《台語荒漠甘泉（全羅版）》

"Oo-àm khùann bô lōo"

作者 陳清俊 翻譯

listen

Tsa̍p ge̍h tshue-tshit (Tsa̍p ge̍h tshit ji̍t)

"Lín tiong-kan tsí-tsūi kìng-ùi Iâ-hô-hua, thiann-thàn I ê lôo-po̍k ê ūe ah? kiânn tī oo-àm bô-ū kng-bîng ê, tio̍h úa-khò Iâ-hô-hua ê miâ, úa-khò i ê Siōng-tè." (Í-sài-a 50:10)

Sìn-tôo tú-tio̍h oo-àm, tsi̍t-tsióng khùn-jiáu, hun-lūan ê oo-àm, m̄-sī sio̍k sim-lîng ê, sī lí-tì-siōng ê oo-àm, beh án-tshúann? Tng tsit-tsióng oo-àm lîm-kàu tī khiân-sîng, tsiàu Siōng-tè tsí-ì kiânn ê sìn-tôo, i siông-siông m̄-tsai beh án-tsúann tsùe, iā m̄-tsai tio̍h kiânn tó tsi̍t tiâu lōo. I ê thinn oo-hûn tà lâi, tsîng-bīn ê lōo bô kng, sóo-í i kám-kak ka-kī tī oo-àm tiong kiânn bô lōo.

Tshin-ài ê sìn-tôo, lí sī-m̄-sī tī tse tsōng-hóng? Tī oo-àm tiong beh án-tsúann? Tio̍h thiann Siōng-tè ê ūe. "Úa-khò Iâ-hô-hua ê miâ, úa-khò i ê Siōng-tè." Sū-si̍t-siōng tī tsit ê tsîng-hîng, tāi-sing, tsiū sím-mi̍h sū iā mài tsùe. Tùi jîn-sìng khùann án-ni tsùe (bô tsùe sím-mi̍h sū) sī tsin khùn-lân ê. Tsi̍t kù sio̍k-gú kóng, "Tú-tio̍h kín-kip sū, m̄-thang bô-îng lūan-lūan tsùe."Iā tsiū-sī kóng, "tng lí iáu m̄-tsai tsîng-hîng, m̄-tsai án-tsúann tsùe ê sî, sím-mi̍h iā m̄-thang tsùe." Lí nā tú-tio̍h lîng-sìng siōng ê bê-hi̍k, m̄-thang hiòng-tsîng tshiong, ài tsiong sing-u̍ah ê pōo-tiāu piàn bān. Ū pit-iàu ê sî, tsiong lí sìnn-miā ê tsûn pàng tsûn-tūa tī tsúi-té (thîng-tsí kiânn), á-sī pa̍k tī bé-thâu.

Tī tsit-sî sìn-khò Siōng-tè tsu̍at-tùi bô m̄-tio̍h. Lán ê thâu-náu tsiah ūe pîng-tsīng, lāi-sim iā ūe pîng-an. Lán ài tsiong lán ê tshiú khǹg tī I ê tshiú nih, tshin-tshiūnn gín-ná, hōo I tshūa lán ji̍p tī I thiànn ê tshàn-lān kng-bîng nih. I tsai kiânn-tshut oo-àm ê lōo, sóo-í gūan lán ūe khînn-tiâu I, sìn-khò I ūe kiù lán, tsí-sī lán kiânn siōng-kín koh khó-khò ê lōo. --- Pardington phok-sū

Ūe-kì-tit, tī lán m̄-tsai kiânn tó tsi̍t tiâu lōo-sùann ê sî, lán ū tsi̍t ūi tshūa lán kiânn ê tsûn-tiúnn.

Kian-tshî, gúa ê sim ah, kian-siú sóo sìn ê tsín-kiù,
Kian-siú kàu té ūe iânn-tio̍h bián-liû,
Tī kông-hong po̍k-hōo tiong bo̍k-bo̍k-siû,
Bô tūa ê tsûn it-tīng tò-tshù phiau-liû.

Tān-sī khînn-tiâu Iâ-soo thong-kè tsai-hāi,
Sui-jiân thinn-tē kàu bô, iā beh khiā-tsāi.
Kian-tshî, iu-siong ūe kè-khì,
Po̍k-hong ū-kò ju̍ah-thinn teh-beh lâi,

Si̍p-jī-kè sī ǹg lo̍k-hn̂g ê piáu-sī,
Bān-mi̍h Thinn-pē thóng-tī!
Thîng-tsí it-tshè hûai-gî,
Kian-tshî, gúa ê sim ah, kian-tshî, koh kian-tshî.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw