《台語荒漠甘泉（全羅版）》

Sìn-sim bô pu̍ah-tó

作者 陳清俊 翻譯

listen
Tsa̍p-it ge̍h tsa̍p-pueh (Tsa̍p-it ge̍h tsa̍p-pueh ji̍t)

"kìnn-nā bô tī gúa lâi tio̍h-tak ê, ū hok-khì." (Lōo-ka 7:23)

Ū-sî bô in-ūi Ki-tok Iâ-soo lâi tio̍h-tak, á-sī pu̍ah-tó sī tsin khùn-lân ê, in-ūi pu̍ah-tó sī gúa ê tshù-kíng ê kiat-kó. Ū-sî tng gúa siūnn beh ài khah tūa ki-hūe ê sî, gúa sū-hōng ê hūan-ûi siunn e̍h, á-sī phùa-pīnn, á-sī tshái-tshú bô siū huan-gîng ê li̍p-tiûnn, suah kap pa̍t-lâng keh-lī. Tsóng-sī Tsú tsai sím-mi̍h tùi gúa sī siōng hó ê, gúa ê khûan-kíng sī iû I kuat-tīng. Put-kúan I hē gúa tī sím-mi̍h sóo-tsāi, I án-ni tsùe sī beh ka-kiông gúa ê sìn-sim kap li̍k-liōng, khip-ín gúa kap I ū khah tshin-bi̍t ê kau-óng. Sīm-tsì gúa tī kann-lô lāi, gúa ê lîng iáu-kú hing-ōng.

Hōo gúa pu̍ah-tó tì-kàu lī-khui Ki-tok sī kám-tsîng-siōng ê, khó-lîng sī in-ūi gúa būe thang kái-kuat būn-tê, tsin hûan-ló, sim lūan-lūan. Gúa tsiong pún-sin kau tī Siōng-tè ê tshiú, hi-bōng íng-úan sī ji̍t-kng tshàn-lān ê thinn, tsóng-sī phian-phian sī oo-im-thinn, iā ū-sî lo̍h-hōo bô thîng. Tān-sī gúa pit-su siong-sìn, khùn-lân thang hōo gúa ha̍k-si̍p ûan-tsûan sìn-khò I, sìn-khò bô kiann. Tsit ê hùn-liān sī thong-kè gúa lí-tì kap kám-tsîng ê tsing-tsat lâi tsìn-hîng, tsiah ūe thang kàu-tō hiah ê siū hong-hōo teh tsia̍h-khóo ê lâng.

Hōo gúa lī-khui pu̍ah-tó ê sī Lîng-sìng-siōng ê. Gúa lia̍h tsùe tsi̍t ē ji̍p tī iûnn-tiâu, tsiū būe siū kip-hong po̍k-hōo ê tánn-kik lah. Tsîng-hîng pīng m̄-sī án-ni. Tse ûan-tsûan sī ūi gúa ka-kī tsū-su sóo siūnn ê. In-ūi gúa siū ín-iú, Siōng-tè ê un-tián khòng tūa lah, gúa ê phín-keh iā sîng-si̍k. Thian-kok ná lâi ná tinn-bi̍t.

Gúa it-tān kàu thinn-ke, hûe-khùann iân-lōo king-li̍k ê tshò-tsiat, tshì-thàm, gúa beh o-ló Tsú ê tài-niá. Sóo-í put-kúan gúa tú-tio̍h sím-mi̍h, gúa beh huan-gîng I ê tsí-ì, tsu̍at-tùi bô ūi tio̍h Tsú lâi pu̍ah-tó. --- Alexander Smellie

Sìn-sim bô pu̍ah-tó ê lâng ū hok,
Tī i tsiu-ûi kok tsióng kok tso̍k,
Siōng-tè tsín-kiù ê tāi-lîng ji̍t-ji̍t teh kang-tsok.

Tī oo-àm kann-lô, ka-kī lîng-hûn ji̍t-ji̍t koo-ta-khì,
Iáu-kú sìn-khò Thinn-pē ê thiànn-thàng kap tsí-ì,
Búan-ì ti-tsiok tī kann-nih an-tì.

Kú-tn̂g siū khóo-lān ê lâng ū hok-khì,
Iáu ūe īng kî-tó, o-ló hun-hióng tsin-lí,
Iā thang pun-tio̍h "tsiàn-lī."

Ū hok-khì ah! Siū kè khóo ê Siōng-tè kiánn-jî,
Sui-jiân m̄-tsai siū-khóo gûan-in, tsîng-lí,
Iáu huann-huann hí-hí tsiong sìnn-miā kau-tài I.

Sī, Sìn-sim bô pu̍ah-tó ê lâng ū hok-khì,
Siū bô-bîng ê tshì-liān, oh lí-kái ê ò-pì,
Ti̍t-kàu bo̍k-piau ta̍t sîng, sìng-lī. --- Freda Hanbury Allen

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw