《台語荒漠甘泉（全羅版）》

"Bô tī gúa tsia"

作者 陳清俊 翻譯

listen


Pueh ge̍h jī-la̍k (Pueh ge̍h jī-tsa̍p-la̍k ji̍t)

"Tshim-ian kóng, bô tī gúa tsia." (Iok-pik 28:14)

Ū tsi̍t ê sú-ká, gúa siūnn beh khì hái-siōng lú-iû, kiânn-kàu hái pinn, hái-iûnn ná tshin-tshiūnn án-ni tùi gúa kóng, “Bô tī gúa tsia.” Hái-iûnn pīng būe-thang hōo gúa sóo siūnn ài tsùe ê. Gúa koh siūnn “Bô tiānn-tio̍h suann ūe hōo gúa tit-tio̍h hioh-khùn.” Gúa tsiūnn suann. Keh tńg tsá-khí, gúa sóo ài khùann hit ê tsòng-kuan ê suann-be̍h, tsá-khí-sî ji̍t-tshut ê kong-hui, tsóng-sī gúa bô tit-tio̍h múa-ì, suann kóng, “Bô tī gúa tsia.”

Gúa su-iàu ê sī Siōng-tè tshin-tshiūnn hái-iûnn tshim ê thiànn, kap tshin-tshiūnn kûainn suann ê tsin-tō. I ê tì-hūi ê kûainn tshim, m̄-sī hái ê tshim kap suann ê kûainn ūe thang pau-iông, iā m̄-sī tsu-pó, n̂g-kim, pó-tsio̍h thang pí-phīng. Ki-tok tsiū-sī tì-hūi, I sī lán tshim-tshim sóo su-iàu. Lán lāi-sim ê put-an tsí-ū tùi I hōo lán íng-úan ê iú-gî kap thiànn-thàng ê khé-huat lâi pîng-tsīng. --- Margaret Bottome

Gúa ê sim tī hia!
Tī íng-úan ê suann, gúa sóo thiànn ê, sóo tùa ê tshù-the̍h,
Tī pik-ha̍p-hue, tsúi-sian-hue tiong,
Tī pe̍h-sik tūa Pó-tsō ê kong-hui ē,
Tsē tī tíng-bīn, Tsú ê tshiò-iông tiong,
Thâu-mn̂g huat-kng kim-sik tsíng-tsê,
I bô-piàn ê iông-māu koh-khah bí-lē ---
Gúa ê tsâi-pó kap sim lóng tī hia hē!

Gúa ê sim tī hia!
Bān-mi̍h sìnn-miā piàn-hùa, tng kap Tsú tsùe-hé,
Sinn, sí, tī I ê kè-ūe,
I un-hô, úi-tāi, un-jiû koh kong-gī,
Gâu khuan-iông, ū-la̍t tsín-kiù lâng ê pē,
I bí-hó sûn-kiat ê lîng, hōo thinn-tíng khah tsòng-lē,
Hia sī gúa kî-tó ài khì ê tē...
Gúa ê tsâi-pó kap sim lóng tī hia hē!

Lí būe thang tsiong tsi̍t tsiah ing-tsiáu kuainn tī tshiū-nâ lāi. Īng siōng bí-lē ê tsiáu-á ûi tī i sin-pinn, tsō tsi̍t ê siū tī kûainn-kûainn ê siông-tshiū tíng hōo I hioh, koh kiò kî-thann ê tsiáu-á kiòng-ìng i tsin-tsūe tsia̍h-mi̍h. Tsóng-sī tsiah-ê i lóng bô ài. I sóo ài ê sī tián-khui i ê si̍t pe kàu tī kûainn-kûainn ê A-lú-pí (Alpine) suann-gâi, ba̍k-tsiu ǹg i tsóo-sian sóo tùa tī suann-gâi tsio̍h-piah ê tshù, ū po̍k-hong háu, ū tsúi-tshiâng tshiâng lo̍h-lâi ê siann, thian-jiân im-ga̍k ê lāi-bīn.

Lán ê lîng-hûn iā khat-bōng tshin-tshiūnn ing-tsiáu pe kûainn-kûainn, tsí-ū hioh tī Bān-kóo Tsio̍h-pûann tíng. I ê tsóo-ke tsiū-sī thinn-tíng ê tiûnn-sóo, sī Siōng-tè īng ko phín-tsit ê tsio̍h-pûann sóo tsō ê. Hui-hîng tī îng-hûa ê khong-tiong tsiū-sī íng-úan! “Tsú ah, Lí ta̍k sè-tāi tsùe gúan khiā-khí ê sóo-tsāi.” (Si-phian 90:1) --- J.R.Macduff

“Gúa ê ke sī Siōng-tè”, Ki-tok tshūa gúa hûe,
Gúa am khǹg tī I ê tshiú-té,
I tùa gúa kàu an-tsûan ê tē,
Tshūa gúa I sóo kiânn kè,
Kap Siōng-tè khiā khí tī tsì-sìng lāi-té.
Tī I lāi-bīn huann-hí hó-sè,
Sìng ê sóo-tsāi, sîn-sìng ê ke,
Siōng-tè kiánn-jî sóo tùa tshù-the̍h.

“Gúa ê ke sī Siōng-tè”, í-tsîng m̄-sī,
Mî-ji̍t ka-kī kiânn, ka-kī khì,
Ǹg-bāng tī gúa sim-lāi tshē tio̍h tsin-lí,
Sóo tsùe lóng kui tī khang-khang bô-mi̍h,
Ûan-tsûan sit-pāi, múa-sim kiann-hiânn bô-pí,
Jiân-āu huat-kiàn, î-it ê tō-lōo, Ki-tok tsiū-sī,
Gúa pit-su kau tshut, ûan-tsûan tùa-tī I,
Sī Siōng-tè án-ni tùi gúa kóng-khí.

“Gúa ê ke sī Siōng-tè”, hiān-tsāi an-sin ê sóo-tsāi,
Siōng-tè tùi-hù gúa tshì-giām sing-u̍ah ê sè-kài,
Ûi-lûi pó-hōo, bián siū po̍k-hong, hām-hāi,
I the̍h khì gúa ji̍t-siông tāng-tànn pi-ai,
Ah, bí-hó sîn-sìng ê ūi, gúa sóo ài!
Siōng-tè kiánn-jî an-tsûan bih ê sóo-tsāi,
Tsú, gúa tiàm tī Lí, Lí tī gúa sim lāi.
Tû Lí í-gūa, pa̍t-mi̍h lóng bô ài.
Gúa hioh tī siōng súi ê ke,
Gúa ê lîng thang íng-úan khùann Pē,
Gúa ê Siōng-tè, sī bān-ū, bû-sóo put-tsāi.
Gúa ê ke tsiū-sī Siōng-tè.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw