《台語荒漠甘泉（全羅版）》

"Kan-lân lâi tit sin ê li̍k-liōng"

作者 陳清俊 翻譯

listen

Tshit ge̍h jī-káu (Tshit ge̍h jī-tsa̍p-káu ji̍t)

"Lí bat ji̍p seh ê khòo-pâng, … Tsiū-sī Gúa sóo siu-khǹg lâi thìng-hāu hūan-lān ê sî." (Iok-pik-kì 38:22-23)

Lán ê tshì-liān sī hó ê ki-hūe, tān-sī lán siông-siông kā i tòng-tsùe that-gāi. Nā-sī lán bîng-pi̍k khùn-lân sī Siōng-tè īng lâi tsìng-bîng I tùi lán ê thiànn, múi tsi̍t ê that-gāi tsiū sī hioh-khùn ê sóo-tsāi, iā sī Siōng-tè tùi lâng hián-bîng giân-gú sóo būe thang hîng-iông ê li̍k-liōng. Ká-sú lán tsù-ì I îng-kng tsok-ûi ê kì-hō, múi tsi̍t phìnn hûn lóng sī ū khīng, múi tsi̍t tiâu khùn-lân ê suann-lōo lóng beh tsiânn tsùe tsiūnn-kûainn, kái-piàn hîng-siōng, tit îng-kng ê lōo.

Khùann lán ê kè-khì, ūe huat-hiān, tng lán jím-siū siōng-tūa ê ap-li̍k, múi tsi̍t tiâu lōo lóng būe thong ê sî, tsiū-sī Thinn-pē ūi lán tsùe tsû-ài ê sū, sù lán siōng hong-hù un-tián ê sî.

Siōng-tè ê siōng bí-lē ê pó-tsio̍h, īng siōng tshoo-lóo ê pau-tsong, īng siōng oh tùi-hù ê lâng sàng lâi ê. Tsóng-sī lán tī pau-tsong ê lāi-bīn ūe huat-kiàn ông-kiong ê pó-pùe kap Tsú sin-lông ê thiànn.

Lán pit-su sìn-khò Tsú kiânn tī oo-àm tiong, sīm-tsì tī kan-lân ê tsîng-hîng iā īng bô iô-tāng ê sìn-sim tsun-kìng I. Tsit tsióng sìn-sim ê siúnn-sù ná tshin-tshiūnn tsi̍t tsiah ūann-mn̂g ê tūa ing-tsiáu sóo tit-tio̍h, tsiū-sī tiông-sin ū tshing-tshun kap sin ê khùi-la̍t. --- J.R. Macduff

Nā-sī lán ūe khùann bī-lâi ê tāi-tsì,
Tshin-tshiūnn Siōng-tè án-ni,
Ká-sú sóo-ū ê hûn tshe-khui, im-iánn bô khì,
Lán bô kiann hiān-tsāi ê siong-pi,
Múi ê hûan-ló kín-kín tsiū būe-kì,
Ū tsūe-tsūe hí-lo̍k teh tán gúa kap lí.

Nā-sī lán ūe tsai bī-lâi ê tāi-tsì,
Tshin-tshiūnn Siōng-tè án-ni,
Ūi-sím-mi̍h pó-pùe sit-khì,
Ūi-sím-mi̍h ba̍k-sái tsha̍p-tsha̍p-tih,
Ūi-sím-mi̍h oo-àm thàu-kàu kng-bîng;
Ūi-sím-mi̍h àm-lōo kín-kín tit kng-liōng,
Jîn-sing ê óng-khut tit siu-tsìng,
Sìn-sim án-ni kóng.

Lán siông kóng, “lán beh khùann, beh tsai sī án-ni, …”
Tsóng-sī Siōng-tè īng thiànn, tī lán lōo-nih hē pòo-lî,
Khùann būe tio̍h tsîng-bīn ū sím-mi̍h,
Ài lán kín-kín khînn-tiâu tī I,
I tshūa lán kàu tsi̍t-sì.
Siong-sìn kap tsun-thàn I.



附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw