《台語荒漠甘泉（全羅版）》

"Tsiām-sî ê thòng-khóo"

作者 陳清俊 翻譯

listen

Tsa̍p-jī ge̍h tshue-káu (Tsa̍p-jī ge̍h káu ji̍t)

"Gúan ba̍k-nih kú khin-khin ê kan-khóo sī kā gúan tsiânn siōng-tíng-siōng íng-úan ê tūa îng-kng." (II Ko-lîm-to 4:17)

Lâng siông-siông án-ni mn̄g, "Ūi-sím-mi̍h jîn-sing tshiong-múa tsiah-nih tsūe ê lâu huih-kūann, tsiah-nih tsūe ê lâu ba̍k-sái ê sū?" Tap-àn beh tī "tsiânn" á-sī "Sîng-tsiū" ê sû tshē-tio̍h. In-ūi tī tsiām-sî "khin-khin ê kan-khóo," hōo lán "tsiânn", "sîng-tsiū" bóo-tsióng pó-kùi ê phín-tsit. Thòng-khóo kà lán m̄-nā sī sìng-lī ê tō-lōo, koh ū sìng-lī ê tīng-lu̍t, tsiū-sī múi ê thòng-khóo lóng kânn ū pò-siúnn. Sarah Adams tī 1840 nî ê tsàn-bí si-kua án-ni kóng,

Tsú, gúa ài tsiū-kūn tsiū-kūn Lí,
Tio̍h tìng si̍p-jī-kè, mā kam-gūan siū tìng-sí.

Hí-lo̍k ū-sî su-iàu thòng-khóo lâi tshui-sán. Fanny Crosby (1820-1915) sī Bí-kok tsàn-bí si-kua tù-tsok-ka, siá kè tshiau-kè nn̄g-tshing siú ê si-kua. Nā m̄-sī in-ūi i ê sit-bîng (tshinn-mî), i bô ki-hūe īng ba̍k-tsiu him-sióng tio̍h tshinn-tshinn ê tshân-iá, âng-âng ê ji̍t-lo̍h, á-sī i lāu-bú ba̍k-tsiu nih-tsi̍t-ē nih-tsi̍t-ē ê piáu-tsîng, tsiū būe hōo i ê sim-lîng ū ti̍k-pia̍t ê sī-li̍k, kuan-tshat-li̍k kap lîng-kám lâi siá si-kua.

Ta̍t-tit an-ùi ê sī thòng-khóo tsí sī thîng-liû tsi̍t-mî, tē jī kang tsá-khí tsiū lī-khui khì. Pí-kàu tn̂g-tn̂g ê ju̍ah-thinn, sai-pak-hōo sī hô-tíng ê té. Kì-tit "Kui-mî sui-jiân ū thî-khàu, tsá-khí sî tsiū ū huann-hí." (Si-phian 30:5) --- tùi "Mî-sî ê kua"

Thòng-khóo āu ū pîng-an tshut-hiān,
Sī hi-bāng pàng-hē, m̄-sī hi-bāng si̍t-hiān.
M̄-sī kî-thāi tī bîng-ji̍t ê pîng-tsīng,
Sī hong-thai āu ê an-lîng.

Pîng-an bô tī hiān-tsāi múa-múa hí-lo̍k,
Iā m̄-sī tī huann-hí thiànn-thàng sing-u̍ah hīng-hok,
Sī tī sim-tiong ū khó-khò li̍k-liōng,
Tshiong-tu̍t, thòng-khóo tiong tit sing-tióng.

Pîng-an tsûn tī ûan-tsûan ê hōng-hiàn,
Bô-siū ì-tsì, kám-tsîng sóo kái-piàn,
Pîng-an m̄-sī tshut tùi pîng-tsīng ê Ai-tiân,
Sī tsāi Khik-se-má-nî hn̂g sìng-lī tshut-hiān.


附註:《荒漠甘泉》漢羅版kap "Hong-bôoKam-tsûann"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com.tw