《台語荒漠甘泉（全羅版）》

An-tsīng ê Li̍k-liōng

作者 陳清俊 翻譯

listen

Tsa̍p ge̍h jī-pueh (Tsa̍p ge̍h jī-tsa̍p-pueh ji̍t)

"Siōng-tè ê lîn-bín tsin hong-sīng, ūi-tio̍h I thiànn lán ê tūa jîn-ài, tng lán tùi kè-sit í-king sí ê sî, tsiū hōo lán kap Ki-tok tâng-u̍ah. Iā hōo lán tī Ki-tok Iâ-soo kap I tâng khí-lâi, tâng tsē tī thinn-nih." (Í-hut-sóo 2:4-6)

Tse sī tio̍h ê sóo-tsāi, "kap Ki-tok tâng tsē tī thinn-nih" an-tsīng tsē tī hia. Tsóng-sī tsin khó-sioh, tsin tsió lâng ū tsit khúan ê king-giām. Sū-si̍t-siōng, tūa pōo-hūn ê lâng siong-sìn tse sī bô khó-lîng ê, tsi̍t hong-bīn sing-u̍ah tī tsit ê hûan-tsa̍p ê sè-kài, koh tsi̍t hong-bīn an-tsīng tsē tī thinn-nih.

Ū lâng kóng, tī lé-pài ji̍t, á-sī ū sî-tsūn, kàu lé-pài-tn̂g ū lîng-sìng ê kiông-tiāu, ū o-ló ê khì-hun, tsiū ná tshin-tshiūnn "an-tsīng tsē tī thinn-nih," tse sī khó-lîng, nā-sī kóng kui-kang, múi tsi̍t kang "tsē" tī hia, tsiū ûan-tsûan bô siâng-khúan. Tsóng-sī sìng-king bîng-bîng kóng, m̄-sī kan-nā tī Tsú-ji̍t, sī múi-tsi̍t ji̍t ê sū.

Tng lán tī gūa-bīn u̍ah-tāng ê sî, ū pîng-tsīng ê sim-lîng sī bô-kè tsi pó. Bô ū sím-mi̍h pí sim-sîn put-an, á-sī iu-lū hûan-ló koh-khah ūe hóng-gāi tio̍h Siōng-tè khùann-būe-tio̍h sim-lîng ê li̍k-liōng, in-ūi lán lóng sī khò tse lâi tit-tio̍h sîng-kong.

An-tsīng sī ū tsin tūa ê li̍k-liōng. Tsi̍t ê úi-tāi ê sìn-tôo kóng, "Hûan-nā tsai án-tsúann khò Siōng-tè kap pó-tshî an-tsīng ê lâng, sóo tsùe ê sū lóng sūn-lī." Lán nā ūe tsai tsit ê ì-sù, tsiū ūe tsìng-khak liáu-kái, an-tsīng thang tūa-tūa kái-piàn lán ê kang-tsok hong-sik. Bô su-iàu kè-sio̍k ka-kī sim-sîn put-an, lóo-li̍k tsing-tsat, lāi-sim thang "tsē" tī Tsú ê bīn-tsîng, hōo Sìng-lîng sio̍k thinn ê li̍k-liōng an-tsīng ūi lán tsùe kang, ûan-sîng lán ê bo̍k-piau kap ǹg-bāng.

Lí khó-lîng khùann būe tshut, iā kám-kak būe tio̍h tsit ê Siōng-tè tsīng-tsīng ê lūe-tsāi li̍k-liōng, tsóng-sī tse sī it-ti̍t teh kang-tsok, tsí-iàu lí an-tsīng lí ê sim hōo tsit ê tsīng-tsīng ê la̍t tùa lí hiòng tsîng. --- Hannah Whitall Smith

Hong-thai ê tiong-sim tsin ò-biāu pîng-tsīng,
Sùe-hàn gín-ná bô tio̍h kiann, khùn tsīng-tsīng,
Liân thâu-mn̂g mā pó-tshî gûan-hîng,
Tī tūa tńg-se̍h sûan-o tiong ū kî-biāu ê an-lîng.

Tī jīm-hô ê khûan-kíng tiong, tì-ì ha̍k-si̍p tī Siōng-tè lāi ê pîng-tsīng kap an-siông.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw