《台語荒漠甘泉（全羅版）》

"Siōng-tè ê ìng-ún"

作者 陳清俊 翻譯

listen


Pueh ge̍h tsa̍p-jī (Pueh ge̍h tsa̍p-jī ji̍t)

"í-king ū pó-pùe kap ki̍k tūa ê ìng-ún siúnn-sù lán." (II Pí-tik 1:4)

Tsō tsûn ê lâng tsō hó tsi̍t tsiah tsûn, i kiám tsí-sī kā i khǹg tī tsûn-khòo nih? Tong-jiân m̄-sī; i tsō tsûn sī beh hōo tsûn thang khì hâng-hái, khì kiânn tī hái-siōng bīn-tùi hong-íng. Sū-si̍t-siōng, i tsō-tsûn ê sî, nā bô kè-ūe tsûn ūe tí-tng, ū kàu ióng tòng ūe-tiâu kông-hong tūa-íng, i tsiū bô kàu tsu-keh tsō tsûn.

Siâng-khúan, Siōng-tè pûe-iúnn lí tsùe sìn-tôo, I it-tīng beh tshì-giām lí. I sù hōo lí ìng-ún, kiò lí siong-sìn, I hi-bāng lí tsià-tio̍h tsiah ê ìng-ún khì ìng-hù jîn-sing tiong ê po̍k-hong hái-tô. Lí kiám siūnn I ê ìng-ún sī ké ê, ná tshin-tshiūnn tsi̍t niá kiù-sing-i, tī siong-tiàm lāi tsin hó khùann, the̍h kàu tī tsúi-tíng khiok bô lōo-īng mah?

Lán ū khùann tio̍h tsing-bí ê kiàm, tsóng-sī būe thang tsùe sio-thâi lâi īng, iā kìnn kè tsùe tsong-sik ê ûe, būe thang tsùe kiânn lōo īng. Tān-sī Siōng-tè ê ûe sī īng thih, īng tâng tsùe ê, lán thang tshīng i, tsi̍t lōo kiânn kàu thian-tông iā būe bûa-ui khì. Lán tshīng I ê kiù-sing-i thang tī Tūa-se-iûnn siû-tsúi tsi̍t tshing pái iā m̄-kiann tîm lo̍h-khì. I ê ìng-ún ê ūe sī ài lí khì tshì, khì īng.

Ki-tok siōng bô huann-hí lâng kong-khai sìn I, khiok bô īng I. I huann-hí lán kā I sú-iōng, in-ūi I kap lâng ê li̍p-iok sī sù-hok-khì ê, m̄-sī beh hōo lâng him-sióng ê, khùann ê, sī ài lán kā īng. Tsú Iâ-soo ê siúnn-sù sī beh hōo lán hiān-tsāi tsiū kā i sú-iōng, lí sī-m̄-sī tsīn tsik-jīm lâi sú-iōng ah?

Ah, Tshin-ài ê pîng-iú, gúa kiû lí m̄-thang tsiong Siōng-tè ê ìng-ún tòng-tsùe khǹg tī phok-bu̍t-kúan ê pó-pùe mi̍h, ài kā i sú-iōng, tsiânn-tsùe ji̍t-siông an-ia̍t sing-u̍ah ê tsu-gûan. Bô lūn sím-mi̍h sî lí su-iàu, tsiū sìn-khò Siōng-tè. --- Tsarles H. Spurgeon

Kàu Siōng-tè ìng-ún ê tshim-tshù,
Tsīn lí sóo ài khì tshú,
I ê sù-hok sī hong-hù,
I sóo kóng ê ūe it-tīng si̍t-hiān múi tsi̍t kù.

Siōng-tè thái-ūe tùi I sóo ìng-ún ê tāi-tsì kóng m̄ neh?


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw