《台語荒漠甘泉（全羅版）》

Tsúi-tsûann

作者 陳清俊 翻譯

listen


Tsa̍p-it ge̍h jī-tsa̍p-la̍k ji̍t

"Ka-li̍k mn̄g kóng, Lí beh sím-mi̍h ah? I kóng, Kiû lí sù-hok gúa; lí í-king an-tì gúa tī lâm-hng ê tūe, kiû lí hōo gúa tsúi-tsûann. I tsiū īng tíng ê tsúi-tsûann, ē ê tsúi-tsûann hōo i." (Iok-su-a 15:18-19)

Jîn-sing tiong ū "tíng ê tsúi-tsûann kap ē ê tsúi-tsûann." In lóng-sī tsúi-tsûann, m̄-sī tiānn-tiānn ê tsúi-khut. In sī tùi thinn-tíng lâu lo̍h-lâi ê hí-lo̍k kap tsiok-hok, thong-kè iām-jia̍t ê ju̍ah-thinn, king-li̍k hûan-ló kap khó-giām siōng hong-hùe ê sua-bôo. Sio̍k-tī Ap-sat ê thóo-tē sī tī Iû-tāi ê lâm-pîng, iām-jia̍t ê ji̍t-thâu kā thóo-tē pha̍k kàu ta-sò-sò. Tsóng-sī tùi suann-nih lâu-lo̍h-lâi bô-tn̄g ê tsúi-tsûann hōo kui tè thóo-tē lóng piàn tshing-liâng, king-sin koh tsin pûi.

Tsiah ê tsúi-tsûann lâu kè jîn-sing kē ê sóo-tsāi, khùn-lân ê sóo-tsāi, hong-bôo ê sóo-tsāi, koo-to̍k ê sóo-tsāi, iā phóo-thong ê sóo-tsāi. Bô-lūn lán ê tshú-kíng jû-hô, lóng ūe thang tshē tio̍h tsiah ê tsúi-tsûann. A-pik-la̍h-hán tī Ka-lâm ê tsìng suann pinn tshē tio̍h tsúi-tsûann. Môo-se tī Bí-tiân ê tsio̍h-pûann tiong tshē-tio̍h tsúi-tsûann. Tāi-pi̍t tī Sé-kik-la̍h ê hé-hu tiong tshē-tio̍h tsúi-tsûann, hit-sî i ê tsâi-sán lóng bô-khì, i ê ka-tîng siū lia̍h. Sui-jiân tsìng-lâng kóng "tio̍h īng tsio̍h-thâu tìm i, ... tsóng-sī Tāi-pi̍t úa-khò Iâ-hô-hua i ê Siōng-tè, ka-kī kian-kòo." (I Sat-bóo-jínn 30:6)

Í-sài-a tī A-sut ông Se-ná-ki-li̍p tsìn-ji̍p Iû-tāi kok kiann-hiânn ê ji̍t-tsí huat-kiàn liáu tse tsúi-tsûann, hit-sî liân kûainn-suann to tshin-tshiūnn beh hiat lo̍h hái. (II Lia̍t-ông-kì 19 tsiunn) Tsóng-sī i ê sìn-sim iáu ūe hōo i tshiùnn-kua, "Ū tsi̍t tiâu hô, i ê khui-tshe hōo Siōng-tè ê siânn huann-hí, Tsiū-sī Tsì-kûainn-ê sóo khiā-khí sìng ê sóo-tsāi. Siōng-tè tī hit tiong-kan, siânn tik-khak būe iô-tāng." (Si-phian 46:4-5)

Ki-tok-tôo sûn-tō tī lia̍t-hé tiong huat-kiàn tsúi-tsûann, kàu-hūe kái-kik-tsiá tī kap in ê tùi-ti̍k hùn-tàu tiong, iā lán tī múi tsi̍t ji̍t ê sing-u̍ah tiong, lóng ūe tshē tio̍h tsúi-tsûann, tsí-iàu lán sim-tiong ū Pó-hūi-su, iā o̍h Tāi-pi̍t án-ni kóng, "Gúa ê tsúi-gûan lóng tsāi-tī Lí." (Si-phian 87:7)

Tsiah-nih tsūe, hong-hù, tsiah-nih pó-kùi ê tsúi-tsûann lán thang ū, Siōng-tè iáu ū koh-khah tsūe, hong-hong hù-hù ê mi̍h ài lán khì tit tio̍h! --- A.B. Simpson

Gúa kóng, Sua-bôo tsin khuah-khui.
Gúa kóng, Sua-bôo tsin hong-hùi,
Gúa tshùi-ta, tī tó-ūi ū tsúi?
Tī po̍k-hong-sua beh bih tī tó-ūi.

Gúa kóng, Sua-bôo tsiah-nih koo-tuann.
Bô un-jiû siann, bô khó-ài bīn thang khùann,
Liân tsi̍t-tiám-á ê khong-kan iā bô thang hūann,
Gúa iáu-būe tūa-siann huah tsiū siau-sùann.

Gúa thiann-tio̍h ún-tsông ê tsúi-tsûann,
Tī gúa bīn-tsîng ū tsó-tshiū tshinn koh tūa,
Tsiáu-á teh tshiùnn-kua,
Khong-tiong ū thinn-sài ê si̍t koh iô koh tûann.

Tsi̍t ê Thinn-sài khin-khin mn̄g tsi̍t kù,
"Tùi bîng-á-tsài ê sū,
Ūi-sím-mi̍h ài kè-thâu iu-lū?
Kiám-m̄-tsai Thinn-pē tsai lí sóo su?"

附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw