiò tsiū khin-sang.

Tsīn lí ê la̍t jīn-tsin tsùe tshing-khì,
Tsùe-kang m̄-sī lí ka-kī,
Khó-lîng tī keh-piah hn̂g tsùe-kang ê i,
Siu-tsíng i ê hn̂g, khùann tio̍h lí.

Ji̍t-lo̍h, sik-iông to-tshái, lia̍p-lia̍p-sih ê thinn-tshinn, úi-tāi ê kûainn-suann, hùan-iánn kng ê hái-kíng, phang-bī múa sì-kùe ê tshân-iá, sin-sian iām-lē ê hue, lóng būe thang pí tsi̍t ê thiànn Tsú ho̍k-bū sū-hōng Iâ-soo ê phóo-thong-lâng koh khah bí-lē, koh-khah súi. --- Frederick William Faber

Siōng súi siōng sîn-sìng ê lîng-hûn sī siánn-khúan? M̄-sī ū tshut-miâ ê, ū sū-gia̍p, kong-lô, lâu hōo lâng tui-su ê lâng. Sī tsi̍t ê kè pîng-tsīng, sìng-kiat sing-u̍ah ê lâng, tiām-tiām khui phang-phang ê hue bô ài lâng tsai, tshin-tshiūnn iu-kok bô lâng kàu tshing-tshing sió-khue pinn khui ê pik-ha̍p-hue. --- Kenelm Digby

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw