《台語荒漠甘泉（全羅版）》

"Siū-khóo ha̍k-hāu"

作者 陳清俊 翻譯

listen


Káu ge̍h tshue-jī (Káu ge̍h jī ji̍t)

"In-ūi í-king siúnn-sù lín, ... koh ūi-tio̍h I siū khóo." (Hui-li̍p-pí 1:29)

Siōng-tè kúan-lí tsi̍t-king tsin kùi ê ha̍k-hāu, tī i ê kong-khò sī īng lâu ba̍k-sái lâi o̍h ê. Tsa̍p-tshit sè-kí tshing-kàu-tôo bo̍k-su, Ba̍k-su-tē (Ritsard Baxter) án-ni kóng, "Kám-siā Lí gōo-tsa̍p-pueh nî lâi tī gúa tsit ê sin-thé ê kúan-kàu." I tong-jiân m̄-sī î-it ūe hùa khùn-lân tsùe sìng-lī ê lâng.

Lán Thinn-pē tsit king ha̍k-hāu tùi lán lâi kóng sī tsin kín beh kiat-sok. Ha̍k-kî bé, tsi̍t-kang tsi̍t-kang tsiap-kūn. Gūan lán bô tô-phiah kan-lân ê kong-khò, iā bô siám-khui kúan-kàu ê kúainn. Lán nā ūe khùai-lo̍k kian-tshî kàu-té, lán ê bián-liû beh koh-khah kong-hui, thian-kok koh-khah tinn-bi̍t. Án-ni lán thang kong-îng, kiau-ngōo lâi pit-gia̍p. ---Theodore L. Cuyler

Sè-kài siōng bí-lē ê hûi-khì, siōng-tsió ài tī iô-nih sio sann pái. Ū-ê ài sio koh-khah tsūe pái. Dresden sóo tshut-sán ê kùi-tiōng hûi-á lóng it-tīng sio sann pái. Ūi-sím-mi̍h pit-su king-li̍k tsiah-nih kûainn jia̍t neh? Sio tsi̍t-pái, á-sī nn̄g-pái kiám būe sái mah? Būe īng-tit, hó ê hûi it-tīng ài sio sann-pái, án-ni hōo kim-sik, âng-sik kok-tsióng sik-tì kìng-ka iánn-ba̍k bí-lē, koh būe thè-sik.

Lán sī tsiàu tsit ê gûan-lí lâi liap-tsō ê, jîn-lūi sing-u̍ah tiong ê bûa-liān, ná tshin-tshiūnn hé put-tūan ê sio-liān lán. Tùi Siōng-tè ê un-tián bí-lē ê sik-tshái tī lán lāi-bīn hîng-sîng, íng-úan tshàn-lān bô thè. --- Cortland Myers

Sè-tsiūnn siōng súi ê hue bô khui tī ū ji̍t ê pînn-iûnn,
Sī tī kip-piàn tē phùa-lia̍t ê tsio̍h-phāng tsiūnn.
Siū-siong tī hong-hōo, hé-tsai, hé-suann hu,
Siōng-tè sùe-sùe siann i-tī sóo ū.
Tùi tshim-ian, tsio̍h-phāng piak-khui,
Lâu tshut u̍ah-tsúi,
Àm-sî thinn-sài sù un-jiû lōo-tsúi,
Tshing-tsá, Jîn-tsú lâi tshái hue-lúi.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw