《台語荒漠甘泉（全羅版）》

"Gúa ê un-tián kàu-gia̍h lí īng"

作者 陳清俊 翻譯

listen


Pueh ge̍h tshue-gōo (Pueh ge̍h gōo ji̍t)

"Ū gúa ê un, lí tsiū kàu-gia̍h." (II Ko-lîm-to 12:9)

Siōng-tè “huann-hí” (I Ko-lîm-to 1:21) tsiong gúa ê siōng sùe-hàn ê kiánn-jî tùa lī-khui tsit ê sè-kài. Tsit ê giâm-tiōng ê khó-giām hōo gúa tsin thòng-khóo. Gúa tsiong sùe-sùe ê si-thé hē ji̍p tī bōng ni̍h í-āu, tùi kàu-tn̂g ê bōng-tē tńg-lâi ê sî, ū tsi̍t ê li̍k-liōng ài gúa ǹg hūe-tsiòng suan-kóng siū khóo-lān ê ì-gī.

Gúa huat-kiàn āu ê lé-pài-ji̍t tsú-ji̍t-o̍h ê khò-tê sī “Gúa ê un, kàu-gia̍h lí īng” Gúa tsiū īng i tsùe tê-ba̍k, sī Tsú tùi hūe-tsiòng tùi gúa ê sìn-sit. Tsóng-sī gúa tsún-pī káng-tsiunn ê sî, huat-kiàn gúa pīng bô tsin-tsiànn tsit-tsióng ê sing-u̍ah thé-giām. Gúa kūi-lo̍h, kiû Tsú hōo I ê un-tián tùi gúa ū kàu-gia̍h īng. Gúa teh kiû ê sî, ba̍k-tsiu phah-khui tsi̍t-ē khùann, tsit kù king-bûn í-king tsng-khing kùa tī piah-tíng. Sī gúa ê lāu-bú nn̄g-sann kang tsîng hōo gúa ê. Hit-sî gúa iáu sī tī sit-khì kiánn tōo-kà ê sóo-tsāi, lâng bô tī tshù ni̍h. Gúa tshiánn lâng kā i kùa khí-lâi, tān-sī bô tsù-ì tio̍h tíng-bīn ê jī. Tsit-sî gúa giâ thâu tsi̍t-ē khùann, hiah ê jī tsiū tī gán-tsîng. “Gúa ê un-tián sī kàu-gia̍h lí īng.”

“Sī” sī īng bîng-hián ê li̍k-sik siá, “gúa ê” kap “lí” koh īng līng-gūa tsi̍t sik piau tshut-lâi. Ū tsi̍t ê sìn-sit má-siōng ji̍p gúa ê sim-lîng lāi. Ná tshin-tshiūnn tsik-pī gúa ūi-sím-mi̍h iau-kiû Tsú “hōo lí ê un-tián kàu-gia̍h gúa īng”, gúa tsha-put-to thang thiann-kìnn I ê tap-hok: “Lí thài ūe iau-kiû í-king “sī” ê mi̍h-kiānn neh?” Gúa būe hōo gúa ê un-tián pí gúa í-king hōo lí ê khah tshiong-tsiok. Khí-lâi, sìn i. Lí ūe huat-hiān tse sī tsin-tsin si̍t-si̍t ê sing-u̍ah king-giām.

Tsú ê ūe kóng tit tsin kán-tan. “Gúa ê un-tián sī, (“m̄-sī tsiong-lâi, á-sī khó-lîng”), kàu-gia̍h lí īng” Hit-sî khí, “gúa ê” “lí” kap “sī” tsit sann jī tsiū íng-úan khik tī gúa ê sim-lāi, būe bô khì. Kám-siā Tsú, tùi hit kang khí, gúa it-ti̍t lóo-li̍k sing-u̍ah tī hit ê tsin-lí ê si̍t-tsāi ni̍h.

Tsit-ê king-giām hōo gúa kap gúa sóo siūnn beh thûan-ta̍t hōo lâng ê kà-sī sī: Bo̍h-tit tsiong Siōng-tè í-king si̍t-hîng ê sū iáu teh hi-bōng, iáu teh kiû. Ing-kai sóng-sóng khùai-khùai tsiap-siū tsit ê hiān-si̍t. Lí tsiū ūe huat-hiān tsí-iàu lí siong-sìn, Siōng-tè ê un-tián kàu-gia̍h lí īng. --- H.W. Webb Peplue

Tànn ná tāng, un-tián ná tit the̍h,
Kang lú tsùe, li̍k-liōng lú ke,
Thòng-khóo tsing-ka, lîn-bín khah tsūe,
Tshì-liān ka-pē, pîng-an iā ka-pē.

Tng jím-nāi kàu hān-tōo, būe tòng,
Tng li̍k-liōng pùann-kang tsiū bô lōo-iōng,
Tng sóo-ū tsu-gûan īng kàu tsīn-pōng.
Thinn-pē hong-hù ê siúnn-sù tsiah khai-sí hîng-tōng.

I ê thiànn bô hān-liōng, koh ū būe tshik-to̍k ê un,
I sù lâng bû-hān li̍k-liōng tn̂g-tn̂g kú-kú,
Tī Iâ-soo lāi, bû-kiông ê hong-hù,
I siúnn-sù, koh siúnn-sù, tsài siúnn-sù.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw