《台語荒漠甘泉（全羅版）》

Siōng-tè ê liâm-á-to

作者 陳清俊 翻譯

listen
Tsa̍p-it ge̍h tsa̍p-it (Tsa̍p-it ge̍h tsa̍p-it ji̍t)

"I beh kàng-lîm tshin-tshiūnn hōo lo̍h tī í-king kuah ê tsháu." (Si-phian 72:6)

A-môo-sū kóng-tio̍h "kā ông kuah tsháu" (A-môo-sū 7:1) ê sū. Lán tī thinn nih ê Ông ū tsin tsūe liâm-á, sî-siông īng lâi kuah-tsháu. Liâm-á tī to-tsio̍h bûa ê siann sī ū-kò tsin-tsūe ê hue-tsháu beh siū kuah khí-lâi. Sui-bóng tī tsá-khí-sî bōo-sīng bí-lē, bô kúi tiám-tsing āu, tsiū siū kuah, tó lo̍h-khì, koo-ta.

Jîn-sing tiong, lán tio̍h ióng-kám bīn-tùi thòng-khóo ê liâm-á, sit-bāng ê tsián-to, kap sí-bông ê uan-to. Tsháu nā bô put-tūan ê kuah, tsiū bô tshinn-tshùi pînn-pînn nńg-nńg tsíng-tsê hó-khùann. Siâng-khúan, lán nā bô jím-siū Siōng-tè liâm-to ê siu-tsíng, tsiū būe u̍ah tshut pîng-hîng, un-jiû, tông-tsîng pa̍t-lâng ê sing-u̍ah.

Sìng-king tiong siông-siông tsiong lâng pí-phīng tsháu, Siōng-tè ê îng-iāu pí-phīng tsùe hue ê tshàn-lān. Tsháu kuah liáu-āu, tsháu-hio̍h iáu teh lâu tsiap, pún ū hue ê sóo-tsāi iā lóng bô-khì lah. Siōng-tè bí-hó kàng hōo ê sî tsik-sî kàu, sóo lo̍h ê sī iù-iù un-lúan ê sio hōo.

Tshin-ài ê lîng ah, Siōng-tè teh kuah lí! Thinn-tíng ê ông tùa liâm-á lâi. Bo̍h-tit kiann I ê liâm-á, in-ūi sùa-bé tè lâi ê, sī tsu-lūn ê sùe-hōo. --- F.B. Meyer

Bû-tsîng iu-siong ê íng,
Phah tī ta-sò hong-bôo ê hái-hūann tíng,
Khùann bô hi-bāng ê tsiân-tîng,
Ná tshin-tshiūnn po̍k-hong-hōo íng-úan būe thîng.

Sè-tsiūnn huan-lo̍k ê pue,
Tam būe-tio̍h u̍ah-miā bí-lē,
Ǹg-bāng, tī put-an ê bîn-bāng tiong siau-thè,
Teh thí-tshiò lán ê sim-tē,

Siáng ūe pîng-tsīng ià-siān sim-lîng ê tsí-khòng?
Siáng ūe thinn-póo lāi-sim thòng-khóo hi-khong?
Siáng ūe īng íng-úan pîng-an khin-khin ê siann kóng,
Pîng-tsīng hiong-kông ê pho-lōng?

Tsí ū I, siū-siong phùa-tshùi ê sim,
Tùa khóo-tshóo ê si̍p-jī-kè, kap tshì-phè ông-bō,
I ê thiànn huat-tshut hí-lo̍k siann-im,
Ūi lán pàng-sat I ka-kī sìnn-miā lâi sí-bô.

Sù-hok ê Tūa-i-sing, tsiong lán ê tànn tû khì,
Sù lán sóo kiû ê pîng-an kam-tinn,
Hōo lán khò-kūn I kàu tsá-khí-sî,
Sóo ū hûn-bū im-iánn lóng siau-lī.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw