《台語荒漠甘泉（全羅版）》

"Tshim ê thôo"

作者 陳清俊 翻譯

listen


Káu ge̍h tshue-káu (Káu ge̍h káu ji̍t)

"Ū-ê (tsíng-tsí) ka-la̍uh tī tsio̍h-keh ê tūe, thôo tshián ê ūi; in-ūi thôo bô tshim, tsiū huat tsin kín; nā-sī ji̍t tshut pha̍k i; in-ūi bô kun, tsiū koo-tâ." (Má-thài 13:5)

Bô tshim! Tùi tsit ê iā tsíng-tsí ê phì-jū, thôo ê tshim-tshián kap lán tūa-tūa ū kuan-hē. Kiat-si̍t pah pē ê tsíng-tsí sī lo̍h-tī "hó thôo" (Má-thài 13:8), tsiū-sī sîng-si̍t, siān-liông ê sim-tiân nih. Gúa siūnn hiah ê "thôo bô tshim" tshián-po̍h ê lâng, in ê sìnn-miā bô sím-mi̍h bo̍k-tik, tsin iông-ī ūi-tio̍h un-hô ê tshíng-kiû, hó-thiann ê káng-tō, kán-tan ê im-ga̍k siū tsó-iū. Piáu-bīn khùann, in ūi Siōng-tè tsùe kang, tsóng-sī "thôo-tshián", tsùe lâng bo̍k-piau bô tshim-tōo bô tsin-sîng, bô tsin-tsiànn jīn-bat Siōng-tè ê tsí-ì khì tsip-hîng ê sim. Sóo-í lán tio̍h hó-hó lâi pûe-ióng lán sim-lîng ê thôo.

Tng tsi̍t ê tshūa-lōo-tsiá, á-sī tō-iû, tùi tsi̍t ê Lô-má ê sū-ping kóng, ká-sú lí kian-tshî beh kiânn tsit tiâu lōo, khó-lîng beh sòng-sit sìnn-miā. Sū-ping hûe kóng, "Gúa bô kiânn tsit tiâu būe-sái, m̄-sī bô u̍ah būe-sái-tit." Tse tsiah sī tsin-tsiànn ū tshim-tōo ê siong-sìn. Lán tio̍h ū kian-sìn, tsiah ū tsok-ûi. Hu-tshián ê sìnn-miā sóo khò ê sī tshiong-tōng, piáu-bīn hiān-siōng, ti̍t-kak, pún-lîng kiû sing-tsûn, tūa-pùann khùann khûan-kíng. Nā-sī tshim-sìn phín-keh ê lâng, gán-kong ūe tshiau-tshut tsiah ê, kha-pōo ún-ún, hiòng-tsîng tsìn. I khùann hiah-ê iu-siong, bo̍k-tsîng piáu-bīn ê sit-pāi, tshò-tsiat, lóng beh siū kái-ūann, píng kè-lâi. In sái-tsûn, tsǹg-kè po̍k-hong-hōo, oo-hûn, tsìn-kàu tī teh tán in ê tshàn-lān tùi-hūann.

Siōng-tè it-tàn kā lán tshim-hùa, hōo lán bîng-liâu tshim-ji̍p ê tō-lí, liáu-kái siōng-tshim ê ò-pì, koh ūe tsiong khah tūa ê kûan-pìng kau-tài lán. Tsú ah, tshūa gúan tsìn-ji̍p Lí sìnn-miā ê tshim-tshù. Tsiong gúan sìnn-miā hu-tshián ê thóo-tē thê-sing piàn tshim khí-lâi!

Hōo sîn-sìng īnn-siōng kàu khuan-khuah tiûnn-sóo,
Hōo Sìn-sim kap thiànn-sim kàu kûainn, tshim ê tē-pōo,
Tsìn-tsîng, hiòng-siōng, ûan-tsûan thé-hūe khînn-tiâu
I tùi thinn-tíng lâi ê hoo-tiàu. --- A.B.Simpson


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw